بسم الله الرحمن الرحيم
السلام عليكم ورحمة الله وبركاته
ازيكوا ياحبايبي ياحلوين يارب تكونوا جميعا بالف خير
بصوا انا لما بحب اعمل اكله جديده عليا بحب اخد معلوماتها من اكتر من مصدر لان كل واحده وليها طريقتها وتكاتها .. ودا ال عملته لما نويت اعمل كنتاكي .. دورت وبحثت وقرأت كثيرا كثيرا …. واخيرا طلعت بالنتيجه دي وطبقت ما قرات ولكن بطريقتي الخاصه .. ارجو المعذره انا لم اضع صور بصراحه موضوع التصوير دا صعب عليا قوي لكن انا هشرحلكوا بالتفصيييييييييييل الممل!!!
الوجبه عباره عن (كنتاكي – ريزو – بطاطس محمره)
بسم الله
نبدأ بالبطاطس …. قبلها بيوم قشرتها وقطعتها صوابع وقليتها لمدة 5 دقائق فقط وصفتها من الزيت ولما بردت حطيتها في الفريزر ثاني يوم طلعتها وسبتها تفك شويه وحطيتها في زيت غزير سخن وهو نص مجمده وطلعت طريه من جوا ومقرمشه من برا واحتفظت بقرمشتها طول اليوم وطعمها كان رووووعه
الفراخ … ( ياريت الفرخه تكون بايته بيوم على الاقل قبلها في الفريزر علشان دا بيخلي لحمها ناعم ومش يشد في الاكل) فرخه 2 كيلو تقريبا قطعتها 10 قطع واحتفظت بالرقبه وجزء من الهيكل وعملت بيهم حلة شوربه صغيره للرز… بعد تقطيع الفراخ اعملي فتحات في كل قطعه علشان تتشرب التتبيله وكمان تساعد في التسويه وسيبيها منقوعه في مايه وملعقتين خل على ماتجهزي التتبيله بتاعتها
التتبيله عباره عن ( 6 ملاعق صلصه – ملح – فلفل اسود – ملعقه صغيره شطه ماتخافيش مش هيكون حراق ولو عاوزاه سبايسي زودي الشطه براحتك – 3 فصوص ثوم مفرومين – اي بهارات تانيه عندك تحبيها )
نصفي الفراخ من المايه والخل ونقلبها في التتبيله دي كويس جدا وندخل في الفتحات ونسيبها في الثلاجه لثاني يوم.
جينا بقى لثاني يوم … ابدأي بالاتي :
تتبيلة الدقيق عباره عن … (نصف كيلو دقيق – باكو بيكنج باودر – كيس فيجيتار حار – ملعقتين كبار نشا – ملح – فلفل – ملعقة كبيره كاري او كركم) اخلطي كل المكونات كويس وطلعي الفراخ من الثلاجه هتلاقيها اكتسبت لون الصلصه الاحمر الجميل حطي قطعه قطعه في الدقيق المتبل وتبليها كويس لغاية ماتخلصي العشر قطع وحطي الدقيق على جنب …. هاتي مايه مثلجه جدا ونزلي فيها قطعه قطعه ثانيه يادوب تبليها يعني وطلعيها على باقي الدقيق وقلبيها فيه كويس مع الضغط(كانك بتجبسيها كدا يعني ) ولما تخلصي الكميه كلها حطيها في الفريزر على ماتعملي الرز
رز ريزو … رز من العادي بتاعنا اغسليه وانقعيه وعلى كل كوب رز هنحتاج ملعة كبيره سكر وفص ثوم .. انا كنت عامله 4 اكواب رز .. هنفرم بصله وسط ومعاها 4 فصوص ثوم .. وفي الحله نضع 4 معالق سكر كبار وقلبيهم الى ان يتكرملوا (لونهم يبقى بني) وبعدين هدي النار وضيفي البصل والثوم وقلبي وحطي ملعقتين زيت وملعقه واحده صلصه وقلبي وبعدين حطي كوبان من الشوربه ال انتي عملتيها وصفي الرز وحطيه وحطي ملح وفلفل وقلبي وكملي تسويته عادي
نيجي بقى لاخر مرحله واهم مرحله وهي قلي الفراخ … اولا كدا هاتي حله كبيره على عين متوسطه وحطي فيها زجاجتين زيت (وماتخافيش مش هترميه)وسيبيه يسخن جدا وطلعي الفراخ من الفريزر وانزلي بيها في الزيت وطبعا مش كلها مره واحده يعني ال 10 قطع هتقليهم على مرتين وماتخافيش ولا هتترتش ولا حاجه خالص سيبيها 5 دقائق على نار عاليه وبعدين غطي الحله وهدي النار خالص لمدة 10 دقائق بعد كدا اكشفي الغطا علشان تقرمش وعلى النار سيبيها كمان ربع ساعه بس تتابيعيها وتقلبيها لحد ماتاخد اللون الذهبي الغامق الجميل تطلعيها على ورق المطبخ وتحطي فوقيها كمان ورق علشان يمتص الزيت ودخليها جوا كيس علشان ماتجلدش منك وسيبي الكيس موارب بس علشان ماتعرقش وهتكليها مقرمشه وطعمها روعه وكمان مستويه جدا مافيهاش ولا نقطة دم بس سويها زي ماقولتلك بالظبط
يارب اكون اقدرت افيدكوا مع اني عارفه ان كلكوا اشطر مني .. وشكرا لكل جميله فيكوا هتنور موضوعي مواضيع هذا القسم برعاية
وجدت قرة عيني في زوجي وجدت قرة عيني في زوجي images/flowersavatars/avatar0012.jpg فتكات ست الكل Fatakat 689021 القاهره – مصر