مش عارفة ليه الفريك ده منسى ومظلوم ليه مع انه صحى ومفيد جدا
انتم الاول عارفين ايه هو الفريك
الفريك ده قمح اخضر يعنى موصلش لمرحلة السوى الكامل وبيبقى مقشور زى الفول المدشوش كده
المهم ممكن الفريك يتعمل لحشو الفراخ والحمام وكده بس انا النهاردة عاملاه برام بالصلصة وطعمه جميل اوى
اول مرة جربته كنت بدات الاكل الصحى وباحاول اتخلص من حبى للمكرونة هههههههههههههه فبقيت باعمل فريك بالصلصة بدل المكرونة بالصلصة وطعمه الذ كتييييييييييييييييير من انه يتحشى بيه الطيور وخلاص
المقادير
نص ك فريك
طماطماية كبيرة
بصلة كبيرة
معلقة اكل صلصة
شوربة
توابل
ملح فلفل
بهار مشكل
الطريقة
انا باحب انقع كل انواع البقول علشان كده صحى اكتر
ننقع الفريك على الاقل ساعتين
نغسله كويس
نحط مية فى حلة كبيرة لانه بيتضاعف كتييييييييييييييييييير اوى ونغلى المية وبعدين نحط الفريك ونغطى الحلة ونطفى النار وسيبيه ساعتين تلاتة او على قد ما تقدرى يبقى احسن
تفتحى الحلة وتقولى ما شاء الله هتلاقيه تضاعف اوى جدا خالص كده
تصفيه وتغسليه فى مصفاة زى المكرونة بالظبط
نيجى بقى للصوص بتاعه
زى الخضار العادى نبدا باننا ندبل البصلة على النار بس انا مش باحب احط ولا نقطة زيت ولا سمن على اد ما اقدر فنعمل ايه نعمل ايه
نجيب المفرمة الحلوة دى
ونحط جواها البصلة والطماطماية ونشغل هيبقو عصير تقيل
حطيه على النار
ومعاه ملح وفلفل وبهار وسيبيه يتسبك والبصلة تدبل
هتقولولى مش هتدبل لا بقى هتدبل هههههههههههههههههه على اما الطماطم تنزل ميتها والبصلة تتشربها هتبقى بالظبط زى ما تكون متشوحة ومقلية بزيت او سمنة والبهارات هتدى طعم لتعويض غياب الدهن
لما تدبل البصلة حطى الشوربة على اد الكمية ومعلقة الصلصة وسيبيها تغلى وتتسبك شوية بس مش اوى
هى كده مش خفيفة اصلى جربت مرة وعملتلها صلصة تقيلة زى بتاعت المكرونة بقت حامية اوى وجربت اقلل لقيت كده الطعم احسن كتير
لما تتسبك اظبطى الملح والتوابل وراعى انها تبقى حادقة سنة زيادة علشان لما تتوزع على الفريك يبقى حدقه مظبوط
بعد كده تخلطى الفريك بالصوص وتحطيه فى البرام زى الشاطرة وتدخليه الفرن على الشواية بس لان كل المكونات اصلا مستوية بس عاوزين الوش يتحمر شوية
دول برامين الكبير لية والصغيور لمامتى حبيبتى علشان هى بتحبه وبتكسل تعمله
مش باقولكم الفريك ده منسى ومظلوم
ولما يفضل شوية احفظيهم فى كيس وعلى الفريزر ينفعو مرة تانية ان شاء الله
متنسوش التقييم ودعوة حلوة لمامتى حبيبتى بالشفا والصحة ان شاء الله
اشوفكم فى العدد القادم من صحى ومفيد
مواضيع هذا القسم برعاية
همسة بس دوشة همسة بس دوشة 467531_12.gif فتكات غالية قوي Fatakat 467531 بورسعيد – مصر
