الوسم: المهمات

وافدتكم ولو بمعلومة صغيرة مواضيع هذا القسم برعاية

فتاة المهمات الصعبة فتاة المهمات الصعبة 190913_15.gif Fatakat 190913 الرياض – السعودية

صباح الفل عليكم يا بنات

غدانا كان بط وكسكسى بالخضار
فى ناس حتقول ده البط صعب والكسكسى بياخد وقت

حاقولهم لا البط صعب ولا حاجة اعتبرى نفسك بتعملى فراخ والكسكسى طريقته انا منزلاها مش بياخد وقت خالص

البهارات لزوم البطة

حبهان وورق لورى ومستكة وترنشات جزر ولو فى كرفس يبقى احسن

وطبعا بصل وملح وفلفل وكمون

دى الحلة وفيها كل التوابل

لازم المية تغلى كويس اوى قبل ما نحط البطة

على ما المية تغلى حنغسل البطة بدقيق وملح وننقعها فى ليمون لغاية ما تبقى زى الفل وريحتها حلوة

علشان نقضى على اى زفارة

بجيب بصلة ابشرها واحط عليها فلفل وملح وادعك بيها البطة كويس اوى من برة وجوة وبين الجلد واللحم

الخطوة بسيطة بس بتفرق كتير فى الطعم

حنحط البطة فى الشوربة ولازم كل ما يطلع ريم على الوش تشيليه علشان الشوربة تنبقى حلوة وزى السكر

البطة دى صغيرة 1800 جرام خدت ساعة ونصف معايا

طبعا انتى حسب حجم البطة معاكى ممكن تاخد وقت اطول

وحمرتها

لو مش عايزة تحمريها ممكن تدهنيها بسمنة ومعلقة صلصة ودخليها الفرن

انا كنت عايزة اعمل ملوخية معاها بس ماقتش

فقلت اعمل كسكسى وخضار مشكل معاها

ودى طريقة الكسكسى فى اقل من نصف ساعة يبقى عندك احلى كسكسى

الكسكسى ولا اسهل من مطبخ فتاة المهمات الصعبة

وده شكله

وده بعد ما حطيت عليه خضار مشكل بسلة وجزر وبطاطس

يارب الموضوع يكون عجبكم وافادتكم ولو بمعلومة بسيطة

مسابقتنا النهاردة بمناسبة عيد الام

والمفروض كل يوم يبقى عيد ام

ومش نستنى اليوم ده علشان تفتكرى امك

المفروض تبقى عيد ليها طول السنة

كل سنة وكل ام طيبة

وربنا يرحم الامهات المتوفيات
ويغفر لهم

ودى هدية منى لكل ام فى المدونة

منيو العزومة

طاجن بامية باللحمة

صينية تورلى

كباب حلة

بطاطس شيبسى

فراخ بالصويا صوص والونجبيل

رز حبة حبة

سلطة زبادى بالخيار

سلطة الباذنجان بالتوم

سلطة خضراء

شوربة خضار

يارب المنيو يكون عجبكم

ويالا ندخل على العزومة

اولا : البامية باللحمة

نغسل البامية ونقمعها

نحمر البصلة ومعاها فلفل اخضر

ننزل باللحمة وتكون مستوية تلت ربع سوا

ننزل بعصير الطماطم ومعلقتين صلصة

نتبل بملح وفلفل

نضيف مرقة اللحم

وننزل بالبامية

وندق فصين توم ومعاهم فلفل حامى لو حبتيى

تغلى غلوتين وممكن تسيبها تستوى عادى

وممكن تحطيها فى الفرن

ثانيا: كباب حلة

نحمر بصلتين على النار

ونضيف عليهم ورق لورا وحبهان وفلفل اسود وملح قرب ما تستوى

وننزل باللحمة تتشوح كويس

تنزل اللحمة ميتها وتشربها

ونضيف مية لغاية ما تستوى

وده شكلها بعد ما استوى

وعملت كمان طبق شيبسى

الفراخ بصوص الصويا صوص والزنجبيبل

نقطع الفراخ

نعفرهم بالدقيق

(يعنى نحط معلقتين دقيق ونقلبهم معاها )

نحمرهم لغاية ما يخدوا لون حلو

فى نفس الطاسة

نحمر بصل ونحط فلفل اخضر وقطعتين زنجبيل

ننزل بالصويا صوص والتوم الودرة

ونحط مية ولما تغلى نحط الفراخ

ونسيبيها لغاية ما الصوص يتقل والفراخ تستوى

وصفة النهاردة هى الفراخ التندورى

وهى وصفة اصلها هندى بتعتمد على بهارات التندورى ماسالا وينضج الطبق تقليدياً في درجات حرارة عالية في التندور (فرن
الطين) .وتتميز ايضا باللون الاحمر لانهم بيضيفوا لها مسحوق الفلفل الحار الأحمر علشان كده بتبقى حراقة جدا

لكن انا غيرت فى المكونات شوية لتتناسب مع امكانياتنا المصرية

البهارات

كركم .كارى.ملح .فلفل.بابريكا .زعتر
زبادى.مسطردة.توم بودرة .شطة حسب الرغبة

قلبت كل البهارات دى مع معلقتين زيت وعصيرنص ليمونة

قطعت الصدر وشيلت الجلد وعملت فيها فتحات بالسكينة لتصل التتبيلة لجوه الفرخة

بتبات فى التتبيلة من بالليل

ده شكلها الصبح

حاجة مهمة جدا علشان تطلع طرية ومتنشفش منك

تجيبى مقلاية تيفال

وتحطى معلقة زيت صغيرة وعلى نار عالية تعملى لها صدمة

علشان تاخد لون وتحتفظ بالمية جواها فتفضل طرية

لما تاخد لون كويس

بتحطيها فى صينية فى الفرن وعليها بقية التتبيلة وتغطيها بالفويل

وعلى الفرن يكون سخن قبل ما تحطيها

بتاخد حوالى نصف ساعة حسب كمية وحجم الفراخ

عملت جنبها رز اصفر بالكارى والكركم

حمرت بصلة فى شوية زيت

نزلت بالبهارات كارى وكركم وورق لورى وحبهان وقرفة وقرنفل

شوحتهم مع البصل لغاية ما التوابل ريحتها تطلع

غسلت الرز وضيفته وضبطت الملح وضيفت المية السخنة

انا استخدمت رز مصرى ممكن بسمتى زى ما تحبى

وده شكل الطبق النهائى

طبق جميل وسهل والاطفال حيحبوه اوى وتغيير برضه

ممكن برضه تضيفى لون طعام احمر لو تحبى تقلدى الوصفة الاصلية

يارب تكون الوصفة عجبتكم

و اكون افادتكم ولو بمعلومة بسيطة