ازيكم يا فتوكات
بقالى كام سنة نفسى اعمل جبنة فى البيت وطبعاً فشلت انى اجيب منفحة
حاولت ادور على طريقة اعملها من غير منفحة وجربت وصفات كتير لغاية ما اخيرا وصلت للوصفة دى وعملت فيها بعض التعديلات وعملت جبنة عجبت ولادى اوى الحمد لله وعجبت كل اللى داقها
وهى ميزيتها انها سهلة اوى وكمان صحية
وكمان مكوناتها متوفرة كل اللى هحتاجه
لبن
خل
ملح
فلفل اسود
زيت زيتون
الطريقة
انا بجيب اللبن عادى من عند اللبان واغليه على النار لمدة ربع ساعة علشان يتعقم
بعدين احطله خل (لكل كيلو لبن معلقتين كبار خل) بعد الربع ساعة غليان
واقلبه شوية واطفى النار بلاقيه فصل علطول
وابتدى يبان فيه كتل جبنة زى كدة
اسيبه دقيقتن لحد ميطلع كل الجبنة من اللبن وابتدى اصفى الجبنة اللى طلعت من المية
مش لازم اصفيها على الاخر لا بسيب شوية مية معاها هنا بعد مخلصت الكمية كلها انا كنت عاملة 2 كيلو لبن
المية اللى اتبقت دى اسمها شرش اللبن مترميهاش ممكن تعجنى بيها قرص او بيتزا بدل المية لانها مفيدة
وبتدخل كمان فى وصفات تجميل
نرجع تانى للجبنة هنحطلها ملح وفلفل اسود زى منحب وبعدين نضربها بالهاند بليندر او بمضرب كهربائى او فى الخلاط العادى زى متحبى
انا بعملها بالهاند بليندر كدة
واحطلها زيت زيتون حوالى ربع كوباية
واضربها تانى لحد متبقى زى الكريمة
بس كدة
وهنا عليها دقة زعتر بجيبها من عند العطار
جربوها ان شاء الله هتعجبكم
برجاء دعواتكم بصلاح الحال فى الدنيا والاخرة
سلااااااااااااااااااااااااااااااااام مواضيع هذا القسم برعاية
skydream skydream 25917_2.gif فتكات هايلة Fatakat 25917 6 أكتوبر – مصر