الفته المصريه بالخل والتوم طبعاً كلنا عارفينها بس انا قولت يمكن فى بعض الناس المبتدئين ميعرفوهاش او زى مابيقولوا كل واحد ليه طريقه الخاصه وكل واحد بيحب يحط التاتش بتاعه فى اكلته
خلينا متفقين ان من اساسيات الفته الارز الالبيض وده طريقته سهله
بنحط قطعه زبده او زيت زى ماتحبى وتغسلى كميه الرز بتاعتك وتنزلى بيها ع الزبده وتبتدى تشوحيها كويس اووى لمده 3 دقايق كده وبعدين تزودى الشوربه بحيث تبقى فوق الرز بشويه صغيرين وتغطى عليها وتهدى النار وتسيبيه يستوى
وتانى اساسيات للفته اللحمه
ودى انا بسلقها بطريقتى وهو انى بشوح اللحمه فى قطعه زبده مع لورا وحبهان وبصله كامله مش مقطعه وابتدى اديها تشويحه كده قبل مااضيف الميه المغليه عليها واسلقها بقا لغايه ماتستوى وطبعا بحط التوابل بتاعتى
فى واحده هتسالنى انتى بتشوحيها ليه هقولك عشان احاول بقدر الامكان اتفادى الريم اللى بيطلع من اللحمه المسلوقه لما بتيجى تستوى
تمام كده يلا بقا نكمل طريقه الفته بالخطوات المصوره
اول حاجه بنقطع العيش بتاعنا قطع صغير ونسيح قطعه زبده ونرشها عليه كله بحيث انه يغلف قطع العيش دى وندخلها الفرن تتحمص عشان يقرمش كده ويبقى جميل
وده شكل العيش بعد ماخرج من الفرن
بزود العيش من الشوربه بتاعتنا وتكون سخنه ومعلقه صلصله الفته ونقلبهم كوس ونغطى عليها لغايه مالعيش يطرى
نحضر بقا الصلصه بتاعتنا
بجيب زيت وتوم مفروم واشوحه شويه لغايه مالونه يبتدى يبقى جولد كده وبعدين انزل عليه بمعلقه خل واحده بس عشان ميبقاش طعمه لازع
واللى بيحب الخل يحط معلقتين عادى
وبعدين بنزل بالطماطم بتاعتنا وبحط التوابل بتاعتى ملح وفلفل وكمون واسيبها تتسبك شويه وبعدين اطفى عليها
باخد معلقتين من الصلصه دى واحطهم ع اللحمه بتاعتى (دى خطوه اختيارى ) واقلبهم ع بعض كويس عشان اللحمه ميبقاش طعمها مسلوق بس فى ناس بتحب تحمرها يعنى انتى زى ماتحبى
نحضر بقا طبق الفته بتاعنا
بحط اول طبقه الرز الابيض
وبعدين بحط العيش فى النص وبعدين نحط طبقه رز كمان بحيث نغطى العيش بتاعنا ونرش عليها الصلصه اللى عملناها بشكل عشوائى ونرص معاها قطع اللحمه
وهنشوف شكلها النهائى فى الصور اللى جايه
وده شكلها النهائى مواضيع هذا القسم برعاية
angelsmile2311 angelsmile2311 963758_5.gif فتكات رائعة Fatakat 963758 my home – egypt
