بسم الله الرحمن الرحيم
الموضوع اللى هتكلم عنه موضوع مهم جدا واتمنى انه يتثبت لاهميته وهو كدبة اعراض الحمل طبعا ملايين من الستات بيهتموا اوى بالموضوع دة وانا واحدة منهم وقريت عن اعراض الحمل لما دماغى بقت عاملة زى الكرمبة وعينى بقو زى الطماطم من كتر القراية ومن خلال اللى قريته ومن خلال تجربتى وتجارب ناس كتير حواليا احب اقولكم ان اعراض الحمل قبل البريود دى كدب كدب كدب كدب لحد اخر عمرى هقول كدب
انا شايفة واحدة رافعالى حواجبها اهى وبتقولى انا عرفت انى حامل قبل ميعاد البريود هقولها دى مجرد صدفة بس صدفة مش اكتر من كدة والله
تعالى ناخد الموضوع بالمنطق وواحدة واحدة
اعراض الحمل قبل البريود:
1/مغص شديد زى الم البريود قبل ميعادها .
تمام ودة برضو بيحصل نتيجة تحرك البويضة اللى مستنية التلقيح وممكن نتيجة ان الدورة جاية وبتدى اشارات قبلها عادى بتحصل كتير ونتيجة مجهود وارهاق زايد ايام التبويض ودة بناء على كلام 3دكاترة كشفت عندهم عشان المغص
2/غثيان ودوخة .
تمام عشان انيميا وعشان معظم الستات جسمهم حساس لاى تغيرات بتحصلهم فلما بيجى فترة التبويض بيجى بغثيان ودوخة وعشان كمان الايحاء والخوف اللى بنكون عاملينو فى نفسنا اول مايبتدى التبويض ونقعد نحسب بقى حصل ماحصلش حصل محصلش
3/فى ستات تقول انا جاللى صداع وقتها
طب بالله عليكم فيه كام سبب للصداع
4/دخول الحمام كتير
اقسم لكم بالله انى بقالى 6شهور على الموضوع دة ومفيش حمل وسلفتى نفس الموضووع واقولكم على حاجة كمان اختى حملت مرتين وعمرها ماعدت على موضوع الحمام الكتير دة
5/زيادة الافرازات ودة بقى مش مقياس نهائى خالص اقرب حاجة اعملو بحث هنا على فتكات هتلاقو ستات كتير بيقولو ان جفاف المهبل دليل على الحمل يعنى بخخخخخخخخ
6/التهاب اللثة
دة عرض مش شائع وحصلى الشهر دة وبرض مفيش حمل ومش كتير من الستات قالو عليه
7/وجع الصدر اااااااااااااااااة مهمه اوى دى
لالالالالالالالا مش مهمة خالص كل اصحابى حملو من غير وجع الصدر ولا اخواتى تمام انا بقى فى حملى الاول صدرى وجعنى ودلوقتى شهرين كاملين صدرى يوجعنى بعد التبويض وبرضونو نيو
8/غياب البريود اة هتكلم عن دى كمان ليه بقى سلفتى يابنات دورتها منتظمة جدا وفى شهر من الشهور الدورة اتاخرت اسبوعين قولنا خلاص حامل كدة فى شهر ونص جابت التحليل المنزلى سلبى قولتلهم الدم هو اللى يبين روحنا نعمل التحليل نزل دم وهى ماشية خوفنا جرينا بيها على الدكتور كشف وصنار وسلطات وبابا غنوج قال مش حمل دى دورة مخزونة
طولت عليكم معلش لسة فى اعراض تانية هتكلم عنها برضو بس مش دلوقت عينى وعتنى بس المهم اننا منصدقش الوهم دة حتى لو البريود اتاخرت اعملو تحليل الدم فورا هو اللى يقول مش نقعد نعشم نفسنا ونسال دى ودى ونقارن وفى الاخر ناكل كبسة ومن غير لحمة كمان
يتبع
ام كارمة ام كارمة 890062_1.gif فتكات هايلة Fatakat 890062 طنطا – مصر