البرجر بالخطوات التفصيليه من مطبخ ردينى
طعم مميز ..نضافة مضمونة…مافيش أجمل من كدة
السلام عليكم و رحمة الله و بركاته
سبحان الله و بحمده عدد خلقه و زنة عرشه و مداد كلماته و رضا نفسه
ازيكم يا احلي عضوات في احلي منتدي
النهارده صورتلكم البرجر من مطبخى مين من أولادنا ما بيحبش البرجر و مش حنتكلم كتير عن عبوات البرجر الحاهز اللى فى السوبر ماركت ومهما كانت الماركة بتاعتها لا ليها طعم ولا ليها لون ……مالهاش بس غير ريحة …ريحة ما يعلم بيها الا ربنا ….
طبعا البرجر البيتى …..حاجة تانيه خالص
المكون الأساسى للبرجر هو بروتين الصويا
فول الصويا بيتباع بودرة أو فول حب أو مجروش
وأنا جربتهم كلهم
أحسن نوع عن تجربه هو المجروش ودة بيكون شكله
بتنقعيه شويه فى ميه دافيه فبينفش ودة بيكون شكله عند الإستخدام
بتحطيه فى مصفاه وتصفيه كويس وتبتدى تشتغلى بيه
مشكله فول الصويا انه بيكون طعمه مش حلو عشان كدة أنا باتعامل معاه الأول قبل ما أضيفه عاللحمة عشان بإذن الله أضمن نتيجة كويس
المقادير :
1-تمن كيلو بروتين صويا مجروش منقوع شويه فى ميه دافيه ومتصفى كويس
2- راس توم مفروم
3- بصله مفرومةمتصفيه كويس من ميتها
4-معلقتين كاتشب –ملعقتين صويا صوص ويمكن
الإستغناء عنهم
5- ملح-فلفل –بهارات-جنزبيل-كبابه صينى-يعنى باختصار البهار المتوافر
6- كيلو لحم مفرومة
7- عبوة سبايسى برجر العبوة كيسين بناخد كيس واحد بس عالكيلو
8-كبشه بقسماط ناعم
الطريقة :
باضيف جميع المكونات من 1لحد5
وبافرم ناعم
وباضبط الملح باضيف معلقة ملح صغيرة كامله على فول الصويا وممكن أكتر من كدة لإن فول الصويا عادة بيحتاج ملح
نصيحتى ليكى انك تدوقى الخليط (خلى بالك انك لسة ماحطتيش اللحمة ) وتضيفى كميه الملح المناسبة على حسب ما تقدرى بنفسك
وبعدين بنضيف اللحمة وكيس سبايسى واحد
+كبشه البقسماط
وبافرم ناعم مرة تانيه تدينا عجينه ناعمة لا تلتصق باليد
نبتدى نقطعها بناخد جزء من العجينه ونحطها جوة كيس كبير بالشكل دة
ونفردها بالنشابه بتخن مناسب لا رفيع ولا تخين
ونقطعها بكوبايه حجم مناسب مع الأخذ فى الإعتبار انه حيكش شويه فى السوا
ونجهز الأكياس أنا باجيب أكياس تلاجة حجم صغير وباقصها من النص بالشكل دة فالكيس الواحد بيكون مناسب لقطعتين
باحط القطعة فى الكيس وباضغط عليها كويس عشان أفرغ الهوا
وباحطها فى الفريزر بحيث تكون مفرودة ودة شكلها بعد ماتكون اتجمدت
باجيب طاسه تيفال وباحط فيها كميه مادة دهنيه مناسبه سمن أو زيت أو خليط وباسخنها كويس وباحط الأقراص تاخد لون وباقلبها عالناحية التانيه تاخد لون من الناحيتين
وامتصت كل المادة الدهنيه
باضيف شويه ميه صغيرين وباغطيها عشان أضمن انها استوت من جوة ومش نيه وفى نفس الوقت ما تتحرقش
وهنا حان وقت المرح وعمل السندوتشات والإضافات متنوعه حسب حجم رغيف الكيزر المستخدم وأسيبكم مع الصور
الإضافات العادية
طماطم-شيدر-خس
استنونى فى المشاركة الجايه وإوعوا تمشوا وتسيبونى
ز مواضيع هذا القسم برعاية
ردينى ردينى 107140_3.gif فتكات ست الكل Fatakat 107140 الرماية – مصر