ازيكوا يا عرايس ياللي طالع عينكوا زي حالاتي في الجهاز و بابا بيشد في شعره من المصاريف و عامل فيها مش سامع
ندخل علي المفيد انا امبارح بفضل الله اشتريت الاجهزه و كان فيه تخفيضات كويسه و ده طبعا بعد لف و دوران لما دخنا
انا جايه اقول انا جبت ايه عشان نستفاد انا مش بحب اقول ابدا حاجه علشان في بنات للاسف ظروفها متسمحش فأي حاجه كنت بجيبها مش بقول عليها حفاظا علي مشاعرهم لكن الاجهزه بقي قولت اقولكم عشان انا استفدت من الشرا و لازم افيدكوا رغي رغي خلصينا بقي طييييييييييييييب حاضر هقول اهوا
اولا
البوتجاز جبت يونيفرسال عامل 1950 بس احنا جبناه ب1900 و هوا اصلا نازل عرض يعني هوا كان ب2017 و شويه
طيب انا ليه جبته ؟؟؟؟؟؟
انا الصراحه كنت راحه اجيب كريازي القديم كلنا عارفين انه راااااااااائع و معلوش اي غبار و لا نص كلمه و هوا عندنا من ايام مكنت في اعدادي و شغال زي الفل و كنت راحه اجيبه فالراجل قالي تعالي اوريكي موديل اخر بينافسوا و فيه مميزات اكتر ايه المميزات بقي ( ضمان 10 سنين + بيشتغل الفرن شوايه و فرن في نفس الوقت و ده طبعا اللي بيخلينا نلجأ للافران الكهربا + الفوين بتاعته من فوق لو باظت لقدر الله بتتصلح من فوق لانها ظاهره مش محتاجه تفكي الوش كله ) و كل المميزاااااااااات دي للاسف مش موجوده في كريازي و قعدت افكر و افكر لغايه ما قررت اجيبه و توكلت علي الله و جبته و ان شاء الله يريحني و يبقي كويس
ثانيا التلاجه
جبت ال جي 18 قدم عامله 3600 ده اقل سعر في السوق لقيته
ليه ال جي ؟؟؟؟؟
برده طول الخطوبه و انا بدور علي تلاجه كويسه عندنا في البيت توشيبا لكن للاسف رفوفها بتتكسر بسرعه و ضيقه مبين الارفف لقيت خالي جاب تلاجه جديده سألته نوعها ايه قالي ال جي قولتله دي حلوه قالي ممتازه جدا قولتله طيب التلاجه القديمه كان نوعها ايه قالي بردوا ال جي استعجبت طب ليه غيرتها يا خالو قالي عشان بس اجيب حاجه اكبر شويه فقررت من يومها اني اجيبها و لكن بردوا ابحث عن الاحسن و في الاخر لقيت انها احسن شيء فعلا
ثالثا التلفيزيون
جبت سامسونج 43 بوصه ب3600 طبعا سامسونج هي اول ماركه بالغالم في تصنيع الشاشات روعه بمعني الكلمه و لما كنت بروح كارفور هيا بجد كانت اجمل رؤيه و نقيه جدا انا كنت ناويه اجيب ال جي علشان رخيصه و في نفس الوقت معقوله ماركتها لكن لما لقيت عرض السامسونج جبتها في الحال
رابعا الغساله
جبت ايديال زانوسي 7 كيلو ديجيتال جميله جددددددددددا جدا عملت 2700 مميزاتها طبعا كلنا عارفين غساله يعني ايديال زانوسي بس ايه الجديد بقي عن القديم انها ( حلتها كبيره طبعا + فيها اكتر من 18 برنامج + اي عطل فيها لقدر الله بيظهر علي الشاشه يعني مش محتاج الفني يفك الغساله و يدور علي العيب فين + يتغسل فيها بطاطين فيها مميزات كتير بس مش فاكره بقي )
خامسا الكيتشن
جبت مولينكس عاملي 1250 شامل كللللللل حاجه و كويس جدا انا كنت ناويه اجيب براون بس كنت بدور علي حاجه تشمل كله
سادسا الشفاط البلت ان او اللي فوق الشفاط
عمل 650 بعد 750 نوعه يونيفرسال نازل جديد عن القديم القديم كان فيه فلتر واحد بس ده تلاته فلتر و ليه ضمان خمس سنين و ليه زراير و لمبتين من الجناب اعتقد
سابعا المكوه
جبت بانيسونك ياباني بالبخاربردوا و فيه خاصيه كوي الستائر ب325 كنت ناويه اجيب براون اسباني بس للاسف مبقتش تنزل غير بتصنيع ماليزي و حاجه اسمها هاجري او مجري حاجه زي كده لكن الاسباني تحفه و شغاله عندنا زي الفل طبعا عايزه انوه علي حاجه مهمه اوي كلكوا او معظمكوا مش بتفضلوا البخار عشان بتبوظ بسرعه و للاسف ده مش منها ده بسببنا احنا لانها مش بيتحطلها مايه عاديه لازم يتحطلها مايه مقطره دي بتتجاب من المحطه بتاعه البنزين ازازه كبيره ب2 جنيه و هتفضل المكوه معاكي طول العمرررررر
ثامنا المروحه
جبت فريش الشبح عامله 330 انا كان نفسي اجيب ناشيونال لكن قالولي لاء مبقتش تنزل خلاص الصراحه هيا احسن ماركه في المراوح فسألت كتيييييييير لقيت ان دلوقتي الفريش ممتازه حتي خالي جايبها و شغاله كويس عنده
تاسعا و اخيرا المكنسه
جبت نوع نازل جديد مميزاتها حلوه جدا و فيها فلاتر و فرش تنضيف ب700 هيا نوعها يونيفرسال و كان فيه منها الاقوي وات ب1200 بس انا اصلا عفشي مودرن فمش هحتاج لمكنسه جامده لان السجاد المودرن صغير مش كبير
انا كده خلصت يارب اكون افدتكوا بشي و يعجبكوا الموضوع و ادعولي ربنا ييسرلنا احوالنا يارب و نفنش الشقه كلها بأذن الله انش اء الله الموضوع الجاي هيبقي المطبخ اتفقت عليه و بأذن الله هيطلع جميييييل
لكل البنوتات القمرات اللي سألت انا جبت منين انا اصلا عايشه بالسويس و روحت كاروفور و سألت الاول عندنا لكن لقيت السويس ارخص سبحان الله مع انهم اغلي ناس يلا الحمدلله علي كل الحال
تنبيه مهمممممممممممممممممم جددددددددددددددا
انا هرجع التلفيزيون علشان لقيته مصري للاسف و انا برده استغربت من فرق السعر بينه و بين كارفور و بتاع كارفور كان نازل 700 جنيه مش معقول الشركه هتعمل كل الفرق ده عرض لكن الشهاده لله السامسونج احسن شاشه شوفتها بحياتي لكن مش المصري المصري عاديه جداو ده اللي لاحظته اول ما شوفتها لكن اخويا قال علشان احنا قريبين منها لما نبعد هنلاقيه كويسه فأنا قررت ابدلها بأل جي علشان الال جي مش بتضرب في اي حته هيا واحده في كل مكان بجد انا كنت مبسوطه جدا اني جبت سامسونج لكن سبحان الله ربنا كاتبلي الال جي
samer saad samer saad 144558_3.gif فتكات ست الكل Fatakat 144558 السويس – مصر