ازيكم يافتوكات انا النهارده اول مرة اكتب فى قسم المطبخ
وهاكتبلكم طريقتى اللى مشهورة بيها فى عمل المحشي وبجد جوزى بيحب جداااا المحشي بتاعى
وكمان فى اى عزومة باعملة ومع الوقت وتكرار عمايلة مبقاش بياخد معاى وقت خالص
المقاديــــــــــــــــــــــــــــــــــر :
بصي المقادير انا مش باعرف اكتبها بالكاسة لكن انا باعاير بالنظر كدة
ارز مصرى مغسول ومصفى جيدااااا
بصل مفروم ( زودى البصل على قد ما تقدرى كلما زاد البصل احلو المحشي)
3 فصوص ثوم مفرومين
طماطم معصورة ومتصفية من البذر والقشر شوية كدة محترمين
2 م كبيرة صلصة طماطم
بقدونس وشبت وكزبرة مفرومين فرم ناعم زودى كمان الخضرة بتبقي حلوة
شوية صغيرين نعناع مفروم فرم خشن ( لو بتحبية فى الخلطة ممكن الاستغناء عنة وبجد الاخضر احلى من المجفف )
ملح + فلفل اسود + نص معلقة كمون + معلقة كزبرة مجففة + ربع معلقة بهارات اللى هى ال 7 بهارات
2 م كبيرة سمن
1 م زيت
معلقة صغيرة جداااا سكر وهاقولك لية بعدين
(بصوا يابنات المقادير دى تقريبا لكوبيتين ارز )
هاتى بقي اللى انتى هتحشية سواء (((((((( باذنجان او كرنب او طماطم او فلفل رومى او كوسة للناس اللى بتحشيها بالارز بس انا باحشيها باللحمة المعصجة وفى ناس كمان بتحشي البطاطس المقورة بالخلطة دى بس دى برضة انا باحشيها باللحمة المعصجة ووممكن كمان تحشي البصل ودة بيبقي تحفة وطريقتة انك تقشري البصلة وتقوريها وممكن تستفادى من اللى بيطلع من التقوير وتحطية فى خلطة المحشي ))))))))
الطريقــــــــــــــــــــــــــــــــة :
عمل الخلطة والحشو :
هاتى الحلة اللى هتعملى فيها الخلطة وحطى الزيت على السمن لغاية لما يقدحوا وضيفى البصل وسيبية حتى يطرى بس مش يتحرق وبعد كدة ضيفي الثوم المفروم وسيبية اقل من 30 ثانية علشان ميتحرقش ويمرر وبعد كدة ضيفي الطماطم المعصورة وعليها صلصة الطماطم وحطى عليهم ربع كمية الخضرة ودة علشان الصلصة تشرب من طعم الخضرة وضيفي عليهم
الملح والفلفل والبهارات والكمون والكزبرة وكمان ضيفي معلقة السكر وهاقولك اية لازمة السكر ان المعلقة دى بتظهر حلاوة الطماطم وبتخلى التسبيكة تحفة وحاولى بقي زودى الملح سنة علشان خاطر السكر وسيبي بقي التسبيكة دى على نار هادية لغاية لما تنشف وتتسبك
بعد كدة ضيفي الارز وسيبية على نار هادية علشان ميتحرقش الارز وسيبية لمدة من 5 : 7 دقايق وبعدها ضيفي باقي الخضرة واطفى على طول
انتى بقي هتقلبي الخلطة دى فى صينية واسعه علشان تهدى وتعرفى تحشي
وتجيبي الحلل اللى هتحطى فيها المحشي وتدهنيها كويس بالزيت او بالسمن وترصى فى قعرها شرائح بصل وطماطم وممكن كمان جزر لو هتحشي ورق عنب علشان لو قلبتية يبقي شكلة حلو فى السرفيس
* لو هتحشي باذنجان ابيض او اسود قورية كويس قوى لغاية لما يبقي قشرة رفيعه قوى بس حاسبي لتخرمية واحشية بالخلطة لغاية تلات ارباع الباذنجان ورصية فى حلة وهو واقف علشان الخلطة متقعش وكمان بيبقي شكلة احلى كدة ( وهاقولك على طريقة تحفة لتسويتة ساعات باعملها)
* لو هتحشي فلفل رومى او كوسة او بطاطس قوريها ونضفيها واغسليها واحتفظى بالجزء العلوى بتاع الفلفل الرومى وبعدين احشية بنفس الطريقة الباذنجان لغاية الثلاث ارباع ويرص
انا بعد ما باقور الكوسة بالمقوار باجيب سكينة مشرشرة او حرف المقوار المشرشر وامشي بية على الكوسة من برة بيبقي شكلها حلو قوى زى المحشي بتاع المطاعم
*لو هتحشي ورق العنب اغلية واقطعى العنق وحاولى هاتى الورق البناتى الصغير او اقطعى الورق الكبير ل 2 وضيفي على خلطة المحشي لورق العنب فقط عصرة ليمون والسوريين بيعملوة ويضيفوا علية كوباية تلات ارباعها ليمون والربع الباقي زيت زيتون لكن طبعا دى مش طريقتى ممكن كمان تحطيلة شرائح ليمون فى الوسط
المهم اسلقى ورق العنب فى ماء علية عصرة ليمون والسلق لمدة دقيقة
المهم عند الحشو حطى شوية صغيرين من الخلطة ولفيها كويس مع الضغط عليها علشان تبقي رفيعه وطويلة ورصيهم جنب بعض فى الحلة وزنقيهم كويس
* لو هتحشي الكرنب هاتى الكرنب وقطعية واسلقية فى ماء وكمون لمنع الانتفاخ من الكرنب وممكن سلق الورقة كاملة لغاية لما تتطرى او تقطعى الورق وتقطعى العروق وتقطعية لمربعات صغيرة تنفع للحشو وبعدها اسلقية
وبعد السلق سيبية تبرد وبعد كدة تلفية بنفس طريقة ورق العنب تقريبا والحرص على عملة رفيع وطويل
التسويــــــــــــــــــــــــــــــــة :
عند تسوية الباذنجان والكوسة والفلفل الرومى والبطاطس والبصل والطماطم وضع الشوربة المغلية حتى ثلاث ارباع طول الباذنجان او الفلفل او …… وتترك حتى تغلى وبعد كدة يهدى النار علية حتى ينضج وممكن بعد نضجة يتبقي شوية شوربة صفى المحشي من الشوربة المتبقية علشان ميتهريش
عند تسوية الكرنب وورق العنب يوضع الشوربة المغلية حتى تغطى المحشي وبعد ما تغلى يهدى النار مع وضع الشياطة بس انا باهدى بس
بصوا بقي انا ساعات باعمل اية
**** باحط 2 معلقة صلصة او شوية طماطم معصورة قبل وضع الشوربة المغلية عند التسوية ودى بتبقي تحفة فى الكوسة والكرنب بالذات بتخلى المحشي احمر وبيبقي تحفة كام معلقة كدة على الوش
**** وانا باعمل بقي محشي الباذنجان باسوية لغاية تلات اربعه سواء كدة فوق على البوتجاز وبعدين باطلعه ارصة فى صينية بايركس حلوة كدة بشكل منظم واضيف شوية الشوربة المتبقية واسيبة يكمل سواه فى الفرن بجد بيبقي طعمه جامد اخر 500 حاجة وممكن تسوية من الاول فى الفرن مع تغطيتة بورق الفويل علشان ميكرمش وطلعية عند التقديم فى نفس الصينية
وعند تقديم المحاشي دى رصيها فى طبق سرفيس كويس مش تقلبية كدة وخلاص ومحشي ورق العنب والكرنب اقلبية فى سرفيس دائرى وسيبية الحلة شوية مقلوبة وبعدين شيليها زينى المحشي بمحاشي الطماطم ومحاشي البصل والفلفل الرومى وبالهنا والشفا
دلوقتى انتى عملتوا المحشي وكلتوة بالهنا والشفا واتببقي منة شيلة فى الثلاجة مع مراعاه لفة بالنايلون وتانى يوم طلعية من قلبها بشوية وسخنية على مصفاه تحتها ماء مغلى يعنى على البخار
وفى ناس طبعا بتسخنة بتحمرة فى السمنة بس دة طبعا مش للناس اللى زى حالاتى وبيعملوا ريجيم يلا بالهنا والشفا
يابنات لو عجبكم الموضوع قيموه لانى بقالى كتير باكتب فية وحاولت اعصر مخيخى علشان منساش حاجة وان شاء الله المرة اللى جاية اول لما اعمل محشي هاعملهولك بالصور علشان تشوفوة بس ادعولى انى اخس وعايزاكم تدعوه لابنى ربنا يحفظة ولجوزى ربنا يخيلهولى ويهديهولى مواضيع هذا القسم برعاية
mero mido mero mido 52764_5.gif فتكات متميزة Fatakat 52764 جدة – السعودية
سبحان الله و بحمده
