آخيرااااااا رحلتى لشراء حاجات المطبخ ومقولكمش شياكة واسعار متتوصفش..تعالوا خدوا فكرة؟ للعروس 2024.

السلام عليكم يا احلى بنات
********************

طبعا بما انى دايما بسأل وأسأل وأسأل

قولت كفاية بقى افيدكم شوية زى ما بستفيد منكم يا حبايبى وقولت احكيلكم على رحلتى لشراء ادوات المطبخ بعد لف وتدقيق وتمحيص (حلوه تمحيص دى هههههه) وطبعا كنت براعى انى اشترى حاجة شيك وسعرها حلو لان القرش اللى بوفرة من حاجة ممكن يفيدنى ف حاجة تانية واخدت معايا مرات خالى لانها لهلووووووووووووبه ومفترية ف الفصال دى كانت يا جدعان بتفاصل وتطلع عين الراجل وتاخد هدية على الحاجة ليها وليا واحنا ماشيين هههههههههههه

انا نزلت القاهرة اسبوعين كده تقريبا بس مشتريتش علطول انا اخدت حوالى اسبوع كده لف ف الاماكن اللى كنت مجمعاهم ف مفكره صغيره ف شنطتى واى مكان كانوا يقولوه البنات ف المدونة هنا او اسمع عنه من بره كنت بكتبه عشان اروحه ومنسهوش واخد فكره عن الحاجة والاسعار (وده مهم جدا )متشتريش علطول يا قمر عشان وانتى بتلفى هتلاقى حاجات كتير كل ما تلفى اكتر هتعجبك من حيث الشكل والسعر وهتندمى لو اشتريتى علطول ولقيتى حاجة احلى دا غير لسته الحاجة اللى هشتريها اللى بشتريه بشطب عليه عشان ميتكررش ف الزحمة

وبصراحة كنت نازلة وعامله حسابى من كم الاسعار اللى بتكلف حاجة المطبخ اللى سمعتها هنا ف المدونة بس اتضحلى والله غير كده بس انتى خليكى شطورة

وبعدين بعد ما لفيت واخدت فكره استقريت على مكان او مكانين عجبتنى حاجتهم وكمان ناس منتهى الادب والاحترام ف التعامل وعندهم ضمير الحاجة اللى مش اد كده بيقولولك عليها وقوليله سقف الاسعار اللى انتى حابه تتعاملى بيه عشان ميغليش عليكى

وجبت كل الحاجه من هناك ف يوم واحد من غير لف كتير وعندهم الشحن سهل جدا بالنسبة للناس اللى مش ساكنه ف القاهرة والله الحاجة وصلت قبللى وزى الفل للبيت لان انا من الصعيد

كفاية رغى صدعتكم نخش بقى ف المهم

انا جبت تقريبا حجات المطبخ كله من مول الازهر ودرب سعادة ده بعد لف وواخد فكره مقارنه بحمام التلات والاماكن التانية اسعااااااااار جملة وحاجات تحفة وفى كمان حاجات ف محل اشتريت منه ف مول الازهر بيستورد حاجات مخصوص بأسمه يعنى
انا اشتريت طقم شوربة ست مجات خزف بالاطباق بتاعتهم كل مج وطبق لون واللى عجبنى فيه بقى انه بيدخل الفرن والمكرويف والراجل حلفلى انى مش هلاقى منه بره وفعلا انا مشفتش زيه لانه جديد واستيرادهم لان المحل عنده شركة استيراد خاصة بيه بأسمه وورانى اسم المحل مطبوع على العلبه والمج من تحت من جهه التصدير وفى اشكان شبهه بره مسكتها عشان اتأكده مطلعتش نفس النوع فعلا زى ما بيقول وكمان جبت منهم طقم شربات دورق بالكوبايات بتاعته ومعاه اتنين شمعدان هدية من نفس الشكل ومقولكمش على خفه الازاز بتاعته وفخامته وشياكته اعلى من تمنه بكتير وحاجات تانيه هتهبلكم لما تروحوا وتشوفها اشكال مش هتتخيلوها ولا هتلاقوها بره وعنده كمان كاسات بوهيمى جميلة اوى واسعارها حلوة مووووت دا غير حاجات تانيه كتير
وعارفين كمان انا شفت عنده طقم صينى ب 1150 عارفين شفت زيه بكان ف حمام التلات اللى هو فرق شارع بينهم وبين بعض تقريبا كان والله ب1600 شايفيييين الفرق انا كنت هتشل
انا من مول الازهر جبت الحاجات (النضيفه) ههههه اللى تتحط ف النيش والصينى والذى منه
ودخلت بقى جوه شوية ف ممر كده لاقيت حاجات يااااااااااااالهوز عليها تحححححفة والرفايع كلها هتجبيها من جوه
وحجات اتنين ونص كلها هتلاقيها جوه وكل ما تتخيلى وفى كمان جوه ف درب سعادة ممكن الواحدة تجمع طقم صينى كامل او طقم عشا وبيبقى ارخص بكتييييييييييير او اى طقم انتى تحبيه وهتلاقى اطقم كاسات وكوبيات تححفة من جميع الانواع وبتبدأ من 35 جنية وطبعا يحيا الفصال لازم تكونى اروبه ده يقولك سعر الحاجة جيبيله النص علطول وامشى هتلاقيهم والله بيندهوا عليكى وبيدوكى بأقل سعر عندهم

وانا زى ما قلتلكم مرات خالى اروبه وبتنزل مع اى عروسة بتجهز توريها اماكن حلوة قالتلى على مكان تحفة والله يا بنات انا رحته وجبت منه حاجات ورفايع جميلة جدا وارخص من حمام التلات وفى حاجات والله ارخص كمان من الغورية ودرب سعاده استغربت ومتخيلتش ان ممكن تكون فى حاجات حلوة كده وفيه كل حاجة من حاجات مطبخ لرفايع لهدوم بيتى وخروج وكمان فرش للبيت
المكان ده منطقة كده اسمها (اسكندرية) ولو حاين اقولكم ازاى تروحوها قولولى واللى ما هتصدقوا الاسعار والحاجة اللى فيها
اسكندرية دى بعد مدينة السلام كده بتركبيلها من موقف العاشر وفى مواصلات من العباسية ليها او اركبى للسلام او موقف العاشر وغيرى
وبالمناسبة انا رحت المحل اللى اسمه اسواق الموسكى والعتبة وشارع عبد العزير اللى ورا النادى الاهلى فى حاجات حلوة اه بس اسعاره غاليه جدااااااااا عن مول الازهر ودرب سعادة وهتلاقى نفس الحاجة والله

وانا تحت امركم ف اى سؤال عن الحاجة والاسعار والمحلات احسن انا جمعت خبره على ادى كده من السؤال واللف وكمان لو فى مكان ف دماغكم حابين تسألونى عليه واعرفه ورحته انا تحت امركم ودى صور حاجات من اللى جبتها اللى قدرت اوصله من الكراتين عشان كتيرة ما شاء الله ومش هقدر افتحها كلها ولو قدرت افتح الكراتين تانى واصورلكم الكاسات وبقية الاطقم وكل حاجة هانزلها ان شاء الله

ده شكل طقم الصينى وهو 136 قطعة ومعلش كاميرا الموبايل بتاعى وحشة جدا ف مش مبينه جمال الحاجة ف الطبيعة احلى بكتييير

بصوا شكل الملاحة تجنن

وده بقى الاركوبيركس لونة تحفة ف الطبيعة وانا بعشق اللون الموف وعجبنى عن لومينارك لان معاه دورق وحاجات ويادة وهو 36 قطعة وده شكلة مصورتوش كله

وده شكل طقم الشربات انا صورته من العلبة بس بتاعى بدل الكاسات كوبايات وهتلاقوا اسم المستورد اللى بقولكم عليه على العلبة اهو


وده طقم كاسات جبته ب 40 جنية كل كاس لون

وده طقم كوبايات شاى عربى وماع الصينية وطفاية سجاير كمان وكل كوباية ليها طبق بس التصوير ظالمة والله

والى اللقاء ف رحلة المفروشات ومتنسوش التقييييييييييييم احسن اهكر القسم كله : هههههههههه


زهورة الأمورة زهورة الأمورة 425973_4.gif فتكات رائعة Fatakat 425973 محافظة قنا – مصر

سبحان الله و بحمده

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.