بسم الله الرحمن الرحيم والصلاة والسلام على اشرف الخلق والمرسلين سيدنا محمد وعلى اله وصحبه اجمعين سبحان الله وبحمده سبحان الله العظيم ازيكوا يا فتوكات يا قمرات انا كنت قولتلكوا على طريقتى فى تجهيز اللحوم علشان رمضان كل سنه وانتو بخير وصحه وسلامة يارب وهقوكوا المرة دة ع الخضروات بالنسبه للملوخيه انا بغسلها الاول واسيبها تتصفى وبعد كدة بقطفها واشطفها تانى واصفيها وبعد كدة بخرطها بالمخرطة انا عندى كيتشين ماشين بس مبحسش انى عملت ملوخيه الالما بخرطها بايدى بعد كدة بحط مايه تغلى وعليها مرقة دجاج بتبقى احلى انا حطيت كوبايه مايه واحدة لاتنين كيلو ملوخيه انتى لما هتحوطيها فى المايه هتلاقيها تقيله قلبيها ويادوب تقلب معاكى اطفى عليها النار وهاتى اكياس بلاستيك وخرجى منها الهوا وحوطى على اد احتياجك وع الفريزر عدل والله لما بتيجى تطلعيها بعد كدة وتعمليها بتبقى هايله ومين شهد لى بكدة بقى حماتى قالت لى انا كنت فكراكى لسه عملاها دلوقتى مش مخزناها فجربيها وادعيلى :: بالنسه للباميه انا بقمعها واغسلها كويس وبعدين بغلى المايه ولما تغلى بعصر عليها لمونه واسقط الباميه يدوب تاخد غلوة وانشلها بمقصوصه وعلى مصفى فيها تلج واننزل من فوقيها بمايه ساقعه متلجة علشان تاخد صدمه وبتطلع لونها اخضر وفى منتهى الجمال بصفيها من المايه وارصها فى اكياس اكون مخرجه منها الهوا وهوب ع الفريزر على طول ونفس الطريقه دة بعملها مع الفاصوليا الخضراء والبسله والقلقاس لما بيكون لسه موجود المجنونة بقى قصدى القوطه بس الحمد لله هى عاقله اليومين دول هههههههههه ربنا يديم عليها نعمة العقل انا بغسلها واضربها فى الخلاط وبحطهافى برطمانات زجاج وع الفريزر وفى طريقه تانيه بعملها بتبقى جميله قوى بقطع الطماطم واحطها ف حله وعليها يا دوب ربع كوب مايه واسيبها تغلى شويه وبعد كدة بضربها واحطها فى البرطمانات وع الفريزر دة بقى مبتاخدش وقت ف التسبيك وتبقى ذى الصلصه الجاهزة واحسن كمان الفلفل والخيار انا اشتريتهم وحطتهم فى اكياس بلاستيك وششيلتهم فى الدرج بتاع الخضر بيقعدوا وقت طويل ومش بيجرى لهم حاجه الليمون بلفه ف ورقة جرنان واحطه ف كيس بلاستيك واشيلهم فى درج التلاجه اه بالنسبه لورق العنب انا بسقطه فى مايه بتغلى فيها كمون واخرجه لى المايه السقعه وبعد كدة ف كيس بلاستيك واحطه فى الفريزر وبيبقى جميل لما اطلعه واحشيه كانه لسه طازة الفواكه انا بغسلها واقطعها واحطها فى اكياس واشيلها (الفراوله -المانجو -الجوافه) بالنسبه للجوافه لما تيجى تعمليها ابقى اعصرى عليها فص ليمون وهى ف الخلاط علشان اللون وبس يارب اكون قدرت افيدكوا باذن الله وكل سنه وانتو طيبين ورمضــــــــــــــــــــــــــــــــان كريـــــــــــــــــــــــــــــــــــــــــم لا اله الا انت سبحانك انى كنت من الظالمين مواضيع هذا القسم برعاية ام عمر ومنة الله احمد ام عمر ومنة الله احمد 692666_5.gif فتكات رائعة Fatakat 692666 الجيزة – مصر
