السلام عليكم
اختكم تناديكم :انا لسة جاية حالا من برة.. ايوة من برة.. صياعة فية مانع؟؟
لسة حالا راجعة من شقتى بتاعة الجواز كنا فى نقل العفش الحمد لله و على فكرة شقتى قريبة اوى الحمد لله من شقة ماما هنا يعنى الفرق كام شارع بس
انا عاملة الموضوع دة عشان كل العرايس اللى هينقلوا عفشهم لسة يجى يسمعوا حكايات الف ليلة و ليلة مع العفش او العرايس اللى نقلوا عفشهم خلاص و عندهم حكايات الف ليلة و ليلة اللى عايزين نسمعها
انا هحكيلكم اللى حصل معايا
و كل واحدة فيكم تحكى اللى حصل معاها سواء الموضوع عدى بسلام و لا كان فية شوية صدمات و مشاكل
كان يا ما كان كلمت خالتى قبل الفطار و صدمتنى ان قليوب فيها ضرب نار و مشاكل و قلق
و انا عفشى اصلا جاى من طنان.. حاولت ادارى عن الموضوع و اقولها لا يا خالتو دة طنان قبل قليوب دية قريبة من شبرا فقالتلى ان المشاكل من اول شبرا لحد قليوب..
انا طبعا شعرى وقف من الخضة.. روحت صحيت خطيبى من النوم بالموبايل و راح اتصل بالنجار و الحمد لله طمنوهم و قاللهم ان المشاكل خلاص خلصت و الدنيا هديت دلوقتى
.. و انا عمالة اقول فى نفسى يعنى خلاص ايام ربنا كتير مجاش غير اليوم اللى هننقل فية العفش يحصل ضرب نار و قلق فى المنطقة اللى العربية هتعدى فيها؟؟
انا روحت الشقة من الساعة 8 و نص بعد الفطار و العفش جة الساعة 12 هههههههههههههههههه
بس كنت بتفرج بردة و بتسلى و انا قاعدة و بقزقز .. كان الكهربائى بيركب النجف و السباك بيركب الخلاطات
المهم فضلنا قاعدين لحد الساعة 12 و الحمد لله وصل العفش بالسلامة
الحاجات بقى عمالة تطلع حاجة حاجة لحد ما جزء من المطبخ طلع انا اذبهليت و دية كانت الصدمة الاولى و سكت خالص منطقتش و عملت نفسى مش هنا
خطيبى اول ما شاف المطبخ سأل اية دة؟؟
قالولة المطبخ
خطيبى بصلى كدة و برق و انا يا عينى مش عارفة انطق معنديش حاجة اقولها
احنا كنا مختارين لون تانى خاااااااااااااالص
المطبخ بتاعى خشب و كنت مختارة لون بنى بس مش محروق لا بنى فاتح كدة و فية تجزيعة الخشب
لقينا المطبخ دة بنى محروق و مفهوش التجزيعة.. و انا بكرة البنى المحروق
احنا لما نقينا اللون انا نقيتة انا و خطيبى فى الكتالوج و بعدين ادى الكتالوج للنجار و بعد فترة وصفلة الصفحة اللى فيها اللون
تقريبا يا اما خطيبى وصفلة غلط يا اما النجار طلع صفحة تانية
بس المهم ان كانت النتيجة ان المطبخ بتاعى طلع لون تانى خالص
.. بعد الموقف دة خطيبى يا عينى فضل مصدوم و لسة مصدوم لحد دلوقتى
لانى طول الوقت من اول ما اختارنا العفش و انا اقولة انت ممكن تعك فى اى حاجة فى العفش الا المطبخ
كل شوية اقولة الا المطبخ
الا المطبخ
و اهو المطبخ الوحيد اللى طلع فية حاجة مش على مزاجنا
المهم الحاجة طلعت حاجة حاجة و بعدين الكهربائى لما شاف الدنيا كدة اتلكك و قال مش عارف اشتغل و لم حاجتة و مشى و قال اية الدنيا زحمة..
انا روحت قلتلة حضرتك ممكن تركب شفاط المطبخ مفيش حد فى المطبخ و الدنيا رايقة فية و محدش هيدخلك
قالى لا انا مش هعرف اشتغل فى الجو الزحمة دة..
و انا بقى متغاظة جدا لانة اصلا مش عايز يكمل شغل عشان تعب بس و الله لو كان قال كفاية شغل كدة النهاردة عشان تعبت كنت هعذرة و هقدر و خصوصا انة شغال من 8 لحد الساعة 1 و نص
انما انة يعمل حجتة الناس و الدوشة فأنا مش بحب كدة مبحبش الاونطة و الكدب و الكلام الفارغ كأنة بيقرطسنى يعنى
المهم طلع بقى الانترية و دية كانت الصدمة التانية
ان الانترية اتعملت الرجل بتاعتة المعدن دية اللى طالعة جديد و احنا اصلا متفقناش على كدة و كنا متفقين ان الرجل تبقى خشب عشان الرجل المعدن دية شفناها كتير اوى قبل كدة و كل اللى شفناهم كانت الرجل مكسورة و متركب غيرها
خطيبى بقى بدأت علامات الضيق تظهر علية و مكنش طايق حد و عامل كدة طول الوقت بس من سكات
انا روحت قلتلة معلش و اية يعنى المطبخ بنى محروق. ما هو حلو بردة.. راح قالى لا انتى كنتى دايا تقولى كلة الا المطبخ اقوم اعملك كدة فى المطبخ؟؟
قلتلة مفيش مشكلة اللون حلو بردة مش احسن ما كان القلق اللى فى قليوب دة كان طلع ناس على العربية كسروا العفش و لا حاجة و لا حد اضرب بالنار؟؟
قالى طب و الانترية.. قلتلة معلش اسأل النجار ان كان ممكن يعدلها و يعمل الكراسى الرجل خشب و لا لاء
و لو منفعش نحاول نحافظ على الرجل و امرنا لله مجراش حاجة و كدة كدة احنا متفقين ان الانترية يتغير كل فترة 5 او 6 سنين كدة ان شاء الله عشان التجديد يعنى
المهم دخلنا بقى فى تركيب اوضة النوم و الحمد لله اوضة النوم كانت حلوة اوى ما شاء الله الله اكبر و كانت معمولة زى ما احنا عايزين الحمد لله
و الساعة جت 2 و نص الفجر و خطيبى قالى يلا بقى اوصلك قلتلة لا انا عايزة اقعد اتفرج قالى لا روحى بقى اتسحرى و كدة كدة احنا قدامنا ل 7 الصبح كدة على ما نكمل تقفيل و تركيب فى الحاجات
روحت بقى و انا كل اللى مضايقنى ان خطيبى متضايق يا عينى و فاكر انى متضايقة
بس انا و الله ما متضايقة
انا منكرش ان كان نفسى المطبخ يكون لونة زى ما انا عايزة و انى كنت عايزة رجول الانترية مختلفة
بس بردة انا ماشية بمبدأ ان الحمد لله انها جت على كدة
و ان كان ممكن يحصل اسوء من كدة مليون مرة لو كان العفش جرالة حاجة فى السكة من القلق دة و لا كان صاحب خطيبى و الرجالة جرالهم حاجة فى ضرب النار.. لان خطيبى اصلا عامل العفش عمولة عند قرايب صاحبة دة فى طنان
و ياما سمعت ان عروسة فرشت شقتها و جابت العفش و بعدين المية مش عارفة حصلها اية فى الشقة و غرقت الدنيا و الحاجة باظت و اقربهم اختى
و لا كان ممكن مثلا العفش يكون مقاسة كبير على المكان و احنا معرفناش ناخد المقاس صح زى ما بيحصل كتير مع العرايس و اقربهم بنت خالتى اللى طلع عفش شقتها كلة كبير على المكان
الحمد لله انها جت فى حاجات بسيطة هينة
يلا بقى احكولنا انتوا بقى حكاويكوا مع العفش عشان بردة باقى البنات اللى لسة بتعمل عفشها تستفيد
.. و على فكرة محدش يقولى ان دية مشكلة ان العفش يبقى عمولة مش جاهز
…
لا انا لسة مقتنعة ان العفش العمولة احسن مليون مرة من الجاهز
على الاقل انا عرفت اوضب الدنيا على حسب المساحة اللى عندى
مش مثلا اجيب اوضة نوم جاهزة و فى الاخر ملاقيش للكومودينو مكان و اطلعة بردة و لا مبقاش عارفة اودية فين.. زى ما بيحصل كتير
و على الاقل بردة مختارة الالوان كلها حتة حتة على ذوقى كل تنتوفة الحمد لله على ذوقنا انا و خطيبى
كل تنتوفة اتعملت عشانا احنا مخصوص مش عشان اى حد تانى
و بالتعديلات اللى انا مختاراها و بالافكار اللى انا حطاها
زى ما تقولوا كدة سايبة بصمتى
تعديل:
لسة حالا واصلنى من خطيبى خبر ان هما خلصوا و مشيوا من الشقة و ان الستارة بتاعة اوضة النوم اضطر يشيل المقبض اللى بيلم الستارة عشان التسريحة تتعلق
و انا اصلا مكنتش عايزة شكل التسريحة دية و كان فى بالى حاجة تانية خالص بس من فترة لما روحت شفت العفش و بقيت التسريحة كدة اخدت الصدمة ساعتها و خلاص و بصراحة انا اللى كنت غلطانة لانى لقيت لما راجعت كلامى اللى قلتهولهم على التسريحة لقيت ان هما فعلا ليهم حق يعملوا التسريحة كدة عشان انا معرفتش اوضحلهم اللى انا عايزاة بالظبط
فعشان كدة التسريحة اخدت مكان اكتر من اللى كان مرسوملها فى الاول خالص
و المقبض اتشال بتاع الستارة
بس هلقالها حل ان شاء الله
متنسوش الدعوة ان ربنا يسهلنا امورنا انا و خطيبى و يتم فرحنا على خير من غير مشاكل و يوسع رزقنا
مدام راغب مدام راغب 538876_1.gif فتكات ست الكل Fatakat 538876 كل المدن – مصر
سبحان الله و بحمده
