بسم الله الرحمن الرحيم
سبحان الله وبحمد عدد ماكان وعدد ما سيكون وعدد الحركات والسكون
صباح/مساء الفل والياسمين على فتوكاتى الحلوين
كيفكم يا مقطقطين؟
يارب تكونوا بخير ومزأططتين
النهارده باذن الله هيكون اول يوم لينا فى جروب
<<هخس وبخفه ودلع هاتنطط ..جسمى هيبقى رشيق ومقطقط>>
شعارنا فى الجروب
<<هتحدى نفسى .. علشان نفسى>>
بس قبل ما نبدأ خشى بسرعه بسرعه على لينك الموضوع ده علشان تفتكرى الكلام اللى خلاكى اتحمستى وبقيتى عايزه تشتركى معانا
وياريت وانتى بتقرى ركزى اوى اوى على اهداف الريجيم واحنا ليه عايزين نخس وان احنا بنعمل الدايت بمعنى جديد ومفهوم مختلف
https://fatakat.univanet.com/#2389533
خلاويص قريتى؟؟
حفظتى اهداف الريجيم؟
طب يلا انا هسمعهملك تانى..علشان كل ماتدخلى الجروب تقريهم
-شكلى قدام نفسى وقدام الناس ما ينفعيش اعيش دور الاميره والوحش يبقى جوايا الاميره وقدام الناس الوحش
-علشان اتنطط براحتى واخرج براحتى والبس براحتى ومابقاش مكسوفه من شكل جسى وبداريه كأنى عامله جريمه
-علشان اتمتع بنفسيه كويسه وثقه بالنفس
-علشان مش كل شويه اسد ودانى عن كلمه بتضايقنى
-علشان ما اعانيش ايام وانا بظبط طقم البسه وشكلى مايكونش فيه تخين وافضل تخينه فيه برده بس انا قال يعنى مش واخده بالى
-علشان لما تبقى مع خطيبك او جوزك ما يقولوش ده قمرر واخد الدبوب ده ليه؟
-علشان لما اتجوز احمل واكون ام بسهولة
-علشان لما ادخل محل لبس يبقى قدامى كل حاجه مش حاجات معينه هى اللى تفرض نفسها عليا
ولما احب البس اى طقم من بتوعى البسه فى وقتها مش اقول لما ابقى اخس بعد عمر طوويل
-علشان ما اشوفش بسمه عايزه تبقى ضحكه على شفايف اى حد علشان جت سيرة التخن والتخان وانا موجوده
-علشان اصلى بكل سهوله يعنى عضمى مايوجعنى وانا ساجده واقف من غير تعب فى قيام الليل
-علشان صحتى تفضل كويسه وده سبب كفايه لوحده
-علشان ابطل اهرب من البص فى المرايه وكأنى هصحى على كابوس مفزع
-علشان اكون زى ما انا عايزه اكون
-علشان اكون مزه مش جثه
-علشان اكون اميره من بره ومن جوه
-علشان كرامتى اهم من الاكل
متهيألى ان كلنا كتيييييير حبينا نعمل ريجيم بس الريجيم ما حبش!!
تفتكروا ليييه؟!
why?!!
انا اقولكوا
من قبل كام يوم سمعت كلمه كده ضايقتنى من حد فزعلت جامد وروحت وانا مقرره يا انا يا الريجيم بقى النهارده
وشمرت دراعاتى وهاتك يا كتابه فى الاهداف وفى الجدول وفى المعرفش ايه؟
وكان ماشى الموضوع قشطه بالموز
واول يوم كنت ملتزمه بصوره غير طبيعيه ده انا كمان كنت كاتبه الفطار نص رغيف ساده والغدا طبق سلطه والعشا تفاحه
ومشيت عليه وماكلتش فتفوته زياده تصوروا!!
جيت تانى يوم
كنت كاتبه اكل معقول شويه بس عكيت فى بتاع يجى 300 سعر زياده
تالت يوم وانا قاعده ازاكر فى امان الله قمت ولا قومة احمد عربى ورحت رازعه الكشكول وقايله
لا
الاكل واحشنى
وشمرت نفس التشميره اللى كنت مشمراها وضربت فراخ ومحشى
بعد بقى بعيد عنكوا ماضربت الفراخ والمحشى
بصيت فى المرايه لقيت دبوب ضغنن كده واقف قدامى
فضلت بقى اكلم فى نفسى واقول : اد كده انا ضعيفه قدام الاكل مع انه عدوى بيضرنى ما بينفعنيش
حرامى بيسرق احلى لحظات حياتى ويخبي اللحظات اللى سرقها دى متنكره فى صورة دهون
وفضلت افكر قولت ليه لسه ماجاش الميعاد اللى ربنا يستجيب فيه دعواتى بانى اخس
مع ان دى دعوتى الاولى من يجى 5 سنين كده
اكيد انتى كمان دعيتى ربنا كتير اوى ما احنا مالناش غيره
هتقولى يعنى انا هاكل وادعى فهخس
هقولك لا
يعنى بينى وبينك ما دعيتيش وقولتى يارب ادينى الاراده؟
اكيد قولتى
ولو ما قولتيش اديكى بتقولى دلوقتى يارب ادينى الاراده
كده كده مافيش دعوه مش بتستجاب
ربنا اللى قال كده قال
(اجيب دعوة الداعى)
يعنى مافيش شك فى الاستجابه
بس يمكن ربنا لسه عايز يسمع صوتنا اكتر ويباهى بينا ملائكته اكتر
افتكرى دايما انه مافيش يأس طول ما ربنا موجود وطول ما انتى بتدعيه هستجيب بس فى الوقت المناسب
(اليس الله بكاف عبده)
بس واحده تسألنى انتى ليه بتقولى الكلام ده دلوقتى؟
علشان ده السبب اللى خلانى اكتب الموضوعين اساسا انا كنت بدعى بس بسلبيه قلت اكيد ربنا ليه اسبابه فقررت انى اكون ايجابيه واشجعك واحمسك و اساعدك على تحقيق حلمك حتى لو حلمى ما اتحققش اكيد هكون فرحانه انى كنت 1% فى انك حققتى حلمك
تحقيقك لحلمك هيدنى اراده اكتر انى كمان احقق حلمى
فأنا ان شاء الله هكتبلكوا كل الحاجات اللى مجمعاها من اول ما بدأت الريجيم وكل الوصفات اللى نجحت وكل الوصفات اللى مانجحتش وكل الحاجات اللى هنحتاج نعملها جمب الريجيم علشان نحافظ على شعرنا وبشرتنا
يوووه نستونى ما كملتلكوش حكاية لما وقفت وقولت
لا
الاكل واحشنى
تفتكروا ليه كلنا ما بنكملش وبنعمل كده؟؟
اول حاجه لأننا مش بنبقى مهيأيين نفسا صح للريجيم وبنعمله علشان يا سمعنا كلمه ضايقتنا او عايزين نبطل نسمع كلام بيضايقنا فأول ما تأثير الكلام السخيف ده بيروح بيروح الدافع بالتالى بتحسى ان الاكل فعلا وحشك اووى وكأنه ابنك اللى تاه منك فى دريم بارك
تانى حاجه كأننا بنبقى قاصدين نعمل دايت رخم وممل وده من باب الرخامه بس وليس الا
تالت حاجه بنعيش فى دور المحرومين على فكره اللى هتعمل معانا الدايت وتعمل نفسها جايه من مجاعه فى الصومال تروح تقعد مع اخواتها فى الصومال احسن
رابع حاجه والاهم ان بنقول اننا ماعندناش ارادة
يعنى ايه عايزه اعمل ريجيم بس ما عنديش اراده
شكلك ما تعرفيش عربى كويس
اعوز هى اريد
اريد جايه من اراده
يعنى انتى عايزه اصلا دى نابعه من كلمه ارده
ومافيش حاجه اسمها اراده بتروح وتيجى الاراده دى جوانا على طوول احنا بس اللى بنهبطها واحنا اللى بنرفعها
طب نرفعها ازاى؟؟
خليكى استغلاليه
ايوه استغلاليه!!
استغلى طاقة كل اللى حواليكى سواء كانت طاقه ايجابيه بيرفعوا من روحك المعنويه وبيقوكى او طاقه سلبيه بيهبطوا من عزيمتك وبيضايقوكى الطاقه الايجابيه هتقويكى وتشجعك زى النجمه اللى كنا بناخدها فى المدرسه جمب العشره من عشره اللى بتخليكى دايما مستمره علشان تفضلى تاخدى النجمه
والطاقة السلبيه دى هى اللى بيها هتخلقى الدوافع وهتخليكى تاخدى قرار ايجابى بانى هخس واتحدى نفسى علشان نفسى
هتخليكى تقولى ان كرامتى اهم من الاكل وانك مش هتسبيه يسرق منك حياتك تانى
الكلام اللى فوق ده تبع اول خطوه واهم خطوة فى الريجيم الاوهى التجهيز النفسى
اللى هى بتتلخص فى انك ازاى تقنعى نفسك انك فعلا عايزه تخسى
غمضى عينك واتخيلى معايا انك طالعه دلوقتى 10 سلام يلا غمضى وعدى واتخيلى
1
2
3
4
5
6
7
8
9
10
تعبتى؟ لالا مافيش تعب
انتى دلوقتى ماشيه فى مكان الضوء فيه قليل بس كل مرايات شايفه نفسك؟
بصى كويس فى المرايه..ها شايفه نفسك ازاى؟
الصوره مش عجباكى مش كده
طب غمضى عينك قدام المرايه وقولى توكلت على الله انت حسبى ياربى اعاهدك يا الهى ان اعود كما خلقتنى فى (احسن تقومى) فساعدنى وقل لجسدى كن رشيقا متناسقا فيكون
وخدى نفس عميييق وشوفى نفسك فى نفس المكان اللى مليان مرايات بس الدنيا منوره على الاخر ايه النور ده كله؟
هو انا بقيت من نجوم السينما وانا مش واخده بالى؟
يمكن
ويمكن ده نور الاراده اللى انتى كنتى خفياها جواكى لدرجة انك فكرتى انها ضاعت
بصى انتى حلوه ازاى كده جميل اوى الفستانى اللى انتى لابسه ده !! ايه الون الجميل ده
ابيض ولا كأنك عروسه ليلة فرحها
كنتى بطلتى تلبسيه علشان كان بيبنك مليانه
بس دلوقتى خلاص البسى كل اللى انتى عايزاه
كفايه بقى بص فى المرايه ويلا نروح نشترى لبس جديد بس اهم حاجه بكل الاطه تقولى للبنت اللى فى المل اللى كانت بتجبلك اللارج والاكس لارج والاكس اكس اكس لارج تقوليلها اصغر مقاس لو سمحتى
خدى نفس كده؟ شميتى ايه ده؟ ريحه اكل!!
استنى استنى رايحه فين؟ انتى نسيتى عهد الله ولا ايه مش عايزه ترجعى زى ما ربنا خلقك فى احسن تقويم!!
يبقى نلخص الكلمتين تانى بتوع التجهيز الداخلى والتهيئه النفسيه وازاى تقنعى نفسك انك عايزه تخسى
اول حاجه خليكى استغلاليه واستغلى طاقة كل اللى حواليكى ايجابيه او سلبيه ياهيسعدوكى تكملى يا هيخلقولك دوافع جديده
تانى حاجه شيلى من مفهومك ان الريجيم حرمان وجو المجاعات والكلام ده ما انتى كلتى كتير قبل كده وراح الطعم اللى استمتعتى بيه وفضل تأثيره السلبى وبس
تالت حاجه اوعى تسمعى نفسك كلمة ما عنديش اراده الاراده دى الكنز اللى اتدفن فين الدهون دورى عليه وامسحى الدهون اللى حواليه
رابع حاجه افتكرى دايما دايما دايما ان كرامتك اهم من الاكل ومش هتسبيه يسرق لحظات حياتك ويخبى جريمته جوا جسمك فى شكل دهون وسعرات مالهاش لازمه
خامس حاجه اول ماتحسى باستماله للاكل غمضى عينك وشوفى البنت الجميله اللى واقفه قدام المرايه وهى فرحانه بشكل جسمها ومليانه حيويه وثقه بالنفس وافتكرى ان دى الاميره اللى عايشه جواكى فى خيالك و ان الاوان علشان تتحدى انتى وهى فى جسد وروح واحده وتبقوا واقع مش خيالات
اخر حاجه والاهم انك تفتكرى عهد الله انك هترجعى زى ما خلقك ربنا فى احسن تقويم
وبكده نكون خلصنا مرحلة التجهيز النفسى
عايزه اقول حاجة صغيره كمان
ايه هى؟؟ انتى بتعملى الريجيم بينك وبين نفسك فخليه سر لنفسك
يعنى مش لازم من اول يوم تفضحى الدنيا وتقولى انا عامله دايت وبعمل وبخطط
علشان مش كل يوم تيجى واحده لطيفه تسألك ها؟ خسيتى اد ايه؟ 200 جرام
او و انتى خارجه احنا رايحين نشرب عصير قصب تيجى معانا ونديكى شفطه ولا هتبوظ الريجيم
يااه رخمين اوى لو حد بيعمل كده
افتكرى ان عندك هدف وانك هتفضلى متمسكه بيه
عايزين كمان مانعترفش بالميزان عايزين نعترف بالمقاس وبس لان احيانا الجسم ما بينزلش على الميزان بس بيكون بيعمل اعاده لتوزيع الدهون هاتى حاجه بتحبيها اوى وكل شويه تلبسيها وبصيلها كويس وقولى يااه انا بدخل فى كل ده وقولى من هنا ورايح كفايه لحد هنا
على فكره كمان احنا دلوقتى داخلين فى عز الشتا ومعلومه مؤكده ان الجسم بيستعد لفقدان الوزن فى الشتا اكتر من الصيف بكتير ومعدل الحرق بيتضاعف تقريبا يعنى لازم نستغل كام الشهر بتوع الشتا دول
وافتكرى كمان ان الحكايه عايزه بس شوية صبر وثقه بالنفس انك هتقدرى تحققى كل حاجه انتى عايزاها وبتحلمى بيها
من هنا هتلاقى الممنوعات والمسموحات والحاجات اللى ممكن نبدلها علشان نقلل السعرات
https://forums.fatakat.com/showpost.p…88&postcount=9
الرياضه والرقص والدلع كله من هنا
https://forums.fatakat.com/showpost.p…5&postcount=19
ومن هنا ازاى هنحافظ على بشرتنا وشعرنا مع الدايت
https://forums.fatakat.com/showpost.p…3&postcount=25
ومن هناااا الدااايت نفسه انطلقوااااا
https://forums.fatakat.com/showpost.p…0&postcount=37
لورا القلبوظه لورا القلبوظه 325052_2.gif فتكات نشيطة Fatakat 325052 cairo – egypt