السلام عليكم ورحمة الله وبركاته
حبايب قلبى القمرات
وحشتووووووووووووووووووووووووووووووووووووووووووووون ى بقالى كام يوم مفتحتش
اخر موضوع عملته كنت طالبة منكوا تدعولى انى اعمل عملية الليزك يوم الخميس الى فات وان سمك القرنية يطلع مناسب
والحمد لله عملتها بجد ربنا يخليكم ليا يا أحلى اخوات فى الدنيا
وجاية بقى أحكيلكم تجربتى عشان لو فتوكة عاوزة تعملها ومحتارة تتوكل على الله وتدعيلى
أنا رحت يوم الخميس كررت الفحص بتاع سمك القرنية واول مالدكتورة قالتلى خلاص هاتعمليها
والله قعدت اتنطط من الفرحة والناس عمالة تبص عالهبلة الى بتنط دى
وصحيح كان فى حاجة سألتهالها لانى عملت سيرش على فتكات قبل ماقرر موضوع العملية وشفت ناس بتقول ان الى بتعمل ليزك مش بتولد طبيعى فيما بعد
فسألتها وزى ماتوقعت قالتلى لا طبعاً مين الى قالك كده
قالتلى ملهمش علاقة ببعض دول بيعملوها ويروحوا يولدوا طبيعى بعدها باسبوع فطلعت اوشاعة الحمد لله
المهم اول ماقالتلى هاتعمليها دخلت مع الممرضة لبست لبس العمليات على هدومى
كنت قلقانة اوى ليقولولى اقلعى ويلبسونى البتاع الى مفتوح من ورا ده كانت هاتبقى فضايح
والله كنت هقولهم مش عاوزة اعملها وهمشى
أه ده كله الا هدومى
مقلعتش حاجة خالص لا الشوز ولا الطرحة ولا حاجة لبست بقى اللبس وبونيه على الطرحة وكيسين على الشوز
ودخلت اوضة العمليات
مش اوضة عمليات زى مانتوا متخيلين هى اوضة عادية جدا وفها جهاز بسيط كده وبس
دخلت لقيت الدكتورة بتاعتى ومعاها واحد وواحدة معرفش ممرضين ولا دكاترة ولا ايه
مسحولى على العين وهى مقفولة وعلى المنطقة الى حواليها ببيتادين وغرقولى الطرحة من الجنب ولاد التيت
وفتحت عينى حطيتلى فيها قطرة تقريباً قطرة البنج
واستنت دقيقة كده
وبعدين غطت العين الشمال وقالتلى افتحى عينك
حطتلى زى لزق كده على الرموش فوق وتحت
وبعدين حطت حاجة كده بتفتح العين عشان ماتبربشيش ولا حاجة
وبعدين جابت حاجة كده حطيتها على العين
مش عارفة اسمها بس لو تحبوا شوفوها عاليوتيوب اكتبوا عملية الليزك هتلاقوها بالتفصيل
بس نصيحة لو هاتعملى العملية اوعى تشوفى الفيديو لانك هاتقلقى عالفاضى وهى والله قمة فى البساطة
المهم ظبطت بقى الجهاز
وقالتلى عاوزاكى تركزى على الضوء الأخضر ده وماتتحركيش خالص
انتى بتلاقى نور اخضر وحواليه انوار حمرا كده
المهم بصيت عليه وقعدت استغفر ربنا فى سرى وبتسمعى صوت زن كده اول مالجهاز يشتغل ولما بيشتغل الليزر على عينك بتشمى ريحة شياط كل ده عادى
انا لولا انى قريت كل ده على فتكات قبل ماروح كان زمانى قلبى وقف من الخوف
بس انا رايحة وانا عارفة هاتعمل ايه وشفت العملية عاليوتيوب للأسف
الله يخربيت الفضول وسنينه وطبعاً خفت شوية
بس الحمد لله يعنى طلعت بسيطة اوى
والعملية دى كلها البص على الضوء والليزر والزنة والشياط مبيكملش 5 ثوانى
وخلاص على كده وحطتلى عدسة زى عدسة النظر
وخلصت العين اليمين الحمد لله
غطتها واشتغلت بقى على العين الشمال زى اليمين بالظبط
وخلصت وقالتلى مبروك خلاص خلصنا وكله تمام
المهم قمت من عالسرير ببص كده لقيتنى شيفاها وشايفة الاتنين الى معاها
وانا بعيد عنكوا كنت شيش بيش وكنت داخلة الاوضة شايفة اشباح مش بشر
طبعاً فرحت جدا وحمدت ربنا أوى
وخرجت شايفة كل حاجة بس فى شبورة كده
خرجت برا لماما ونانا قعدوا يبصولى كده مزبهلين لان طبعاً العين بتكون فيها نقط حمرا وكان فى حاجة كده زرقا ده عادى يعنى من العملية
وماما بتقولى الحمد لله ماكملتيش عشر دقايق
قعدت بقى لحد مالدكتورة جات
وبعدين قعدت على جهاز فيه ضوء قوى كده عشان تبص على عينى
فقالتلى تمام الحمد لله
وادتنى 3 قطرات كده تعقيم وترطيب بيتحطوا 4 مرات فى اليوم
وقالتلى اروحلها يوم السبت تشوفنى وتشيل العدسات وقالتلى انى عادى انام بيها واحط القطرات وانا لابساها
وقالتلى بقى التعليمات الى بعد العملية الى تكاد تكون اهم من العملية نفسها بس مع الاهتمام الحمد لله مش بيكون فى مشاكل
اولا بالنسبة للشمس قالتلى عادى لو معاكى نضارة البسيها لو مش معاكى خلاص
وممنوع اجيب اى ميا نهائى على عينى اول اسبوعين
ممنوع انام على بطنى اول يوم بس
ممنووووووووووع دعك العين اول اسبوعين
ممنوع ماكياج داخل العين اول اسبوعين تلاتة
وطبعا اخد القطرات بانتظام
وقالتلى ان الشبورة دى طبيعى وهاتروح بعد ماقلع العدسات
ومشيت على كلامها الحمد لله
وروحتلها يوم السبت شالت العدسات والشبورة راحت الحمد لله بس فى زغللة
قالتلى هتقل فى خلال اسبوعين لحد ماتروح خالص ماتقلقيش
وكشفت نظر وكله تمام الحمد لله
وقالتلى اكمل التعليمات
واتفرج عالتليفزيون عادى والكمبيوتر عادى بس وقت بسيط وعلى اخر الاسبوع اقعد براحتى بس كل ساعتين اريح كده نص ساعة وارجعله تانى
والقطرات امشى عليها الاسبوع ده بس
والقطرة بتاعة ترطيب العين اكمل عليها شهر
ودى بالنسبالى اهمهم لانك بتحسى اول ماتصحى من النوم ان العين ناشفة جدا
لكن اول ماتحطى القطرة خلاص فى ثانية بتبقى طبيعية
معلش رغيت كتير بس حبيت احكيلكم بالتفصيل الممل
واى فتوكة بتفكر تعملها ومحتارة بقولها توكلى على الله واعمليها والله راحة نفسية فظيييييييييييييييعة
وسيبك بقى من النضارات واللينسيز والقرف ده والله حاجة تحفة
بدون اى الم نهائى
كفاية انى هصحى من النوم ابص فى المرابة اشوفنى ماشوفش شبح
وأخيراً ادعولى بقى الزغللة دى تروح خالص
هى بحس بيها بس لما ببص على كلام صغير مثلا الكلام الى بيكون فى الشريط من تحت فى التليفزيون او كده
انما غير كده مش بحس بيها
وأه نسيت اقولكم انك بتشوفى زى ماكنتى بالنضارة بالظبطططططططط
يعنى لو بالنضارة كنتى بتجيبى 6/6 هاتبقى كده بعد العملية
والنظر مش بيقل بالتدريج دى برضو اشاعة قالتلى بعد سن الاربعين هاتحتاجى نضارة قراية وبس
وان اى حد بيحصله خلاف الحاجات دى بيكون اهمل فى التعليمات الى بعد العملية او الدكتور الى عملهاله معملهاش مظبوط
يارب اكون أفدتكم يا قمرات
وربنا يخليكم ليا على وقفتكم جمبى ودعائكم ليا يا أحلى فتوكات
اموااااااااااااااااااااااااه
وكل سنة وانتوا طيبين وعيد سعيد عليكم جميعاً يارب
فى حفظ الله يا حبايب قلبى
ريلاكس* ريلاكس* 339062_24.gif ملكة فتكات Fatakat 339062 المنصورة – مصر
