قالب اللحم المفروم تجديد فى شكل اللحمه المفروم التقليدى وكمان الطعم ماشـاء الله جميييل لاننا بنحط مجرد نكهات بسيطه عشان يبقى الطعم مميز عن اى لحمه مفرومه بنعلمها وكمان تحسى انها مستهبله وعامله نفسها عرق فلتو
طبعا الفتوكات هنا ماشاء الله عليهم اكيد عارفينها بس انا قولت اقولها للى ميعرفهاش
قبل ماندخل ع الطريقه
تعالو نشوف الصوره النهائيه
المقادير
لحمه مفرومه (ونفرمها كمان مره فى الكبه عشان تبقى ناعمه)
بصله مبشوره ناعم
معلقه بقدونس
معلقتين كاتشب
ربع كوب لبن
4معالق بقسماط ناعم
ملح وفلفل ورشه توم بودر بسيطه جدا +بابريكا
ربع قرن فلفل (اختيارى) مقطع ناعم يدوب يدينا نكهه بسيطه
اول حاجه هنحط اللبن ع البقسماط ونشيله حوالى 3 دقايق على جنب لغايه مايتشرب اللبن
هنا بعد مالبقسماط اتشرب اللبن اعتقد واضح من الصوره الفرق فى اول ماحطينا اللبن وبعد ماسيبناه 3 دقايق بقا عامل زى العجينه كده
هنحط البقسماط بتاعنا المنقوع فى لبن على باقى المكوانت كلها ونخلطهم كويس اووى مع بعض بحيث تمتزج كل المكونات مع بعضها
ده بعد ماخلطنا المكونات مع بعضها كويس انا كنت نسيت احط الفلفل فحطيته فى الخطوه دى
نجيب قالب الانجلش كيك ونبتدى نحط فيه اللحمه ونضغط كويس ونساويها بقدر الامكان وفى الاخر بندهن على الوش كاتشب وبعدين نغطيها بفويل وتدخل فرن ساخن على درجه حراره 180 وبتقعد حوالى ساعه او ع حسب فرنك
المهم قبل اخر ربع ساعه من الوقت نشيل الفويل من على الصينيه ونخرجها ونفضى كل الدهون والسوايل الى هتنزل منها وندخلها الفرن تانى تكمل سوا وبعدين تاخد لون
#تكايه مهمه
اول ماتستوى تطلعيها من القالب وتحطيها فى طبق ومتقلقيش هتلطع معاكى بسهوله لانها بتنزل دهون هتساعد انها تطلع معاكى بسهوله ان شاء الله اوعى تقطعيها تسيبيها تبرد خالص لانك لو قطعتيها سخنه هتبوظ منك وهتفرول اوك
وده شكل قالب اللحمه بعد ماخرج من الفرن بجد ماشاء الله جمييييييييل وممكن تدلعى الاكله وتدخنيها بفحمه او تاكليها كده بتبقى حلوه ان شاء الله
وكمان فى اى عزومه بتبقى شيك اووى جنب الاكل
وكالعاده لو عجبتكم الاكله مش عايزه منكم غير دعوه حلوه بظهر الغيب ان ربنا يقر عينى بما اتمنى ويريح قلبى ويسعدنى ويبعد عنى وعن عيلتى اى هم واى حزن واى ضرر
فى رعايه الله يافتوكات مواضيع هذا القسم برعاية
angelsmile2311 angelsmile2311 963758_5.gif فتكات رائعة Fatakat 963758 my home – egypt
