فتوكاتى حبيباتى فى الله……..
وحشوتى خالص مالص
النهارده جهزتلكم وصفة بالصور لأول مرة.. بس إيييييييييه حاجة عظيمة شغل فنادق
بصى يا ستى انتى وهيا لكل عشاق الأكل الصينى زى حالاتنا كده…
أنا كنت دايما أروح سيتى ستارز،، فى هناك فى ركن الأكل محل أسمه باندا هاوس بيقدم أكلات صينية،
فا لما دوقت السويت أند ساور تشيكن بصراحة عجبتنى جدا ومعاها الرز البسمتى الأصفر بالخضار.
وأنا طبعا زى أى فتوكة شاطرة ( أو مجبرة ) انى لما تعجبنى أكله بره لازم احاول ادور عليها واجرب وأسأل لحد ما أوصللها :
نبدأ يا ستى انتى وهي على البركة
علشان نعمل السويت أن دساور تشيكن هنحتاج :
تقريبا 400 جرام صدور دجاج مقطعة سميك أو سليمة ( لأننا هنقطعها بعد كده )
4 شرائح أناناس + نص كوباية مية الكمبوت بتاعه
فلفل ألوان أصفر وأحمر
جزرتين صغيرتين أو متوسطين
بصلة متوسطة
مقدار بسلة ملء قبضة اليد(تقريبا 100 جرام كده)
ملعقتين كاتشاب كبيره، ملعقة صويا صوص، ملعقة عسل، 3-4 معالق خل أبيض أو بلسمك ( لكن مش خل تفاح)، 1 مرقة دجاج، ملعقة صغيرة ملح، ملعقتين نشا.
أما بقا الطريقة:
أول حاجة هنقطع الصدور الفراخ مكعبات كبيرة شوية ده طبعا بعد ما نغسلها كويس أوى بالخل والملح علشان متبقاش ريحتها زفرة، وبعدين يا حبايبى نجيب وعاء بلاستك ونحط فيه النشا ورشة ملح وفلفل صغيرة جدا وعليها معلقة خل ومعلقة كاتشاب ونحط عليهم الفراخ، بحيث إن النشا والخلطة دى تغلف الفراخ كويس زى ما فى الصورة كده
وبعدين نجيب طاسة واسعة ونحط فيها معلقتين زيت أو زبدة يكون أحلى طبعا ونحمر فيها الفراخ دى لحد ما لونها يبقى دهبى إلى بنى فاتح كده، وبعدين نطلعها فى طبق.
بعد كده يا جميلاتى نروح مقطعين الجزر بتاعنا أعواد رفيعة، والفلفل الألوان والأناناس والبصل نقطعة جوانج او مكعبات.
فى نفس الطاسة اللى حمرنا فيها الفراخ نحط معلقة زيت وناخد البصل الأول نحطه فى الزيت ونوطى النار خالص لانه مش مفروض يتحرق خالص، يادوب بس اول لما يبقى لونة شفاف نروح حطين عليه الجزر والبسلة و 3 قايق بس كمان مجرد ما يدبلو شوية نحط عليهم الأناناس والفلفل الملون، ونقلب كله مع بعضه ونسيبة دقيقتين كمان بس،
وفى الدقيقتين دول نروح نجيب طبق صغير غويط، نحط فيه نص كوباية مية الكمبوت اللى فى المقادير وعليها معلقتين الكاتشاب ومعلقتين او 3 خل ومرقة الدجاج وصوص الصويا ومعلقة العسل ونخلطهم كويس،
وبعدين نروح نحط الفراخ اللى حمرناها على الخضار اللى عالنار ونقلبهم مع بعض وننزل عليهم بالصوص اللى عملناه فى الطبق ده، ونسيبهم كمان خمس دقايق لحد ما الخضار والفراخ يتشربو الصوص، ونرش عليها معلقة نشا كمان أو دقيق ( معلقة واحدة بس) علشان الصوص ميبقاش مية أوى ويبقى قوامة غليظ شوية.
وبكدة يا حلوات نكون عملنا أحلى وأطعم سويت اند ساور تشيكن وهنقدم معاها رز بسمتى أصفر بالخضار
وده بقى سهل جدا.. هنغسل كوبايتين رز بسمتى وننقعهم فى ميه دافيه وملح، ونروح نجيب شوربة ونحط عليها ورق لورى وحبهان وشوية بسلة وجزر صغيرين ومعلقة صغيرة كركم ومعلقة صغيرة كارى و رشة خفيفة خالص شطة, ولما تغلى الشوربة نحط الرز ونسيبه يستوى.
وبكدة يا حبيباتى يكون عندنا أكلة صينى لذيذة جدا،، وده الشكل النهائى للطبق ويارب يعجبكم ومتنسوش التقييم والدعاء وهستنى ردودكم ورأيكم
بألف هنا وشفا
مواضيع هذا القسم برعاية
نونو بتحب ربنا نونو بتحب ربنا images/avatars/peppers.jpg فتكات رائعة Fatakat 769830 القاهرة – مصر
سبحان الله و بحمده
