السلام عليكم ورحمة الله وبركاته
مساء الخير او صباح الخير عليكو حسب التوقيت المحلى لقراءة الموضوع
انا يا بنات ولدت الحمد لله بقالى شهرين بس طبعا عشان انا ام لأول مرة فكنت محتاسة اخر حوسة عشان كدة اتأخرت عليكو
نسمى الله ونبدأ
انا يا بنات اتأخرت شوية عشان احمل وبعد لما ربنا كرمنى بالحمل الحمد لله عقبال كل مشتاقة يارب بدأت رحلة العذاب فالحمل وكنت أخر تعب طول التسع شهور ونوم على ضهرى ومثبتات لحد الشهر السابع وطلق مبكر وغيره وغيره بس الحمد لله عدت على خير وربنا رزقنى ببنوتى ربنا يحفظهالى
جيت اول اسبوع فى الشهر التاسع الدكتورة كشفت عليا نسا عشان نعرف اخبار الحوض ايه وهل هولد طبيعى ولا قيصرى وكدة وللاسف الحوض عندى كان ضيق بس برضو يسمح بالولادة طبيعى وانا بصراحة كنت بدعى ربنا دايما يرزقنى الولادة الاصلح ليا الدكتورة قالتلى تجيلى الاسبوع الجاى تانى ونعمل سونار ونشوف بس فى 3 ملحوظات لو حصلو تجيلى فورالو نزل عليا دم او ميه لو الحركة قلت عن 10 حركات فاليوم لو حسيت اى تعب مش طبيعى زى خبط فضهرى او وجع اسفل البطن المهم فات الاسبوع ولا اى اندهاشة مفيش اى جديد ولا وجع ولا ميه ولا غيره روحت للدكتورة وعملنا السونار البنت الحمد لله كانت اكتملت وصحتها بخير ووزنها 3200 يعنى معدل طبيعى الحمد لله بس منزلتش الحوض والمفروض البكرية بتبدأ تدخل الحوض من اول التاسع عشان بتاخد وقت الدكتورة قالتلى هناخد 3 حقن رئة احتياطى عشان ميحصلش ضيق تنفس ولا اى مشاكل تحتاج حضانة لان مش شرط يكون الوزن قليل عشان البيبى يدخل حضانةوقالتلى اتمشى كتير على اد ما تقدرى وطلبت منى سونار ثلاثى عشان تشوف ايه الاخبار اوضح وتعرف ليه البنت منزلتش الحوض وهل الحبل السرى فى مشاكل ولا لا
وفعلا روحت عملت السونار واخدت 3 حقن بتوع الرئة والسونار الثلاثى طلع تمام مش موضح حاجة فالحبل السرى والتقرير بتاع الدكتور مكنش مبين حاجة ولما روحتلها قالتلى الدنيا تمام التقرير مش كاتب حاجة عن الحبل السرى بس تعالى نكشف نسا تانى
بصراحة انا كنت معترضة وقولتلها احنا كشفنا مرة وعرفنا وخلاص شوفى بالسونار كفاية قالتلى لا انا عاوزة اريح ضميرى من ناحيتك للأخر وفعلا كشفت لقت الرحم زى ماهو مفتحش حتى سم واحد والراس مرفوعة جدا لدرجة ان قلب البنت كان جنب السرة عندى
وعملنا السونار عادى ولقت البنت راسها تحت بس مش فالوضع الطبيعى للولادة يعنى المفروض يكون البيبى نازل ساجد يعنى واخد وضع السجود مدينى ضهره لكن بنتى كانت مديانى وشها ورافعة راسعة لفوق عندها حالة شموخ رهيبة
المهم الدكتورة قالتلى هنفضل لأخر التاسع ونشوف ايه الاخبار وبرضو لو حسيتى بحاجة تعاليلى وفعلا مشيت وفضلت مستنية الفرج مفيش اى جديد وكل اللى يكلمنى يقولى مفيش اى حاجة اقولهم ابدا بنتى مرتاحة جوة طب اخبار الحركة ايه اقولهم دى بتلعب كورة جوة يقولولى غريبة يا بنتى دة الوقت دة المفروض تكون مزنوقة مش عارفة تفلفص اقولهم نحن نختلف عن الاخرون خالص
المهم روحت للدكتورة كانت تانى يوم فالتاسع وقفلت 39 اسبوع ومفيش جديد الدكتورة عملت السونار وبرضو البنت بعييييدة عن الحوض قالتلى لا كدة غلط لان المشيمة ابتدت تعجز وكدة غلط ع البيبى هتولدى قيصرى
انا زعلت فالاول لانى كان نفسى اخد ثواب الطلق بصراحة بس رجعت قولت ربنا قدرلى الاصلح
الدكتورة قالتلى متزعليش دى مشكلة جيل كامل مش مشكلة عندك انتى بس انتو بسبب الغسالة الاتوماتيك والمكنسة والمساحة والشرشوبة والتوكتوك عضمة الحوض عندكو ماتت مباقاش عندها مرونة انها تدفع البيبى لتحت او انها تديلو فرصة ينزل من كتر الكسل وقلة الحركة عشان كدة الولادة القيصرى الفترة الاخيرة انتشرت اوى مش استسهال من الدكاترة كلها يعنى
قولتلها الحمد لله هنحدد يوم للولادة امتى وفين وبكام؟قالتلى فى مستشفى الندا والزهيرى والجزيرة والسلام قولتلها لا خلينا فالجزيرة مجربينها عندنا فالعيلة كتير حلوة ونضيفة والخدمة كويسة قالتلى تمام
كام الولادة يا دكتورة؟ قالت 3500 تكلفة من كله اجرة ايديها والمستشفى والغرفة والعلاج اللى هاخده هناك وبنج وكل حاجة قولتلها بنج كلى ولا نصفى؟ قالتلى انا بفضل النصفى وخصوصا فمستشفى الجزيرة دكتور البنج بتاعها ممتاااااز لكن لو عاوزة تولدى فى الندا او الزهيرى هقولك بنج كلى قولتلها فعلا سلفتى ولدت فى الزهيرى وحضرتك اديتيها بنج كلى قالتلى مانا قولتلك دكتور البنج هناك مش اد كدة فى النصفى قولتلها توكلنا على الله نصفى نصفى
حددنا الميعاد على يوم 1|20 نيجى بقى لليوم الموعود
روحت المستشفى من الساعة 7 الصبح والدكتورة هتجيلى الساعة 10 طبعا كانت قيلالى اروح بدرى كدة عشان الحق احجز غرفة
وفعلا روحت بدرى وانتظرنا كتير فالريسبشن لحد ما فضيت غرفة الساعة 9 وطلعت الاوضة جم قاسولى الضغط وشافو نبض الجنين وعملولى سونار
ودخلونى اغير هدومى ولبست قميص المجانين بتاعهم دة وحطولى فايدى اسمى واسم دكتورتى وجه الترولى اخدنى من الاوضة عندى طبعا كان معايا ماما وبابا واخواتى وجوزى وأهله وسلمت على الناس كلهم وطلبت منهم يدعولى وانا بعيط وجسمى عمال يترعش مالخوف
وجيت عند الاسانسير والممرضات قالو لحد هنا واستوب ممنوع حد ينزل معانا عشان هننزل على اوضة العمليات على طول وانا قلبى ضرباته زادت وجوزى قالهم طب هقولها حاجة واخرج فعلا دخلى الاسانسير باس راسى وقالى لا اله الا الله ومتخافيش واقرأى قرأن وهستناكى انتى وبنتنا وعيطنا بقى وكانت ليلة والممرضات فضلو يضحكو فينا ويقولو عيب احنا هنقول لباباكى انه باسك
والترولى نزل بيا على اوضة العمليات ولقيت الدكتورة بتاعتى واقفة ع الباب مستنيانى سألتنى صايمة بقالك كام ساعة؟ قولتلها 8 ساعات قالتلى تمام يلا سمى الله كلها خمس دقايق وتشوفى اللى مغلباكى بقالها 9 شهور وجت الممرضة سألتنى اسمى ايه واسم جوزى ايه وعندى ضغط او سكر او بعانى من اى مرض مزمن ولا لا
ودخلونى على اوضة العمليات وجوة دنيا تااااانية ضحك وتهريج ممرضات وممرضين ودكاترة
وانا قلبى واقع فرجلى وعمالة اتشاهد واقرأ قرأن جه الدكتور بتاع البنج سألنى على اسم جوزى قولتله عليه راح قالى اخر مرة تفتكرى اسمه هتخرجى من هنا ناسية جوزك واسمه روحت ضاحكة بصراحة دكتور سكر مريح نفسيا راح مدينى حقنة كدة فايدى لقيت نفسى عمالة اضحك بهيستريا ضحك غريييييب ومش قادرة ابطل ضحك والدكتور يضحك ويقولى مبسوطة؟ اقوله اوى يقولى طب بتضحكى ليه؟ اقوله مش عارفة وكل دة وانا مسخسخة من الضحك والدكاترة والممرضين عمالين يضحكو ويقولولو الله ينور يا دكتور هو دة البنج صحيح ههههههههه وانا يا اوختى انتى وهيا زى اللى حد ماسكنى بيزغزغ فيا قولت يا حلاوة يا ولاد هيا الولادة اليومين دول بالضحك مش بالبنج؟
وفجأة راح اتنين ممرضين ماسكينى ومقعدينى وقالولى وطى على ادام اوى ومتتحركيش وحسيت فى اخر ضهرى بشكة يمين العمود الفقرى وشكة شمال العمود الفقرى
وراحو منيمنى تانى على ضهرى ورفعلو القميص اللى انا لبساه دة زى الستارة عشان مشوفش حاجة روحت مصوتة قولتلهم لااااااا انا لسة صاحية راحو ضاحكين قالولى ما انتى هتفضلى صاحية طبعا مش هتنامى قولتلهم لا انا عاوزة انام مش عاوزة اشوف حاجة قالولى لما نطلع البيبى نديلك اللى انتى عوزاه قولتلهم طب استنو انا لسة بحرك رجلى اهو اهو وفضلت احرك رجلى راحو ضاحكين تانى قالولى والله ما هنعمل حاجة ولا نشتغل غير لما متلاقيش نصك التحتانى قولتلهم اذا كان كدة ماشى
مفيش ثوانى ولقيت النص التحتانى مش موجود ويشكشكو فى رجلى وانا ولا انا هنا
بصراحة محسيتش بحاجة ولا نتش ولا خدش ولا اى حاجة زى ما كنت بسمع هنا بس حسيت انى عاوزة ارجع تقريبا كانو فتحوا بطنى عشان ببص على يمينى لقيت برطمان متوصل بخرطوم والخرطوم دة عمال يطرطش دم جوة البرطمان صوت وقولتلهم هرجع مش قادرة قالولى رجعى روحت مرجعة فعلا الدكتورة قالتلهم الحقوها دى رجعت فعلا جت الممرضة مسحتلى وحطتلى فوطة تحت خدى
كل اللى بحكيه دة مكملش خمس دقايق وسمعت صوت بيقول وااااااء واااااااء وسكت لقيت الدكتورة بتبصلى من ورا الستارة وتقولى الحبل السرى كان ملفوف على رقبتها كانت كل ما تيجى تنزل الحوض يروح شاددها لفوق قولتلها طب هيا كويسة؟ قالتلى الحمد لله بخير قولتلها الحمد لله
استنى انهم هيورونى البنت زى ما بنشوف فالافلام الاجنبى يا اوختى ولا اى اندهاشة سامعة بس اصوات عمالة تقول ما شاء الله دى جميلة اوى ماشاء الله شبه مامتها قولت بينى وبين نفسى ايه دة هو انا هسمع اصوات بس ولا ايه مش هشوف اللى عمالين يحكو عليها دى؟ كان قاعد جنب راسى دكتورة مساعدة لدكتور البنج عشان تراقب حالتى لو احتاجت حاجة او حسيت بحاجة فبقولها هيا البنت فين هو انا مش هشوفها؟قالتلى لا هيجيبوهالك دلوقتى بس بينزلو من عليها الدم وراحت ندهت عليهم قالتلهم هاتو البنت لمامتها تشوفها الممرضة جابتهالى فعلا ملفوفة بفوطة بيضة وقربتها منى بوستها وهيا كلها حاجات بيضة كدة ومغمضة خالص وبتقول وااااااء بس مكتومة وخدتها ومشيت وانا عيطت وفضلت ادعى ادعى وادعى لكل مشتاقة ولكل بنت متتحرمش من الاحساس دة يارب
ولسة بقولهم انا عاوزة انام بقى خلاص تعبت قالولى احنا خلصنا خلاص وبنحط البلاستر بس وفعلا لقيتهم بينزلو الستارة وبياخدو الترولى وخارجين بيا لقيت كلللل اهلى واقفين مستنيين عند الباب وعمالين يضحكو وفرحانين بالبنت ويقولولى جميلة ماشاء الله ولقيت دكتور البنج جاى يقولى ها جوزك اسمه اييييييه روحت ضاحكة قالى حمدالله على السلامة خلاص احنا رجعنالك الذاكرة وراح ضاحك
وخدونى وطلعنا على الاوضة ونقلونى على السرير
والممرضة علقتلى محلول اعوذ بالله تحسى حاطين فى ميه نار هو مدته بتاخد ساعة او ساعة ونص بس من شدة الالم اللى كنت حسة بى حسيت انهم يوم ونص بصراحة كانو عذاب ندهولى الممرضة قالتلهم احنا عارفين واحنا اللى حاطين فالمحلول العلاج اللى يعملها انقباضات فالرحم حاولى تستحملى شوية بقيت اعيط وادعى ان ربنا يهون ويخفف عليا ودعيت لكل اللى اعرفه واللى معرفوش وجت دكتورة عشان تشوف الجرح وتقيس حرارتى وتطمن عليا وهيا اول ما رفعت الغطا من عليا قولتلها انتى هتعملى ايه؟قالتلى ولا حاجة هشوف حاجة وجت تحط ايدها على بطنى روحت مسكاها قالتلى لا كدة مش هينفع حد يجى معايا هنا يا جماعة روحت معيطة جت مامتى مسكت ايدى والدكتورة راحت ضاغطة على بطنى اوى وبعيد عنكو رقعت بالصوت مالوجع بعد كدة قالتلى معلش لازم اعمل كدة عشان ارد الرحم مكانو والدم المتخزن ينزل كله وفضلت اتألم لحد ما الوقت فات والمحلول خلص الحمد لله وجم حطولى محلول تانى بقى بس كله مسكنات وادونى حقنة عضل مسكنة والحمد لله الوجع بقى راح
وبعد ما المحلول خلص جم الممرضات عشان يقومونى ويدخلونى اتشطف واغير وطبعا اول مرة تقومى من السرير دى انتحار صعبة جدا بتحسى انك مشلولة وان النص اللى تحت دة مقطوع منك كل ممرضة مسكانى من ناحية وانا مش قادرة انقل رجلى بسحبها بس فالارض زى البيبى اللى لسة بيتعلم المشى ودخلونى الحمام وقعدونى على قعدة التواليت بتعليماتهم طبعا كان الالم اخف ومكنتش بتعذب اوى ورفضو حد يدخل معايا خالص بس جوزى صمم يبقى معايا عشان يساعدنى وفعلا خلصونى ولبسونى وخرجت فايقة شوية
ومن بعد المرة دى مرجعتش السرير تانى قعدونى على كرسى كدة وقالولى افردى ضهرك وطبعا كل شوية السؤال المعتاد ها مفيش اى غازات اقولهم لا جابولى البنت عشان اشوفها وارضعها وحاولت على اد ما اقدر اعمل كدة بس البنت كانت جعانة جدا ادوها بيبى درينك لحد ما اقدر ارضعها
وبعد كدة طلبنا من الممرضة انها تدينى لبوسة لانى بصراحة كنت زهقت من المستشفى وعاوزة امشى الممرضة قالتلى لسة فاضلك محلول كمان هديهولك الاول وبعد كدة اديكى اللبوس
وفعلا طلعونى السرير تانى وعلقولى المحلول وكان برضة مسكنات وجت الممرضة اديتنى 6 لبوسات مرة واحدة ومفيش 5 دقايق ولقيت مغص مش قادرة اوصفه قولتلهم دخلونى الحمام وفعلا دخلت الحمام عملت الحمد لله
بعد كدة الدكتور جه قالى مش عاوز اشوفك قاعدة ولا نايمة تانى عاوزك تجرى فالدور دة كله 10 مرات قولتله اه حاضر من عينيا دة انا هقوم العب الاولى دلوقتى فالطرقة ادامك
وفعلا جوزى مسكنى وبقينا نتمشى فالدور كله وارجع اقعد شوية واقوم تانى بصراحة كنت كل ما اتمشى احس انى بقيت احسن اول ما ارجع اقعد واجى اقوم تانى احس بنار فالجرح بس الممرضة قالتلى عشان متتعبيش امشى فاردة ضهرك وماسكة بطنك من تحت بايدك عشان متبقاش محملة على الجرح وفعلا عملت كدة وبقيت ماشية مرتاحة اكتر
والحمد لله جه الدكتور شافنى واطمن عليا وكتب لى على خروج وخرجت الحمد لله الساعة 7 بليل وروحت البيت وانا معايا بنوتى
عندى ليكو كام ملحوظة على كام نصيحة على كام حاجة تخلو بالكم منها: وانت فالتاسع اوعى تمشى او تبذلى مجهود الا بأمر الدكتور
لو الدكتورة طلبت منك تعملى سونار ثلاثى او دوبلر اوعى تطنشى وتعملى فمكان نضيف عشان يشوف كل حاجة بوضوح لأنى بصراحة فالحتة دى غلطت انا على طول بعمل السونار فمستشفى السلام وبيبقى تحفة وكل حاجة فى مكتوبة بوضوح بس المرة دى لقيت الحجز بعيد قولت خلاص هعمل فى اى مكان وخلاص وروحت عملت عند مركز على الاد كدة حتى شكل التقرير بتاعه كلمتين وبس عشان كدة مظهرش ان الحبل ملفوف على رقبة البنت لان الجهاز بتاعه قديم ومش دقيق بس الحمد لله ربنا سترها معايا لما تيجى تولدى اسمعى تعليمات الدكاترة والممرضات فكل حاجة هما اكتر حد فاهم وهيقولولك اللى يريحك مش هيجربو فيكى يعنى متعمليش بكلام حد من اللى معاكى ولا قرايبك
اكتر لحظات متعبة اثناء الولادة المحلول اللى بيعلقوه فالاول عشان انقباضات الرحم دة والضغطة اللى بتضغطها الدكتورة على بطنك واول مرة تقومى من السرير بعد الولادة برضو دول اكتر 3 حاجات هتحسى بالعذاب فيهم بس بذكر الله كله يهون
انا حكيت كل حاجة بالتفصيل عشان انا كنت بحب اوى اقرأ المواضيع اللى مفصلة عشان استفاد وابقى مطمنة وعندى خلفية عن كل حاجة هتحصل اتمنى اكون قدرت افيد بنوتة منكم ربنا يقوم كل واحدة بالسلامة ويرزقها الذرية الصالحة ويرزق كل مشتاقة اللهم امين
ادعولى ربنا يخليلى بنتى ويباركلى فيها
دلوعة بجد دلوعة بجد 325977_1.gif فتكات هايلة Fatakat 325977 الجيزة – مصر