اختي العزيزه اللي متاخره في الحمل اولا ان شاء الله ربنا يرزقك بالذريه الصالحه ويديكي اللي تتمنيه عاجلا وليس اجلا ان شاء الله تعالي
اولا لا تقنطى من رحمه الله واعرفي ان ربنا لما يريد لك بالذريه مش هاتحتاجي لا دكتور ولا ادويه
لكن عليك ان تأخذي بالاسباب وتصلي وتدعي ربنا انما وانت بتدعي لازم تكوني علي يقين شديد ان ربنا سبحانه وتعالي هو القادر علي شفائك باذنه تعالي
ثانيا عندي لك تجربه شخصيه لي انا واختي وانا بصراحه حسيت ان ده كان السبب في الحمل بفضل الله انا كنت اتاخرت في الحمل وبعدين بطلت افكر في الموضوع شويه ولاني سمينه وطبعا انتوا عارفين ان السمنه بتأثر علي الانجاب فقلت اخسس نفسي شويه وبعدين قلت اروح جيم احسن بدل ماعمل ريجيم المهم واظبت علي الجيم يوم بعد يوم لمده شهر تقريبا بس ماخسيتش لاني ماعملتش ريجيم انما حسيت ان لياقتي بقت احسن وبقيت خفيفه في الحركه ونشيطه لاني من النوع الكسلان شويه المهم بعد شهر فوجئت اني حامل من غير اي ادويه طبعا بعدها بطلت الجيم علشان الحمل
انما بعد كده عرفت ان الرياضه طبعا بتنشط الدوره الدمويه وده بياثر بالتبعيه علي التبويض بينشطه طبعا ويحصل حمل بإذن الله وجبت بنت زي القمر
بعدين اختي حصل لها تأخير في الحمل بس اكتر مني كمان سنتين دايخه يا حرام مع الدكتور برشام وحقن كتيييير جدا كل شهر لمده سنتين لما غلبت وبعدين هي سمينه وحركاتها قليله زيي فنصحتها بالرياضه وانها تروح الجيم سمعت الكلام وبطلت ادويه وواظبت علي الجيم برضه يوم بعد يوم والله العظيم شهر ولقيت نفسها حامل ومابقتش مصدقه نفسها والله والحمد لله بنتها عندها سنه ونص دلوقت
انامش عارفه الكلام ده صح 100٪ ولا ايه انما اللي متآكده نه ان الرياضه بتنشط الدوره الدمويه وبالتالي التبويض وده المهم عموما جربي ومش هاتخسري حاجه بالعكس الرياضه مفيده لكل الجسم والصحه عموما واستعيني بالله وادعي ربنا وصلي قضاء حاجه وربنا يرزقك بالذريه الصالحه انت وكل اللي عايزه اولاد يارب انما استحلفكم بالله لو الطريقه جابت نتيجه انكوا تدعولي انا وبناتي بظهر الغيب
باحبكم في الله
ام سلمى واخواتها ام سلمى واخواتها 220163_2.gif سوبر فتكات Fatakat 220163 القاهره – مصر ام الدنيا