السلام عليكم
يا احلى فتوكات يا حلوين وحشتونى اوى اوى بقالى كتير من ساعة لما رجعت من الحج منزلتش مواضيع جديدة
عقبالكو جميعا يارب
المهم اقولكو بقة جبت شوية سمان يجننو يستاهلو بق احسن الفتوكات الحلوين وجوزى طلب منى اعملهموملو محشين فريك مكدبتش خبر وعملتهم وطلعو يجننو
بسم الله ماشاء الله
يلا اسيبكو مع الشرح والصور من مطبخى
اولا المقادير
السمان طبعا
وانا عايرت الفريك لكل سمانه معلقة كبيرة يعنى ست معالق فريك منقوعين ربع ساعة
وبصلة وسط مبشورة
والبهارات بقة ملح وفلفل وزعتر وروزمارى وهيل مطحون وبهارات لحمة منوعة بكميات معقولة معلقة كبيرة من كل حاجة بس متبقاش مليانة اوى
وقوانص فراخ انا جبت قوانص علشن قدمت مع السمان طاجن رز برام بالقوانص واخدت ست سبع حبات قوانص وقطعتهم علشان احطهم على الفريك واحشي بيهم السمان برضه
ماشي ودى المقادير
ثانى حاجة بقة
تحطى شوية زيت ف الطاسة وتشوحى البصلة زبعدين تحطى على البصلة الفريك والقوانص متقطعة صغيرة طبعا واليهارات كلها وتقلبيها شوية مش كتير علشان لسه حتتسلق مع السمان طبعا
ماشي كده تالت حاجة بقة نطلع الحشو ده ونبتدى نحشي السمان بقة وبعد لما تخلصي الحشو كله جو السمان تقفليه كويس كده تكتفيه علشان ميطرش بقة والحشو اللى فيه ميقعش ف الشوربة وانا كتفته ب خلل السنان كده
وبعد لما تكتفيهم كده خلاص تحطى بقة الحلة على النار وتمليها ماء وتحطى فيها بصلة صغيرة وشوية ملح وفص مستكة
ولما تغلى اسقطى فيها السمان بقة وغطيه وسيبيه على نار هادية لغاية لما يطيب ان شاء الله وبعد لما يطيب افتحى الحلة عليه خمس دقايق بس
وبعد كده تنشليها من الشوربة وتسيبيها تهدى بقة شوية
وبعد لما تهدى بقة شوية تحطيها عالنار ف الزيت تحمريها كويس من كل الجوانب وبعدين تفتحى الشواية على نار هادية جدا وتحطيها خمس دقايق تحت الشواية ولما تطلعيها انشلي منها خلل السنان بالراحة علشان متتفكش منك
وانا قدمت معاها رز برام بالقوانص والشقطة والسمنة البلدى ملحقتش اصورهولكو ان شاء الله اصوره المرة الجاية
وبالف هنا وشفا يارب وده منظرها النهائي بسم الله ما شاء الله
ايه رايكو اعملوها ومش حتندمو طلعت تحفة ماشاءالله
يارب تعجبكو ومتنسوش التقييم
وكل فتوكة تشوف موضوعى وتدعيلي دعوة حلوة ربنا يخليلي جوزى وابنى يارب ويهديلي حماتى اللهم امين
واخر كلامى لا اله الا الله سيدنا محمد رسول الله عليه افضل الصلاة والسلام مواضيع هذا القسم برعاية
ام بدورة ام بدورة images/avatars/diceroll.jpg فتكات رائعة Fatakat 279062 الكويت – الكويت
