ازيكم يا فتوكات يا رب تكونوا بألف خير
و كل سنة و انتم طيبين العيد على الأبواب
على فكرة دي اول زيارة ليا لأقسام المطبخ
و قولت اطبق طريقة سلطة الباذنجان المشوي الخطيييييرة بتاعة
remosh
و طبعا لأني زي معظمنا بموووت فى اي حاجه داخل فيها الباذنجان
فأول اما شوفت موضوع remosh و ده اللينك بتاعه
سلطة البدنجان المشوى مفيش اجمل ولااطعم من كده
و حلاوة طبق السلطة اللي يفتح النفس اللي عملته
تسلم ايدها عليها
قولت اعملها و انزلكم تطبيقى ليها
يلا نقول المقادير :.
عدد 1 باذنجانه رومي (مشوية )
عدد 2 قرن فلفل حامي ممكن اللي مش بيحب الحامي
او لو فيه اطفال صغيرة هتاكل منها تبدليه بفلفل رومي عادي (و برضو نشويهم )
بصلاية صغيرة مقشرة و ( مشوية)
طمطمايه كبيرة (مفرومه فى الكبة)
شوية زيت ممكن نقول معلقة كبيرة
التتبيلة هنحتاج الى :.
فص توم
ملح و فلفل اسمر
كمون
شطه (اختياري برضو )
ليمونه
خل
ممكن اللي يحب حامي يضيف كمان قرن فلفل
الطــــريقة :.
هنشوي الباذنجانه على البوتجاز
هي و الفلفل
و بصلاية انا جربت اشويها على البوتجاز من فوق لقيتها مش هتبقى حلوة
فاشوتها فى الفرن احسن
و بعدين قشرت الباذنجانة و هرستها هي و الفلفل و البصلايه
فى الكبه
و الطمطماية الفرومه هنحطها فى معلقه الزيت فى طاسة صغيرة على النار
لحد ما تتسبك شويه في الوقت ده بقى
نفرم فص التوم مع الملح و الفلفل و الكمون و الشطة و عصير الليمونه و الخل فى الكبة
و ننزلهم على الطمطماية المسبكة
و نقلب و بعدين نضيف كل ده على البذنجانة و الفلفل و البصلايه
اللي شويناهم و نقلب الخليط كويس جدااا
و نفرغها فى طبق التقديم
و مقولكمش على حلوتها تجننننن
طعمه اووووووي
و ده شكل التطبيق بتاعي اهي
جربوها و على ضمانتي انا و remosh
هتعجبكم اوووووي هتاكلوا صوابعكم و متكلوهاش
ههههههههههههههههههههههههههههه
بهزر طبعا دي رووووعة و بألف هنا على قلوبكم
عايزة بقى تشجيع جاااامد ردود حلوة كده
و تقييم جامد متكسفونيش بقى دي اول مرة ليا فى القسم هنا
مواضيع هذا القسم برعاية
ميمي طه ميمي طه 52626_88.gif ملكة فتكات Fatakat 52626 — – —
