السلام عليكم ورحمه الله وبركاته
فتوكاتي حبايبي وحشتوني جدااااااااااااااا بقالي كتير منزلتش مواضيع مهمه نظرا لانشغالي الشديد مع ريا وسكينه بناتي
اول مافضيت قولت اجي افرجكو على العزومه اللي عملتها لاهل جوزي باعجوبه بعد بحث طويل في الاصناف اللي هعملها لاني كنت بدور على النواشف لسبب بسيط وهو اني نقلت في شقه صغيرة ولغيت السفره بتاعتي وحبيت اعمل عزومه تشرف وفي نفس الوقت يبقى الاكل نواشف لان كل واحده في طبقه
وبعد تفكير وتخطيط وتكتيك عملت الاصناف دي
رز مندي سعودي
فراخ مندي مشويه
محشي ورق عنب
بسله بالجزر سوتيه
كفته مشويه
سمبوسك باللحمه المفرومه وبالجبنه
سلطه طماطم
سلطه حمص
مخلللات
والحلو كان
تورته بالفواكه وتورته بالشيكولاته بمناسبه عيد جواز سلفتي لاني بحبها 
اه بحبهاااااا سمعاكي ياللي بتحسدي
ندخل بقى على الصور وهقولكو على طريقه كل حاجه
اولا : الرز المندي
جبت رز بسمتي وعملته في صنيتين واحده خليته ابيض والتانيه لونه اصفر
كيلو رز بسمتي مغسول ومنقوع في ميه دافيه ودي عينه من الرز قبل غسيله
نبشر بصله كبيرة
نشوحها في معلقه سمنه كبيرة تاخد لون دهبي بلاش نغمقها اوي
نضيف التوابل (ورق لورا لومي عودين قرفه قرنفل حبهان بهارات فراخ ) وزبيب لو حبيتي
نشوح البهارات مع البصله ونضيف ميه تغلي (الميه ضعف مقدار الرز )لان الرز البسمتي بيحتاج ميه كتير عشان يستوي
قسمت الكميه في صنيتين وغطيتهم بورق فويل جامد شويه وخرمت الفويل بسكينه وحطيتهم في الفرن من تحت
الفراخ نضفتها وغسلتها كويس جدا بالملح والدقيق واللمون وتبلتها قبلها بيوم ب(بصل طماطم فلفل اخضر شطه خضرا لمون كتييييييييير ملح فلفل بهارات فراخ كزبرة ناشفه كركم كاري )
ورصيتها على ورق الفويل اللي غطيت بيه الرز
عرفتو ليه بنسوي الرز في صنيه مش في حله
بنسيبها فوق الرز لحد ماتنزل ميتها على الرز من خلال الفتحات اللي عملناها بالسكينه لم الرز يستوي بنشيل الفراخ من فوقه وبنرصها على شبكه الفرن ونولع عليها الشوايه تكمل سوا لانها ملحقتش طبعا تستوي مع الرز احنا بس كنا بناخد طعم الفراخ للرز ومننساش نحط ورق فويل تحت الشبكه عشان الدهون اللي هتنزل من الفراخ هتبهدلك الفرن
وادي الفراخ بعد ماشويناها في الفرن
نركنها على جمب وقبل الاكل نرصها في صنيه ونولع فحمه على النار ونطفيها بمعلقه سمنه وسط الصنيه ونغطيها بسرعه
نرجع للرز بعد مايستوي هتلاقي عندك الرز ابيض نسيب صنيه زي ماهيا
ونيجي بقى للصنيه التانيه عندك حل من اتنين
اما انك تجيبي لون طعام اصفر من محلات الحلوانيه وتقلبيه في حبه ميه صغيرين يدوب وترشيه على وش الرز وتقلبي الرز براحه عشان حبايه الرز البسمتي متتكسرش
اما بقى لو اللون مش متوفر ممكن تستخدمي الكركم ترشيه على وش الرز وتقلبي بالراحه لحد ما الرز كله ياخد اللون الاصفر ودا اللي انا عملته هنا عشان مكنتش لاقيه اللون
كدا الرز جاهز ومش قادرة اقولكو قد ايه طعمه جميل وريحته تحفه ميتشبعش منه ولم تغرفي في الطبق تحطي حبه ابيض وحبه اصفر بيدي شكل جميل
والفراخ كمان جاهزة وعارفين هنعمل فيها ايه قبل الاكل علطول
نيجي لمحشي ورق العنب ودا كلكو عارفينه طبعا مش محتاج اقولكو عليه
وعملت كفته مشويه عباره عن
كيلو لحمه مفرومه واربع بصلات كبار ملح وفلفل وبهارات لحمه وربع كوبايه بقسماط وبقدونس مقطع رفيع جدا نخلط كله مع بعض في الكبه عشان المكونات تتجانس كويس وبعدين نصبعها على اعواد خشب بس انا مكانش عندي ويفضل نبيتها في الثلاجه قبلها بيوم زي الفراخ
نيجي بقى للتسويه نولع الفرن من تحت يسخن اوي وبعدين نطفيه ونولع الشوايه ونرص الكفته على الشبكه
ومننساش نحط ورق عشان الدهون اللي هتنزل من الكفته
ولم تستوي نرصها في صنيه وقبل الاكل نطفي فيها فحمه بمعلقه سمنه زي ماعملنا في الفراخ
سلطه الحمص دي بقى روووووووووووووووووووووووووووووعه فوق الوصف احلى مليون مرة من الطحينه
طريقتها
ربع كيلو حمص ننقعه قبلها بيوم
تاني يوم نسلقه جامد ولم يبرد نحطه في الخلاط
مع 3/4كوب طحينه
و8لمونات كبار
و2معلقه خل
وملح
و3معالق زيت زيتون
و3/4كوب ميه الحمص
و4فصوص ثوم
نضرب كله في الخلاط كويس ونحط في اطباق ونرش على الوش زيت زيتون وبقدونس لو حبيتي
5حبات طماطم كبيرة في الكبه
3فصوص ثوم
ملح
كمون
لمون
نضرب في الكبه ودوقي احلى سلطه كبسه
4علب زبادي جهينه
نقلبهم كويس بالمعلقه
كمون
ملح
نقطع قطع خيار رفيعه جدا
نقلب كله مع بعض
وحطي في الطبق وعلى الوش عود نعناع للتجميل
السمبوسك اللي حازت على اعجاب الجماهير
الطريقه
2كوب دقيق
2بيضه
1.25معلقه صغيرة بيكنج باودر
1/4كوب زيت
1/4كوب لبن
نخلط كله مع بعض لحد ماتتكون عجينه ملساء نغطيها تخمر ساعه
نفرد العجينه بالنشابه ونقطعها دواير
نحشي كل دائره بجبنه مثلثات او فيتا او جبنه تركي بتبقى روعه او بسطرمه او لحمه مفرومه زي ماتحبي وتقفلي الدايرة وتضغطي جامد على الحروف عشان متفكش وقبل الاكل تقليها في زيت غزير
بسله بالجزر واللحمه المفرومه
دي بشتريها مجمده من فتح الله
حطيتها في حله على نار هاديه
وعليها ربع كيلو لحمه مفرومه
وربع كوبايه ميه
وملح وفلفل
وكل شويه ازودها بق ميه واقلبها
لحد ماتقرب تستوي احط معلقتين صلصه تديها مجرد لون
دا بالنسبه للاكل
تاااااااااااااااااااااااااااااااااااااااااابعوني لسه الحلو مواضيع هذا القسم برعاية
سمسم_89 سمسم_89 ممنوعة من المشاركة Fatakat 887588 اسكندريه – مصر