ازيكم يااحلى فتوكات
النهارده جيبالكم طريقه البيكاتا بالمشروم
طبعا مقادير اللحمه زى ماتحبى على حسب عدد الافراد
اول تكه للبيكاتا انى بحب اتبل اللحمه قبلها بيوم زى مااكون هشويها
بتفرق جامد جدا فى الطعم عن تجربه والله
تانى تكه انى بعلها باشاميل خفيف مش بحط دقيق بس او
كريمه طهى جاهزه ﻷ البشاميل بيبقى اجمل بكتيييييير جدا
تالت تكه متكونش اللحمه رقيقه اوى يعنى بفتيك ومش مضروب
صوره تشويقيه الاول
المقادير
لحم بفتيك او اسكالوب مش مضروب بعدد الافراد
علبه مشروم اى نوع تفضليه
هحط مقادير كيلوا اللحم
للتتبيله
2بصله كبيره مفرومه
معلقه طعام توم بودر
معلقه صغيره بابريكا
معلقه صغيره روز مارى بودر
ملح وفلفل اسمر
معلقه صغيره بهار هندى
ليمون
للباشاميل
1.5كوب دقيق
معلقه صغيره سمن او زبد او زيت ذره
حوالى كيلوا لبن او اقل
ملح وفلفل
الطريقه
نضع كل مكونات التتبيله مع بعض
ونقلبها ونحطها على اللحم ونعصر الليمون
ويفضل الخطوه دى قبل الطبخ على الاقل 4 ساعات
انا بعملها من قبلها بيوم
وبعدين ارفعها على النار بكوب ماء واحد اسويها
ولو احتاجت ميه كمان بزود مفيش مشكله لغايه ماتستوى
يفضل تسيبى شويه من الصوص بتاع اللحمه متنشفيهاش خالص
لاننا هنستخدمه ودى تعتبر من تاكتى الخاصه جداااااا
دى صوره اللحمه المتبله وصورتها بعد السوا وصوره المشروم
بعد سوا اللحمه بنشيلها من الصنيه ونجهز المشروم
بنحط نصف معلقه صغيره سمن فى صنيه ونشوح فيها المشروم
ونهدى النار شويه علشان يدخل فى السوا حوالى 10 دقايق
وبعطين نضيف اللحمه عليه ونقلبهم مع بعض كويس
وفى نفس الوقت نجهز الباشاميل على النار او على البارد زى ماتحبى
لو على النار
نحط نصف معلقه سمن او زيت ذره فى حله ونرفعها على النار
لغايه ما تقدح وبعدين نحط الدقيق ونضرب بالمضرب الكهرباء
او السلك والكهرباء احسن طبعا فى البشاميل بيدى نتيجه احلى طبعا
ونزود لبن مغلى لازم للبشاميل على فكره لبن مغلى كل اللى بيقولوا
البشاميل بيكلكع استخدمى لبن مغلى لسه نازل من على النار او ميه او
شوربه مغليه لكن انا بفضل اللبن فى البشاميل طبعا
نزود لبن شويه بشويه ونضرب جامد لغايه مايبقى سمكه كويس وانا للبيكاتا
بحتاجه خفيف مش زى المكرونه الباشاميل وهيبان فى الصور
ونتبله بالملح والفلفل ونزوده على خليط اللحم والمشروم ونقلب
ويااااااااه بقى على الطعم الرائع بتاعه تحفه والله
التكه الاخيره بقى انك تاخدى الصوص بتاع اللحمه وتصفيه بمصفاه
علشان تشيلى البصل اللى فيه وتضيفيه على البيكاتا وتقلبى
وتاكلى صوابعك وراه من كتر حلاوته شوفى الصور يافتوكه
وده بقى الشكل النهائى بتاع البيكاتا وهى على فكره
لازم تتقدم مع رز ابيض بيعملوا كده فى المطاعم
اسيبكم مع الصور
فى امان الله وبالهنا والشفا
اوعوا تنسوا التقييييييييم
مواضيع هذا القسم برعاية
سيسو زيزو سيسو زيزو 822446_8.gif فتكات غالية قوي Fatakat 822446 المنصوره – مصر