صباح الخير يا فتاتيك
جيبتلكو النهاردة رجيم مجرباه علي نفسي وعلي بنت عمتي واختها
الرجيم اصلا اسمه السبع لقمات … ( اللقمة = قطمة او الكمية اللي بتحطيها في بقك وتمضغيها وتبلعي )
وده رجيم من اختراع بنوتة اسمها فاطيمة في منتدي تاني (اعملو سيرش علي جوجل )
المهم الرجيم ده انا كنت بعمله ك فترة راحة بين الرجيمات الكيمائية اللي كنت بعملها لان مفيهوش اي حرمان خااااااالص
وبنت عمتي كانت عاوزة تخس شوية عشان خطوبتها ف مشيت عليه 3 اسابيع تقريبا وخست 6 كيلو ماشاء الله
واختها الاكبر دبدوبة زيي كده ف زودت عدد اللقم بقو 10 عشان وزنها تقيييييييييييل زيي كدا ونزلت 7 كيلو الا كام جرام
وانا داخلة علي 4 يوم اهو وبدأت اتعود علي الكمية دي والحمدلله
الفطار :7 لقمات من اي حاجة تحبيها مهما كانت دسمة (ممكن نشرب معاها اي مشروب احنا عاوزينه حتي لو كان بسكر ولبن بس السكر ميزيدش عن معلقتين )
السناك (اجباري)(بعد 3 ساعات ) : اي ثمرة فاكهة او نصف موزة او 6 فرولات او نصف كوب عنب او كوب بطيخ او شمام او كوب شوربة او كوب زبادي صغير عادي او بالفاكهة
الغدا (بعد السناك بساعتين علي الاقل ) : 7 لقمات من اي حاجة تحبيها مهما كانت دسمة
السناك (بعد 3 ساعات ) : اي قطعة حلويات في حجم علبة الكبريت (اجباري حلويات 3 ايام اسبوعيا ع الاقل )
امثلة :نصف صوباع تويكس او فلوتس – معلقتين كبار ام علي او رز بلبن او مهلبية او..او …. – مكعب شيكولاتة جالكسي سادة او محشية او قطعة ويفر قد الصوباع – قطعة قد علبة الكبريت بسبوسة او هريسة او مكرونة باللبن – قطعة واحدة بس من صوابع زينب او قطعتين من لقمة القاضي – كوب جيلي صغير او نصف الكوب الكبير -بولة ايسكريم اي نوع _ ربع كيكاية هوهوز وامثالها
وممكن لو مش عاوزة حلويات تبدليها بمعلقتين سكر تحطيهم علي اي مشروب
العشاء (بعد السناك بساعتين علي الاقل ) : 7 لقمات من اي حاجة تحبيها مهما كانت دسمة بس استني ساعتين قبل النوم
الشروط بقي
45 دقيقة مشي يوميا علي الاقل
السكر الدايت مسموح بأي كمية
مسموح بنصف كوب لبن كامل الدسم يوميا بتاخدوه بأي طريقة تحبوها
مفيش اي مواعيد للوجبات بس اهم حاجة نلتزم بالاوقات اللي بينهم
والميه بتتشرب قبل الاكل بـ 10 دقايق او بعده بساعة
لترين ماء علي الاقل يوميا
طبعا الرجيم عجيب بس والله بيخسس والله العظيم و بيبان شكل ووزن
واللي عرفته بعد كده ان الرجيم ده هو تطوير بسيط لرجيم اللقيمات عشان الناس اللي مبتبصش في الساعة زيي وبتجوع بسرعة
وطبعا اللي فات ده للاوزان تحت الـ 90 كيلو
اما اللي فوق الـ 90 بقي زيي كده
هيمشوا علي نفس الحاجات بس هياخدو 10 لقمات بدل الـ7
وبالنسبة للناس اللي هتستنصح وتقولي مش عاوزة السكر ولا الحلويات هقولها مااااااشي بس هتخسي ببطئ يا ناصحة
عشان مخك بيتغذي علي الجلوكوز اللي موجود في الحلويات والسكريات دي وبعدين بيدي اشارات للجسم انه يحرق فالحرق يبقي اسرع
نسيت اقولكو ……الميزان اخر الاسبوع بس
و اول يومين هما اصعب يومين وبعد كده هتبدأو تتعودو علي الكمية دي
والحاجة اللي تكسف بقي لما الواحد يقعد يعد اللقم اللي بياكلها ف العادي هيلاقي انه طفس اوووووووووووووووي
و اللي لاحظته علي بنات عمي انه صغر معدتهم شوية عن الاول …حتي العروسة حبت مرة تعك وهي خارجة مع خطيبها (كان عازمها علي كباب بنت المحظوظة ) ومعرفتش تاكل الكمية اللي كانت بتاكلها الاول دي كلت لقمتين زيادة وحست ان بطنها وجعتها راحت سايبة الاكل
انا وزنت يوم ما بدأت وكنت 110.600
وهوزن يوم الاتنين وهقولكو النتيجة ان شاء الله
ويارب تستفيدو وتمشو معايا
ومتنسوش التقييم يا حلوين عشان الموضوع يثبت
sweety mshmsha sweety mshmsha 858391_3.gif فتكات نشيطة Fatakat 858391 الجيزة – مصر