ازيكم يا بناااااااااات ده ريجيم المرضعات الرهيب الى وعدتكم بيه فى قسم الحمل والحوامل واتاخرت فى نقله ليكم بسبب سفري لمصر وابني حبيبي الى دايما شاغلنى عنكم اهو نام قلت اكتبلكم فوراااا اولا دي صورة الريجيمات الى عملتها معاها الورق ده كله بتاعي للريجيم الى بداته كنت 98 تقريبا ودلوقت ولله الحمد بقيت 78 عقباااااااااالكم وده الحمد لله فى شهرين ونص وبكل الصحه والخفه والرياضه
هكتب ريجيم اول اسبوع وهكتب سلسله الريجيم الى بيبدأ ب 1500كالوري بالتدريج لحد دلوقت انا باخد بس 1000 كالوري وده سر نجاحها هي غاليه صحيح بس مشهووووورة اوووووى كل جده بتروح عندها و7 من صحباتي بيخسوا معاها بس مش هقول اسمها منعا للدعايه فى الخاص وبس
هبتدي بسم الله الرحمن الرحيم يارب يرزقكم الهمه وانا معاكم لان لازم اوصل 60 كيلو ياااااااااااااااااااارب يا مهون وتقدر اى وحده غير المرضعه برضه تعمله
الافطار : 300 سعر حرارى
– 3 معالق من الجبنه القريش +حلقات من الطماطم والخيار +نصف خبز ( عيش سن )+ 5 حبات زيتون صغيرة الحجم
او
-شريحه من الجبن الكرافت قليله الدسم (30 جرام) + حلقات من الطماطم والخيار + 5 حبات زيتون صغيرة الحجم
او
-بيضه مسلوقه + نصف خبز بر +حلقات طماطم وخيار + 5 حبات زيتون صغيرة الحجم
او
– ملعقه طعام ممسوحه من اللبنه قليله الدسم + 2 شريحه توست اسمر + حلقات من الخيار + 5 حبات زيتون صغيرة
بعد الافطار بساعتين : 250 كالوي ( سعر حرارى )
– 3 شرائح من الشابورة الخاصه بالحميه + كوب حليب قليل الدسم
او
– 3 حبات تمر صغيرة + كوب لبن رايب قليل الدسم
الغداء : 500 سعر حرارى
– طبق سلطة مشكل مع التقليل من الجزر والبنجر واضافه القليل من الملح وملعقه صغيرة زيت زيتون + ربع كيلو من الدجاج المسلوق او المشوي او المطهى فى الفرن بدون جلد (250) جرام + كبشتين غرف من شوربه الخضار المطهيه بدون دهون وبدون لحم مع التقليل من البازلاء والجزر والابتعاد عن البطاطس + 6 ملاعق رز مطهي بدون زيت
او
– طبق متوسط سلطه باذنجان مشوي مضاف اليه الطماطم والبهارات المرغوبه مضاف اليه معلقه صغيرة زيت زيتون + ربع كيلو من السمك المشوي + كبشتين من شوربه البصل او شوربه الطماطم بدون زيت + 6 معالق رز من غير زيت
او
– طبق سلطه مشكل + شريحه لحم ستيك مشوي + كبشتين غرف من شوربه خضار من غير زيت + 6 معالق رز من غير زيت
او
– طبق سلطه متوسط مع سلطه باذنجان مشوي ( بابا غنوج)+ 13 حبه جمبري ( ربيان) مشوي او مسلوق + 6 معالق رز
ملحوظه: يمكن استبدال الرز ب 6 ملاعق معكرونه مطهيه بالصلصه بدون دهون او تلت ارباع عيش بلدي او سن
بعد الغداء بساعتين : 200 كالوري
– كوب عصير برتقال طازج
العشاء : 200 كالوري
– شكشوكه عباره عن بيضه واحده ويضاف اليها الطماطم والبصل والفلفل الاخضر + نصف خبر اسمر
او
– كوب من الزبادي قليل الدسم + 2 شريحه توست اسمر +حلقات من الخيار
او
– طبق سلطه بدون زيت + نص علبه تونه من غير زيت واضافه خل وليمون + نصف خبز اسمر
او
– ملعقتين من الجبن القريش + نص خبز اسمر + حلقات طماطم وخيار
او
ملعقتين من الفول بالطماطم والتوابل ومعلقه زيت زتون + نص خبز اسمر
او
شريحه لانشون او مورتديلا او تركي + 2 شريحه توست اسمر + حلقات طماطم وخيار
ملاحظات مكمله للرجيم :
– تقدري بين الوجبات تاخدى اى نوع من الفواكه دي هي تعادل 50 كالوري فقط
حبه كمثرى
شريحه اناناس
حبه استفندي
تفاحه
حبتين كيور
شريحه من البطيخ متوسطه
شريحه شمام
9 حبات فراوله
برتقاله
حبه تين
– مهم اووووووي تشربي ميه كتير عشان تنزل الدهون والسموم من جسمك سواء با البول او العرق لانك بتعملى ريجيم وبتتخلصى من دهون غير مرغوب فيها
– هتاكلى زي ماتحبي اى نوع من الورقيات خس او جرجير او خيار برضه وده للشعور بالشبع وعشان تتجنبي الامساك دكتورتي كانت قيلالى اول ماتحسي بجوع جري عالتلاجه هاتي خس وكليه وفعلا كان بيختفى الجوع
_ قالتلى الفجل الاحمر ممتاااااااااااااااز لتخسيس الكرش ومدر للبن جدا بحكم اني برضع والفجل الابيض بيخسس الاوراك الله يكرمها يارب بجد مبقتش بقطعهم ابدا وميزة الفجل الاحمر مخلى وشي على طول موردن لدرجه جوزي بيقلى فى مره بتستهبلى حاطه كل البلاشير ده وانت خارجه خشي اغسليه ضحكت وقلتلتها والله ابدا ده الفجل قلى من هذا اليوم يمنع شراء الفجل وضحكنا ههههههههههه
– مسموح اى شيء سخن شاى وقهوة ونعناع يا بدون سكر يا اما بسكر دايت زي ده
– ممنووووووووع المكسرات
– المشي كل يوم ساعه وعالاقل نص ساعه قلتلتها عندي عجله بلاش المشي قالتلى لاء غلط العجله بتعرض الاوراك مش بتخسسهم لازم تمشى الاول وبعدين تحسني شكلهم با العجله ومش مسموح قبل 3 شهور اديني بقلك انتي حره
– تمارين البطن مهمه اووووووووووي عشان الى هتنزليه هيخليها مرهرطه
– شدي بطنك لجوه طول ما انتى بتشتغلى بيعودها تبقى مشدوده
– لما تحسي بجوع اشربي كاسه ميه لانه بيبقى شعور بالجوع كاذب وبتبقى عطشانه
– سالتها انا بحط رده عالزبادي عادي قالتلى ممتاز دي بتاخد سعرات حراريه فى هضمها وبتخسس منطقه الكرش جدا
– لو حابه تاكلى لبان يبقى من غير سكر فيه ناس بيجوعهم ويهضم الاكل بس انا كان بيشغل بقى المفجوع هههههههه
– اهم ملاحظه واخطرها ممنوع منعا باتا قياس وزنك كل يوم انا كانت قيلالى كل سبت وكنت فعلا بخس فى الاسبوع بال 3 كيلو لكن فى اسبوع اتوترت ووزنت نفسي كل شويه رحتلها خاسه نص كيلو بس بجد ده عامل مهم اووووووووووي يابنات
– للمرضعات اشربي شمر مغلى او يانسون او حلبه مغليه فى ميه مش فى عسل اسود وممنوع المغات الا لو كان من غير سمنه وكان طعمه وحش اووي وكلى فجل كتير بيدر اللبن
الى استفدته من هذا الرجيم العظيم
انا نفسيا كنت متدمره لانى فى حملى كنت 105 كيلو بس لما ولدت بقيت 98
بلبس مقاس ميديوم من اكس لارج وبعشق الشوبينج دلوقت
وشي بقى منور وصافى من كتر الخضار والفاكهه وشرب الحليب
شعري ولله الحمد سقوطه خف شويه طبعا ده عادي عشان برضع بس اهو نص العمى
جوزي بقى مبسوط وفرحان
ضهري وجعه بيقل وركبي مبقتش بتزيق ههههههههه
حركتي اخف وحاسه برشاقه
شكلى بان اصغر من سني كمان
بقيت بحب الحياه والخروج والفسح
ثقتى فى نفسي زادت
اهم حاجه بقيت بلبس فى 10 دقايق بس مش بلبس واقلع واغير واعيط فى الاخر نظام مجانين هههههههههه
بفكر اشتري بدله رقص وارقص لجوزي هههههه منا واثقه فى نفسي بقى هههههههه ده سر
ووزني ده مع المشي وتمارين البطن بقيت موزة غير صحبتي وصلت 70 بس الى يشوفها يقول اتخن مني لانها بتكره الرياضه جداااااااا ومش بتمارسها ساعات تشك ان انا 65 كيلو
عودت جوزي ياكل اكل صحي زيي بدل ما اطبخله بسمنه وانا بزيت بقى بيمشى معايا ومارس الرياضه واشتري حديد واوزان وبيبطل السجاير ولله الحمد
انا كده خلصت وتعبت اووووووووووووي والله فى كتابه الدايت ويارب اقدر كل جمعه اكتبلكم الاسبوع الجديد ادعولى افضى واكتبه عشان نفسي ارسم البسمه على وش اى ست محتاجه الدايت وعايزة دعوه حلوة منكم اكمل الى بداته شكرا حبايبي
ودلوقت حالا ابني صحي هييييييييييه بوسه كبيره له ياجماعه هههههه
نسيت اهم حاجه فيه فتوكه فكرتني
ليكي يوم فى الاسبوع وجبه غدا فري ونوع حلو ممكن حته كاتو او كنافه ولو مخدتوهاش كل اسبوع وزنك مش هينزل متعملوش زى ماعملت ومنزلش وبقيت مش بقطعها لانها بتحسس الجسم انه مش فى مجاعه فا ميخزنش الاكل ويخس
وطبعا فيه منكم الى بتقول دي بتهجص علينا مغتربه ايه الى ليها بال 7 صحبات انا مولوده هنا فى السعوديه ومدرستي هنا ودول صحبات الابتدائي لحد الثانوي واتجوزت وخلفت هنا برضه للتوضيح بس عشان فيه تعليقات بس مش هتبقى لذيذه
Madam koko Madam koko 658931_9.gif سوبر فتكات Fatakat 658931 بلاد الفرنجة – السعوديه
سبحان الله و بحمده