ازيكم يا بنات
موضوعى اللى فات عن البنات اللى مش بيعرفوا يعجنوا وعايزين ياكلوا معجنات
واستخدمت عجينة الباف بسبترى وعملت معجنات
سهلة وبسيطة
لو بتحبى المعجنات ومش بتعرفى تعجنى نورينى**فتاة المهمات الصعبة **
النهارده حعمل عجينة سهلة وسريعة باللبن الرايب
ولو مفيش لبن رايب ممكن لو عندك لبن قاطع ومش عارفة تعملى بيه ايه
تعملى بيه العجينة دى وبتطلع احلى واطرى فطائر بالجبنة
دى صورة الفطائر
المقادير
3 وربع كوب دقيق
1 معلقة كبيرة خميرة فورية
2 معلقة كبير سكر
1 معلقة صغيرة ملح
ربع كوب زيت
ربع كوب زبادى
كوب لبن رايب دافى
للحشو
جبنة بيضاء او قريش لو تحبى وتضيفى نعناع ومعلقة زيت زيتون بتدى طراوة للجبنة
للتلميع
بيضة مضروبة مع معلقة لبن
الطريقة
نخلط المكونات الجافة مع بعض الدقيق والخميرة والسكر والملح مجرد مزج مش اكتر
ملحوظة مهمة انا حطيت 3 كوبايت دقيق بس وحاعجن واشوف حاحتاج الربع ولا لا
يعنى حسب نوع الدقيق ياللى بتستخدميه
هنا ضيفت الزيت (ممكن تستخدمى زيت ذرة او اى نوع عندك)
وحطيت الزبادى واللبن الرايب (انا بادفيه شوية علشان الخميرة)
وعجنت
انا احتاجت ربع كوباية لدقيق الباقية
زودتها وعجنت لغاية ما بتلاقى العجينة طرية فى ايديكى ومش بتلزق
دى العجينة طرية وجميلة جدا اغطيها واسيبها تخمر
ممكن تعجنيها بايديكى عادى من غير عجان
ده خليط الجبنة بالنعناع الناشف
العجينة بعد التخمير
فردتها
باى قطاعات او كوباية اعملى دوائر بالحجم اللى تحبيه
حطيت الجبنة
قفلتها
لمعتها بخليط التلميع وسبتها عشر دقايق لاعادة تخميرها
بس مش اكتر من عشر دقايق علشان متفتحش منك
عملت كمان منها كروسون سهل وجميل برضه
بنفس العجينة فردتها ودهنت زبدة باردة
قفلتها زى الظرف وفردتها بالراحة
وبعدين حطيت زبدة تانى وقفلتها
قفلتها وفردتها
وشكلتها كروسون وحشيته جبنة
دخلت الكروسون التلاجة شوية قبل الخبز علشان الزبدة تمسك ومش تسيح فى الفرن حوالى نصف ساعة
ومن التلاجة على الفرن علطول
دخلتها فرن متسخن على 180 بتاخد من ربع لتلت ساعة
وده شكل فطاير الجبنة والكروسون
هشة وطرية وجميلة وتنفع للمدرسة
يارب موضوعى البسيط يكون عجبكم
وافادتكم ولو بمعلومة صغيرة
مواضيع هذا القسم برعاية
فتاة المهمات الصعبة فتاة المهمات الصعبة 190913_15.gif Fatakat 190913 الرياض – السعودية
