بسم الله الرحمن الرحيم
اولا يارب يرزق كل مشتاق الزرية الصالحة ويقوم كل حامل بالسلامة هى وطفلها
ويبارك لنا فى ذريتنا
انا لسة والدة من 18 يوم فى مستشفى عبدالقادر فهمى
وجيت احكيلكم تجربتى
انا زى كل واحدة حامل احترت علشان اختار مستشفى اولد فيها تكون كويسة ونضيفة وسعرها مناسب
واللى كان مزود حيرتى انى مش من القاهرة بس متجوزه فيها فامعرفش حاجة فيها كمان ان دى اول ولادة لية
المهم دخلت اعمل سيرش على فتكات ولاقيت كلام كتير مرعب عن مستشفى عبدالقادر فهمى
اللى ماتت واللى دخلت عناية مركزة واللى طفلها اتنقلة فيرس خوفت وقررت انى الغى الفكرة دى نهائى عن بالى
بس المشكلة ان لاقيت كل المستشفيات اللى الدكتور بتاعى بيولد فيها غالية جدا زى النزهة والامريكية وكوينز
احترت وقفلت النت وقررت ان الزيارة الجاية للدكتور بتاعى اسالة يساعدنى اختار ودعيت ربنا يرشدنى للخير وصليت الفجر ونمت .
مفيش ساعتين وصحيت على وجع وعلامات الولادة ظهرت عندى كنت مرعوبة انا لوحدى ومعايا جوزى واختى الصغيرة واهلى بعيد عنى فى محافظة تانية ولسة ما قررتش اولد فين صحيت جوزى وكنا بدرى مرعوووووبة
نزلنا ومن غير تفكير جوزى ودانى عبدالقادر فهمى لانها اقرب مستشفى وانسب واحدة من حيث السعر وطبعا هو مكنش يعرف انى قرات عنها كتير انها سيئة وانا كنت مستسلمة معرفش لية وبستغفر طول الطريق
المهم علشان ماطولش عليكم اكتر من كدة
مالقتش اى حاجة وحشة فى المستشفى دى اقسم بالله يا جماعة اهلى على ماجولى اتاخروا علية وانا ولادتى كانت صعبة شوية
لان المفروض انى اولد طبيعى والطلق فضل شغال حوالى 9 ساعات وراس الجنين مش راضية تنزل فى الاخر الدكتور قال لازم قيصرى كفاية كدة وفعلا طلع الحبل السرى ملفوف على رقبة ابنى ودة اللى كان مانع الراس تنزل
المهم ممرضات متعاونين جدا جدا ماسبونيش لا قبل الولادة ولا بعدها
دكاترة نواب ذو جدا
دكتورى كان ممتاز واخلاق وكان صبور معايا جدا وقالى انا مش عايز اتسرع واولدك قيصرى
المستشفى نضيفة جدا
فى دكتورين اطفال شافوا ابنى وطمنونى علية
سابوا ابنى معايا فى الاوضة بس كانوا يدخلوا يدولة رضعة ويغيرولة ويحموة فى مواعيد محددة
حمدت ربنا انة ارشدنى اولد هناك انا والله يا جماعة ماخترت المستشفى دى زى ماقولتلكم بالعكس كنت مرعوبة منها
حبيت اجى اقولكم علشان عارفة اكيد فى محتارين كتير زيى
ملحوظة يابنات
انا لاحظت ان اختيار الدكتور هو الاساس مش المستشفى وكل اللى اشتكوا هنا من اى مستشفى ولادة كانوا بيشتكوا اصلا من الدكتور
لان المستشفى والدكاترة النواب والممرضات بينفذوا تعليمات الدكتور
انا بقول للممرضة انا مش قادرة اخد حقن دلوقتى قالتلى انا ماقدرش ااخر الحقنة دقيقة لان الدكتور احمد دقيق جدا ولازم انفذ اللى قال علية واما يعاقبنى
ادعولى ربنا يباركلى فى ابنى وجوزى وصحتى يابنات وربنا يقومكم بالف سلامة
حنين واشتياق حنين واشتياق 557802_2.gif فتكات متميزة Fatakat 557802 القاهرة – مصر