انا هتكلم على المستوى المتوسط يعنى اللى عاوزة تقلل او تزود براحتها بس بلاش اسراف ان الله لا يحب المسرفين ..والأفضل لو جبتى حاجات مكررة او جاتلك هدايا اتبرعى بيها لجمعيات بتزوج او لو تعرفى حد بيجهز وامكانياته محدودة صدقينى حياتك الزوجية هتكون ليها طعم تانى وبركة غريبة افضل من جهاز اميرة عصرها وزمانها
الجزء الأول :المفروشات
اولا: الملايات :-
12 ملاية لغرفة النوم (9 مطرز , اختارى نوعيات كويسة عشان التطريز ميفكش او ينسل)
( 3 قطن منقوش , هاتى اشكال شيك )
2 ملاية لغرفة الأطفال ( على حسب عندك معيشة او أطفال وعلى حسب عدد السراير)
ثانيا: الأغطية :-
مفرش العروسة بلاش المطرز اوفر هاتى مطرز خفيف عشان ينفع فى الاعياد والمناسبات ميبقاش استعمال اول يوم وبس
3 بطاطين لغرفة النوم ( عشان فى البرد الجامد هتتغطو باتنين ولحاف لو هتغسليهم بقى هتتغطو بايه !)
2 لحاف فيبر لغرفة النوم ( برضه واحد احتياطى عشان لو التانى اتغسل)(واحد غالى والتانى رخيص احتياطى)
2 مفرش سرير موهير لغرفة النوم ( بدل مكنا بنفرش بطانية تحتينا عشان البرد فى مفارش موهير اشكال شيك اوى )
3 كوفرتة لغرفة النوم
1 بطانية أطفال
1 لحاف فيبر اطفال
1 كوفرتة لغرفة الأطفال
1 مفرش موهير لغرفة الأطفال
### حاجات الاطفال يعنى لسرير 120 مش للبيبى عشان تعيش معاهم العمر كله ومش شرط اشكال كرتون للأطفال ممكن تكون الوان زاهيه بس ولما تخلفى زودى براحتك
###ممكن متجيبيش حاجة الاطفال خالص كفاية علينا الجهاز هاتى بس ملايتين و بطانية والباقى لما تخلفى
###البطاطين 4 لانى مبفضلش الطبقتين تقال اوى ورخمين فى الغسيل وبيكبسو على النفس الاحسن 4 طبقة واحدة وممكن 2 برضه حلو اوى
ثالثا:الفوط :-
12 فوط كبيرة (بلاش الاطقم هاتى فردانى احلى وعشان التنوع)
12 فوط صغيرة ( مش الصغيرة اوى هاتى الوسط عملى )
2 بشكير ( ده لو بتستخدميهم , لكى و لزوجك) وممكن تخليهم 4 لو بتستخدميهم كتير
2 برنس ( طقم عروسة واحد ليكى ولزوجك) ده لو بتستخدميه بالنسبالى مش عملى خالص
فوط صغيرة نسائية
8 فوط للمطبخ ( 4 صغيرين للتنشيف . 4 لمسح الرخامة وكده )
### بلاش القطيفة عشان مش عملية خالص حتى للضيوف فى قطن مطرز شيك اوى
رابعا:احتياجات غرف النوم :-
مقسمات للأدراج
منظم للدواليب
اكياس حفظ الملابس زى بتاعة البطاطين
شماعات مختلفة على حسب إحتاجاتك
أكياس صغيرة اورجانزا لوضع معطر فى الدواليب والأدراج (بتتباع فى محلات 2ونص)
2 شنطة للسفر
### لو هتفصلى غرفة النوم او المحل بيوفرلك تضيفى اى اضافات اختارى تقسيم مناسب للدولاب
### علب الجزم االى هتشتريها مترميهاش عشان لو هتشيلى تحطيهم فى علبهم وهكذا اكياس الكوفرتات والالحفة واستغلى اكياس الملايات لتخزين الملابس
خامسا:المفارش:-
رول مفارش بلاستيك للدولاب والادراج فى اشكال حلوة اوى.
مفارش مطرزة لغرف النوم على حسب حجم الكمودينو والتسريحة او اى حاجة زيادة .
رول مفارش بلاستيك للمطبخ متكونش مخرمة عشان متتقطعش من الميه وكمان للجزامة.
ستائر للشقة.
ستارة للحمام ( بانيو,شباك) ستارة للمطبخ (للشباك لو مفهوش شفاط , وممكن للباب ).
طقم سجاد للحمام , واحدة للمطبخ.
سجاد للشقة.
سجادة صغيرة امام باب الحمام وممكن المطبخ , سجادة امام باب الشقة.
مفرش سفرة مشمع لاثناء الاكل – مفارش للسفرة اللى هى بتتحط عند الاكل .
.مفارش السفرة ( للنيش لو تحبى . البوفيه , الترابيزة ) جوه البوفيه والادراج رول بلاستيك او مفارش
. مفارش مطرزة ( للانتريه والصالون ولباقى الغرف )على حسب عدد الترابيزات واحجامهم
.مفارش سجادة عان الانتريه للاطفال ميبهدلوش السجادة
2 سجادة صلاة + 3 إسدال صلاة
### متنسوش لما تشترو اى حاجة فى الجهاز متجيبوش كل حاجة واعملوا حساب الهدايا
### لما تفرشى جهازك متطلعيش كل حاجة يعنى على قد الاستخدام العادى والباقى شيليه للاعياد والمناسبات الخاصة ولما اللى طلعتيه يقدم ويتهرى
ويارب يفرحكو كلكم يارب وتتهنو فى حياتكم
الجزء الثانى : ملابس العروسة :-اولا:ملابس الشتاء:-
6 بيجامات شتوى
6 جلابيات شتوى
6 طقم بيتى(بنطلونات+باديهاتبلوفرات شتوى)
3 لكلوك شيك شبشب شتوى مبطن شرابات شتوى بيتى
1 روب شتوى طويل
2 بيجاما او جلابية شتوى وصيفى للتنضيف (هاتيهم رخاص اوى) واول مجوزك ينزل تلبسيهم وتشتغلى بيهم لحد قبل مييجى تغيرى وتلبسى الحاجات الحلوة
### اللى مبتحبش الجلابية زيي بلاش تجيبيها هاتى بدلهم بيجامات او ممكن تجيبى 3 بس عشان الحمل
ثانيا:اللبس الصيفى :-
4 بيجاما هوت شورت
4 بيجاما برمودة
4 بيجاما بنطلون
6 قمصان قطن دلع للبيت ( كت ونص)
6 طقم بيتى (بنطلونات + بديهات)(ممكن تزودى البديهات)
4جلابية صيفى
1 روب صيفى (بالنسبالى ملوش لازمة بس ممكن يتلبس فوق الهوت شورت وكده)
شباشب +شبشب بلاستيك للحمام
###اهم حاجة متزوديش عن كده عشان مقاسك اكيد هيتغير الاحسن خلى فلوسهم معاكى وبعد الخلفة يبقى اشترى لان كمان هتزهقى انتى وجوزك من شكلهم وهتحتاجى تجيبى اشكال جديدة وبعد الجواز هتعرفى ايه اللى هتستخدميه اكتر وايه اللى مبتلبسهوش
ثالثا:الملابس الداخلية:-
6 قميص داخلى حماله (لو مش بتحبى تلبسيهم بلاش)
6 فانلة داخلى حمالة
2 شورت زى كارينا تحت لبس الخروج
2 بنطلون كارينا ولو بتحبى الكورساج هاتيه
6 برا قطن للبيت
6برا للخروج
6اندر اثناء الدورة يكون قطن ورخيص
12 اندر قطن مشكل للبيت
6 اندر فتله (دلع للبيت)
6 شرابات لفوق الركبة خفيفة وفيها حركات تحت اطقم الدلع الصيفى والشتوى
رابعا: اللانجيرى:-
قميص ليلة الدخلة هاتيه مطرز خفيف عشان ينفع بعد كده+ روب منفصل ابيض طويل يليق عليه وينفع على باقى القمصان
6 قميص قصير
4 قميص طويل
4 بيبى دول
3 هوت شورت حرير او برموده
2 بيجاما حرير بكم (لو مش بتحبيهم بلاش)
### بلاش قمصان غالية اوى لان صدقينى مش فارقة مع الرجالة اهم حاجة تحاولى تعرفى هو بيحب اشكال ايه انا كل قمصانى الغالية جوزى مبيحبهاش
###متجيبيش اندرات لوحدها للانجيرى لانهم بيجو معاها وغير كده بعدين مش هتستخدميهم
### بلاش اللانجيرى اللى بروب لانه ملوش اى لازمة
### اول الجواز شيلى كام واحد عشان لو زهقتو من شكلهم يبققى عندك حاجة جديدة وللمناسبات
### ممكن تقللى فى الطويل او القصير او تزودى على حسب هو بيحب ايه اكتر
خامسا : لبس الخروج:-
ده بقى زى متحبى بس الوسط خليهم 6 اطقم
الجزم والشنط هاتى 3 الوان بس تليق على كله (ابيضاسودبنى)
الطرح بالباندانات تلبييسة رقبة
شربات فوال لو بتلبسيهم
الجزء الثالث : السفرة
طقم صينى كبير للضيوف
طقم جاتوه (ممكن الاستغناء عنه وتحطى الحلويات للضيوف فى اطباق الصينى الصغيرة)
طقم عشا صغير (19قطعة)(للزوجين للمناسبات او لضيوف قريبين)
شنطة ملاعق ( او ممكن تجيبى دستة من كل حاجة اوفر)(ملاعق كبيرة وصغيرة+شوك كبيرة وصغيرة+سكاكين كبيرة)+(طقم توزيع شيك)
2 طقم خشاف
3 طقم عصير شربات
1طقم كاسات جيلى وتنفع فروت سلاط وايس كريم
4 طقم كاسات
طقم شاى (هاتيه رخيص بس شكله حلو عشان هو منظر بس)وانا لو منك مجيبهوش
طقم قهوة (نفس فكرة طقم الشاى)ده ممكن اجيبه
2 صينيه تقديم شيك حجمين مختلفين
ملاحة و سكرية للسفرة
طبق فاكهة شيك للسفرة
بونبونيرة شيالة كحك
###صدقينى ده بس اللى هتحتاجيه (حاجات بسيطة وشيك احلى مليون مرة من الزحمة ورخيص واشكال مش حلوة)
###ورد مجفف وكريستالات ملونة وتحف للنيش
جنة يويو جنة يويو فتكات رائعة Fatakat 758958 القاهرة – مصر