بسم الله الرحمن الرحيم
انا عايزة اتكلم اوى وألا هيجرالى حاجة
انا من سنة ونص بالضبط ربنا رزقنى بحمل تالت الحمد لله وكان ابنى عنده 9 شهور
المهم فى الشهر السادس من الحمل حصلى حاجة غريبة اسمها نقص فى الصفايح الدموية وعشت فترة صعبة اوى فى تلت
شهور الحمل الاخرنيين وكنت حالتى خطيرة فى الولادة لكن ربنا كريم وقمت بالسلامة انا وبنتى الحمد لله
بس بعد الولادة فضلت المشكلة قائمة واتبهدلت انا وبنتى من الزفت الى اسمه الكورتيزون وعجن الدكترة
وتحاليل وبزل نخاع وفلوووووووووووس الموضوع دخله فى ييجى 10 الاف جنيه مصاريف غير الولادة
وفى الاخر ربنا رزقنا بدكتورة كويسة لكن قالتلى مالكيش علاج غير الكورتيزون
المشكلة انى اخدته بجرعات كبيرة يعنى كنت بخده 60 ملم فى اليوم
انا وانا حامل كنت 100 كيلو بعد الولادة بأسبوع بقيت 84 ومع الكورتيزون واللف على الدكترة فى الاول وصلت ل 92
بدأت كورس العلاج الاخير الى ب 60 ملم وانا 92 كيلو وبعد شهر ونص وصلت ل 100 كيلو تخيلو
انا دلوقتى بقالى شهر عاملة رجيم قاصى والله
بفطر كوباية شاي بلبن ببقسماطتين وبشيل من عليها السمم
واتغدى الساعه 3 بالضبط طبق سلطة كبييير كله ورقيات بس من غير طماطم علشان بتخزن الماية فى الجسم وكوباية بردقوش قبل الاكل
وطبعا الكورتيزون الله يحرقه بيخلينى نفسي فى حاجات مسكرة ساعتها بأكل تمر علشان ما اضعفش قدام الحاجات المسكرة
واتعشى علبة الزبادى منزوع الدسم وبعدين كوباية الشاى الرويال بتاع الرجيم
وبين الوجبات فاكهه .. تفاحه موزة برتقانة
طبعا لو انا بعمل الرجيم ده فى العادى كنت خسيت على الاقل 2 كيلو فى الاسبوع
لكن ولا الهوا .. واقفه على 100 زى ما انا الكل بيقولولى احمدى ربنا انك ما بتزديش مع الكورتيزون
لكن انا والله حالتى النفسية فى اسوء حالتها جسمى باظ وبقى كله خطوط من كتر الخسسان والتخن المفاجئ
انا حملت وولدت تلت مرات وعشت فى الكويت 6 سنين وانتم عارفين الناس فى الغربة بتزيد
لكن رغم كده طول عمرى وزنى من 75 ل 80 اقصى حاجة وانا طولى 170
انا بقالى 20 يوم خففت الكورتيزون من 60 الى 50 ملم والدكتورة قالتلى ممكن نسحبه فى 6 شهور علشان الصفايح الدموية ما ترجعش تقل تانى لانها الحمد لله بدأت توصل للطبيعى
انا يا بنات لما ببص لنفسي فى المراية بحس انى واحده تانية .. وشى منفوخ وخدودى ورقبتى وكتفى
والله ساعات اجيب صورى واتفرج عليها واعيط .. انا وحشتنى والله
مش عارفه اعمل ايه .. حارمة نفسي ومعيشة عيالى وجوزى فى حالة تقشف ورغم كده زى ما انا سحورة المنفوخة
ادعولى والى عندها اى معلومة او تجربة شبهى ما تبخلش عليه بيها انا محتجاكم اوى
سحورة الحبوبة سحورة الحبوبة 187489_5.gif فتكات رائعة Fatakat 187489 مملكتى الخاصة مع بنتى وجوزى حبيبى – الكويت