ازيكم ياحلويين وحشتونى كتير بقالى كتير لا دخلت ولا عملت مواضيع قلت ارجعلكم بحاجه حلوه انا عن نفسى بحبها جدا وعلطول بطلبها لما بروح اى مطعم لانى كنت فاكره انى مش هعرف اعملها زى بره بس الحمد لله عملتها وطلعت احلى من بره كمان بشهاده جوزى يلا بقى بلاش رغى كتير ونسمى الله ونبدا احلى شوربه مشروم بالكريمه ولا اروع من كده
المقادير بتاعتنا مشروم فريش حوالى 250 جرام
نص كوب كريمه طبخ
نص كوب دقيق ونص كوب سمن وزيت ذره
كوب لبن وبصله متوسطه وفصين توم ومعلقتين كبار كرفس اخضر متقطع صغير جدا ومكعب مرقه
اول حاجه قطعت المشروم قطع صغيره وبشرت البصله والتوم ناعم قوى
جبت حله وحطيت فيهامعلقه زيت وقلبت البصل والتوم بس لحد مايصفروا بلاش يحمروا عشان الشوربه متغمقش وننزل عليهم بالمشروم وبسرعه جدا نقلب برده عشان المشروم ميتحرقش والشوربه تغمق زى كده
ونضيف عليهم لتر مرقه ونغطى ونسيبهم يغلو وعلى مايغلى نجيب طاسه ونقلب فيها الدقيق والسمن بسرعه لجد مايبقى ليهم قوام متماسك لا تقيل ولا خفيف كده
واول ماالشوربه غليت نزلت واحده واحده على الشوربه بيهم وبمضرب سلك وبسرعه جدا جدا قلبت عشان متكلكعش وطبعا معرفتش اصور الخطوه دى عشان ايد كانت ماسكه الطاسه اللى فيها الدقيق والسمن والتانيه بتقلب بسرعه وقلبت بسرعه لحد مابقت كده
بعد كده نزلت عليهم بنص كوبايه الكريمه وكوب اللبن وظبطت الملح والفلفل بس خلى بالك فيه مكعب مرقه والكريمه بتكون فيها ملح يعنى متحطيش ملح كتير واخر خطوه بقى حطيت الكرفس اخد غلوه بسيطه هالص وطفيت وكده تبقى الشوربه خلصت وبقت تمام اهم حاجه تكون مضبوطه لا خفيفه ولا تقيله وعشان كده حطيت الدقيق يعلمها قوام حلو
وده احلى طبق شوربه مشروم بجد كان طعمها جميل ما شاء الله وعجبت جوزى جدا
ودلوقتى بقى ليا عندكم طلب بسيط جدا دعوه صغيره بصلاح الحال وسعه الرزق والهدايه لزوجى واولادى وان ربنا يباركلى فيهم ويجعلهم من حفظه القران الكريم ومن جنود الله على الارض
مواضيع هذا القسم برعاية
ام على 1 ام على 1 434149_3.gif سوبر فتكات Fatakat 434149 القاهره – مصر
