حبايبى الحلوين الطعمين
ردوا السلام وصلوا على الحبيب المصطفى عليه افضل الصلاة واذكى السلام
زى ما وعدتكم فى اخر موضوع ليا من يومين
(الشعريه الباكستانيه بالكريم كراميل والكيرى) انى هانزل سمك بالشوفان وارزبالالوان
ودى صورته النهائيه عشان نفتح الشهيه ونشوف الخطوات البسيطة والطعم الجميل فيما بعد
هااااااااااااا ايه رأيكم
نكمل ولا بلاش ….
طيب نكمل للى عجبه الطبق !!!
الفكرة جات من الكسل بصراحه لان كنزى نامت وهى بترضع وكل ما احطها
على السرير تعيييييييييط وتصحى والسمك كان فى الحوض قرب يعوم تانى من الركنة هههههه
فأضطريت اعمل تتبيله سريعه بأيد واحده لانى شايلاها بايدى التانيه والله
ومش هاعرف افرم توم ولا غيرة
قولت خلاص هاستعمل توم مجفف وباقى التوابل كالعاده
عملت توم بودرة معلقه كبيرة على كيلو سمك فيليه
ومعلقه صغيرة من :
كركم وجنزبيل بودرة وملح وفلفل وكسبرة وكمون وبابريكا و شطة ورشه صغيرة قرفه
و ليمون و م ك خل وحطيتهم فى التلاجه من بالليل
والصورة دى كانت الصبح تانى يوم لما نامت الهانم وتعمقت فى النوم
نحضر طبق فيه بياض بيضه مع شويه ميه وملح وفلفل
وطبق فيه شوفان
وناخد الفيليه على البياض ثم الشوفان ونضغط بكف ايدينا كويس جدااااا
كأنك بتصقفى عليها بس بالراحه
ممكن نستعمل البيضه كامله بس الدهون كلها متركزة فى الصفار ولذلك قولت استعمل البياض فقط عشان تكون صحية اكتر خاصة مع وجود الشوفان
وممكن بدون البيض كمان (بس عشان اضمن انها هتلصق بالشوفان) ونعتمد على ماء التتبيله فقط
وهنا بعد ماخلصت ودخلتهم التلاجه نص ساعه على ما احضر الرز
الارز بسمتى مغسول ومنقوع نص ساعه (انا باستعمل الوليمة العادى)
بصراحة انا مكنتش باظبط الرز البسمتى خالص فى اى وصفه بس الفضل لربنا
ولحبيبتى ام معاذ ربنا يباركلها ويكرمها عملت موضوع مخصوص عشانى وعلمتنى ان
لكل كوب ارز – كوب وربع ماء
انا عملت 2كوب ارز و2ونص كوب ماء
يعنى نزود على مقدار الارز ربع كمان لكل كوب
هنا كان عندى شوربه (وممكن ميه )وحطيت فيها
ليمون مجفف (لومى جاف) – قرفه خشب- 6حبات قرنفل – 3حبهان (هيل)-كمون صحيح
3م زيت او 2 م ك زبده
ولما تغلى ننزل بالارز المصفى تماما ولما يبدأ يتشرب الميه نهدى النار جدا ونغطى الحله
لمدة ربع ساعه تقريبا ولما يستوى نضيف على جنب واحد معلقه صغيرة مليانه من اللون الاصفر
ومعلقه من اللون الاحمر (فوستر كلاركس السائل )
ونسيبه كمان 5دقايق ونطفى النار بعد مرور 5دقايق ونخليه شويه بالغطاء
وبعدين نحركة بالشوكة بخفه عشان مايتكسرش وهيكون بالشكل ده ان شاء الله
الرز ده بيقدموه هنا فى افراحهم و احتفالاتهم شهى جدا وخفيف
نقلى السمك فى زيت ساخن ونقلبه على الوجهين حتى يكتسب اللون الذهبى
ويقدم مع الارز بهذا الشكل
والله يا بنات جمييييييييل وصحى جداااااااااااا
وطبعا فوايد الشوفان لا حصر لها وسبق وقدمته من اسبوع على اللينك ده مع وصفات حلا
https://fatakat.univanet.com/#2546077
الفيليه استوى بسرعه وطعم التتبيله كان جميل جدا واحلى من التوم الطازة كمان
جربوه وهتحبوه
ممكن كمان تدهنى صينيه بالزيت وترصى السمك وعليه زيت تانى وتدخليه الفرن يستوى ويتحمر
هيكون صحى اكتر بس بينشف شويه اما المقلى بيكون طرى وجميل اكتر
انا جربتها فى البانيه كان حلو بس المقلى احلى
وقدمته مع سلطة طحينه وسلطة خضرا وعيش ابيض
وفى النهايه اتمنى يكون موضوعى افادكم واعجبكم وتجربوه باذن الله
وباشكر ام معاذ مرة تانيه على الافاده وباشكر كل واحده اتعلمت منها حاجه
بارك الله فيكن
لا تقرأ وترحل
اترك رد او نقد مواضيع هذا القسم برعاية
كنزى همام كنزى همام images/avatars/peppers.jpg فتكات ست الكل Fatakat 538054 الطائف – لسعوديه