الوسم: الصعبة

ازيكم يا فتوكات

النهاردة ميعادنا مع اكلة جميلة وسهلة جدا باذن الله

الكشرى المصرى

نصف كوب عدس اسود(بجبة)

نصف كوب رز مصرى

مكرونة مشكلة صغيرة واسباجتى

عصير طماطم ومعلقتين صلصة

توم

بهاراتك (ملح وفلفل وكمون وكسبرة وشطة)
خل

بصل جوانح للوش

بصل مبشور للعدس

(فى ناس بتحب تحط حمص براحتك بس انا مش بحب احط له حمص)

الطريقة

اولا صلصة الطماطم

نحمر التوم فى شوية زيت او سمنة يدوب يصفر

ننزل بعصير الطماطم ومعلقتين صلصة لزوم اللون الحلو

نضيف الملح والفلفل والشطة والكمون ونسيبيها تتسبك

كده الصلصة تمام

ندخل على الدقة سهلة جدا

عبارة عن مية وشوية خل وملح وشطة وكمون وتوم مفروم

ونرجهم شوية مع بعض وكل ما نسيبيهم فترة اطول كل ما كان احسن

ده شكلها

ندخل على البصل الجوانح

ده بيحتاج زيت كتير شوية علشان يقرمش معاكى

فى ناس بتحطه شوية فى دقيق علشان يقرمش

نحرمه كويس ونطلعه على مناديل مطبخ

ونركنه على جنب

حاجة مهمة يا بنات

طبعا فى زيت حيتبقى من تحمير البصل

طبعا مش حنرميه

حناخد جزء نحمر فيه بصل العدس

والجزء اللى باقى خليه حاقولكم حنعمل بيه ايه كمان شوية

وفى نفس الحلة وحرصا على تقليل المواعين

نحط البصل المبشور نصفره برضة شوية

ننزل بالعدس المنقوع والمغسول

نزود مية سخنة وفصين توم مدقوق وشوية كسبرة ناشفة وكمون وملح

نسيبيه يستوى

قرب ما يدخل فى السوى ننزل بالرز

واذا لقيتى انك محتاجة مية زودى لغاية ما تغطى الرز بشوية

وتسيبيه على نار هادية يستوى

كده الرز تمام بفضل الله

لما تيجى تقلبيها تمسكى شوكة وتفرفرى فيه كده

علشان يكون مفلفل

مش بملعقة وتعجنى فيه وهو لسه سخن

نكمل فى المشاركة الجاية

انا اول مرة اكتب فى القسم ده
وعملت لكم مخلل اللفت
طبعا ده الموسم بتاعه فى الشتا
وبيبقى جميل مع طبق الفول
ومع اى اكل بيفتح النفس
وكمان عملت مخلل الليمون
فى ناس بتقول على المخلل صعب
لكن هو اسهل حاجة
وانظف بكتير من اللى بتشتريه

نبدأ بسم الله

بنجيب اللفت نغسله كويس
ونقطعه

انا حطيته فى مصفاة وعليه شوية ملح صغيرين
لغاية ما يصفى ميته

هنا جهزت البرطمان
واحسن حاجة يكون ازاز
وده بياخد حوالى 3 كيلو لفت

بنحط اللفت بالتبادل مع قرون فلفل حامى

وطبعا اللفت بيحتاج للبنجر علشان لونه يبقى حلو

وده شكل البنجر حتحتاجى قطعتين صغيرين منه بس

بنجهز المية ونحط عليها كوباية الا ربع ملح وشوية شطة حمراء
ونقلبها قبل ما نحطها على اللفت

نحطها على اللفت لغاية ما يتملى البرطمان خالص

فى حاجة مهمة قوى فى المرحلة دى

حتلاقى اللفت لما بتضغطى عليه بيهبط لتحت ترجعى تحطى لفت تانى وتضغطى كويس
لانك لو سبتيه كده حيعوم فى المية ويطرى ومش حيكون مقرمش وحيتهرى

شوفى البرطمان مليان على الاخر

وتحطى على وش البرطمان البلاستيك اللى بيلفوا بيه الحاجات فى السوبر ماركت
مش موجود حطى كيس بلاستيك
من بتاع السندوتشات
وده فايدته انه بيمنع دخول الهوا خالص للفت

وده شكله بعد يومين لما البنجر نزل لونه

وبعد اسبوع فتحت عليه ودى النتيجة

وكمان طبق

بعد ما يستوى خالص
باشيله من البرطمان واحطه فى علبة بلاستيك
واشيله فى التلاجة
بيفضل مقرمش ومش بيطرى خالص لغاية اخر حتة

ندخل على مخلل الليمون

استنونى فى المشاركة الجاية

النهاردة جبت لكم وصفة التشيكن بوب كورن او بوب كورن الدجاج

وصفة سهلة وبسيطة وولادك حيحبوها ولو كلتيها بره حتدفعى كتير

ولو عملتيها فى البيت مش حتكلفك خالص وحتدعيلى

وده شكل البوب كورن

ادى صدر فرخة واحد بس وحيطلع كمية كويسة وانتى طبعا ممكن تزودى زى ما بتحبى

نخليه ونقطعه مكعبات وممكن تجيبه بانيه جاهز على التقطيع علطول

ادى الكمية اللى طلعت

نيجى للتتبيلة

ميه بصل وملح وفلفل وشطة وزعتر وتوم بودرة وجنزبيل بودر وعصير نص ليمونة ومعلقتين كاتشب ومعلقتين صويا صوص (ممكن الاستغناء عنها)

ونحط فيها مكعبات الفراخ من بالليل للصبح

الصبح بقى وعليكى خير بنجهز خلطة القلى عبارة عن دقيق متبل بكل البهارات اللى قولنا عليها ما عدا الكاتشب طبعا وممكن تزودى الشطة لو بتحبيها مشطشة اكتر وبنزود نصف معلقة صغيرة بيكنج بودر

تاخدى 3 معالق من الدقيق ده وتزودية ميه لغاية ما يبقى زى الطحينة كده

وده الدقيق المتبل

نحط الفراخ فى الخليط التقيل ده

ونطلعه على الدقيق المتبل

بنجهز مقلاية غويطة او حلة علشان الزيت يغمر كل الفراخ ويكون سخن

يمكن الصورة مش واضحة اوى لان الكاميرا كانت حتقع فى الزيت وربنا ستر

بعد ما تحطى الفراخ تهدى النار وتسيبيه يستوى براحته ومش بياخد وقت لانه قطع صغيرة

ومتقلبيش كتير علشان الطبقة اللى على الفراخ متفكش

وتطلعيه على ورق مطبخ ودوقى احلى بوب كورن وقدميه بطريقتك

يارب الموضوع يكون عجبكم وافادتكم ولو بمعلومة بسيطة