سلام عليكم
مبدئيا كنت متردده يا بنات انزل الغدا ده و جوزى قالى لاء
لانى مغتربة جديدة و معنديش اطباق حلوة اقدم فيها و لا عندى سفرة
و لا تربيزة اساسا انا مخترعة سفرة كده على الارض (كرتونة التلفزيون و فارشة عليها كيس كبير)
فمحدش يتريء بقى و معلش طولت عليكم
هبدأ على طول ( السماااااااااان بالفريك )
الطريقة :هنشوح البصل فى السمنة لحد ما يصفر نحط الكبد المقطعة و نقلب و نحط زبيب و لوز (حسب الرغبة) و بهارات صحيحة (قرفة و لورا و قرنفل و لمون مجفف) و نقلب شوية و بعدين نضيف الفريك المنقوع نصف ساعة من قبل و مصفى و يقلب شوية مع البهارات فى السمنة و نضيف الملح و الفلفل الاسود و بعدين نضيف ميه يا دوب تغطيه و معلقة صلصلة كبيرة و لما يغلى نوطى عليه و نخلى يستوى نص سوى و لما يبرد نكون متبلين السمان كويس بين الجلد و من الخارج(بالبصل و الملح و الفلفل و البهارات )نحشى السمان و نقفله بالخلة (انا ما قفلتوش علشان حطيت تحته بطاطس فسبته يخرج على البطاطس عادى ربط رجله بس بالخيط )و دهنته سمنة من على الجلد
و غطيته بالفويل و دخلته الفرن حوالى ساعة الا ربع و بعدين شيلت الفويل و فتحت الشواية يحمر
و بجد بجد الطريقة دى أحلى من السلق جدا و البطاطس اللى تحت السمان كان طعمها يجنن ، و تحت البطاطس مخبية باقى الفريك على فكرة ….و بالهنااااااااااا
الجلاش مش جلاش اساسا سمبوسة مستهبلة قولت اجرب اعاملها معاملة الجلاش
دهنت الصنية سمنة و رصيت طبقتين فوق بعض و دهنت سمنة و كمان طبقتين و سمنة و بعدين اللحمة المتعصجة( ببصل و بهارات و ملح و فلفل اسود و فلفل اخضر )
و قطعت زتونتين اخضر بس علشان ما تقلبش بيتزا
و بعدين حطيت شوية موتزريلا
و حطيت حوالى 4 طبقات تانى بس علشان السمبوسة تخينة و دهنت الوش سمنة كتييييييير علشان انا مفتريه
شيفاكى يا اللى بتقولى اتلسعت انا بحبها مقرمشة
الملوخية :
طبعا سهلة ما صورتش الخطوات عملتها بشوربة لحمة لما الشوربة غليت حطيت الملوخية و فى طاسة حطيت معلقة كبيرة توم مبشور و معلقتين سمنة و لما الثوم اصفر حطيت الكسبرة و شهقت هاااااااااااااااااا خضرا خضرا خضرا و حطيتها على الملوخية
و دلوقتى بقى نحط طبقين شوربة حلوين و الطرشى و الطماطم المخللة
و يلا بينا ناكل بسم الله
شمر و ادخل 
و التقيم بقى انتم و ذوقوا ها ادينى قولت
مواضيع هذا القسم برعاية
نغم بتحب ماما نغم بتحب ماما 616334_10.gif فتكات ست الكل Fatakat 616334 القاهرة – مصر