واحده سألتني عن شويه معلومات في الشوي بعد ماقرت موضوعي دا
بمناسبه العيد والشوي هعلمك تولعي الفحم من غير جاز ومن غير كبريت طريقه سهله وسريعه جدا
فا كتبت ليها الرد دا وحطيته ليكوا في موضوع هنا عشان يبقي صدقه جاريه عن بابا الله يرحمه لانه هو اللي علمني التكات دي
ودا كان الرد عليها يابنات
اقروه وادعوا لبابا كل ماتنفذوها ان ربنا يرحمه ويدخله الجنه بغير حساب ولاسابقه عذاب
وعليكم السلام ورحمة الله وبركاته
الطريقه ببساطه انك هتولعي الفحم علي البوتجاز بدل من انك تحطي جاز عالفحم وتحاولي محاولات قد تفشل وانتي بتولعي دا غير الدخان والبهدله علي مايولع الفحم
فا الاسهل انك
هتولعي شويه من الفحم وليكن الحتت الكبيره منه وبعدين تنقليهم للشوايه بتاعه الفحم اللي هتشوي فيها وتقلبي الفحم اللي مولع مع الفحم المطفي وتهوي عليه فا هيولعوا بعض بسرعه
واما بالنسبه للشوي الكفته فا في تكه كدا انها لازم تكون مفرومه كويس قوي ومتنعمه يعني واخده مش اققل من 3 او 4 وش بالمفرمه ومتبله طبعا بالخلطه اللي تحبيها
دي حاجه
والاهم انك لما تحطي الكفته عالفحم
قلبيها كتير وباستمرار عشان التقليب بيشمعها وبيخليها تمسك في السيخ ومش تقع عالفحم
لكن لو حطيتيها وماقلبتيهاش هيستوي نصها والنص اللي تحت هيتقل وينفصل من السيخ ويقع عالفحم
وكمان من احسن انواع الفحم اللي مش يعمل دخان جامد هو فحم الفواكه تقولي للراجل عاوزه فحم فواكه او فحم شيشه اللي مش بيعمل دخان يعني فاهماني بس طبعا يكون حتت كبيره عشان مس تدوب بسرعه في الشوي
واول ماتخلصي شوي طفي النار علطول عشان تحافظي علي الفحم اللي فاضل وتستخدميه في مره تانيه
وكمان امان من ان النار تتنسي لاقدر الله
بابا الله يرحمه لما كان بيصبع صباع الكفته كان بيعمل خلطه في الكبه عباره عن بصلايه ونص +طماطمايه وكام فص توم وملح وفلفل ويهارات كفته
وتضرب في الكبه وبعدين بتملسي بيها علي سيخ الكفته وانتي بتصبعيه كدا
يعني كل اما تصبعي سيخ بتبلي ايدك في الخلطه دي وبعدين تصبعي بقي بتفرق في الطعم خالص وكمان ايدك بتكون نضيفه ومش بتلزق منك علطول وانتي شغاله
بس راعي نسبه الملح عشان ما يزيدش منك
ولو هتشوي فراخ
خطي من الخلطه دي علي الفرخه وتبليها بيها وابداي في الشوي وتنفع كمان الخلطه دي للكباب
وبرده هتراعي التقليب المستمر منعا لان الحاجه تتحرق منك
ولو الفحم ناره عليت منه وبدا يحرق في الاكل
ممكن تطرطشي عليه بشويه ميه حاجه بسيطه خالص عشان تهدي النار بس حاسبي لحسن تتطفي النار منك بس كدا شويه طرطشه تهدي النار فقط
وبيتهيألي احسن حته لحمه للكباب انها تكون بتلو عشان تستوي بسرعه
وكمان كل اما تسيبي التتبيله في الفرخه او الكفته اوحتي الكباب كل ماتبقي طعمها احلي
والسلكه اللي بتتكلمي عنها دي اللي في الصوره اللي في الموضوع حلوه لشوي الفراخ جدا وممكن تحطي فيها البفتيك او قطع الاستيك
او الطرب
بس الطرب احسن حاجه ليه انك تحطيه في سيخبن من بتوع الكباب او الشيش طاووق كدا
والطرب عباره عن كفته متبله عادي بس بتلفيها زي المحشي كدا في المناديل بتاعه الطرب بتاعه الخروف ودي بتتباع عند الجزار
ويفضل كمان تفرمي ربع كيلو ليه خروف مع كل كيلو كفته عشان بيديها طعم خرااااافه وطعا سيخ الكفته بيختلف عن سيخ الكباب في انه بيكون مبطط كدا وعامله زي المسطره شويه عشان تستقر عليه الكفته
وفي حجات تانيه ممكن تتشوي زي
ممكن تشوي الفلفل والباذنجان عالفحم و بعد مايسودوا كدا حطيهم في طبق وغطيه اول مايعرق كدا قشريه واعملي بيه اي سلطه تحبيها
ممكن تحطي عليهم فص توم واحد بس ماتزوديش وسنه طحينه وملح ودوقي سلطه باباعنوج مالهاش حل بابا عملها زمان كانت حلوه قوي
وممكن تشوي الخوخ تفكيه من البذر بتاعه وتديله شويه كدا
وبعدين تقدميه مع بوله ايس كريم
وممكن شرايح بطاطس رفيعه شويه تشويها مع الاكل بعد ماتدهنيها بزيت وملح وفلفل
وممكن تعملي كاب من الفراخ اللي هو الشيش طاووك يعني وتشويه عالفحم برده هيبقي حلو
دي خلاصه خبره بابا الله يرحمه في الشوي واللي اتعلمتها منه
والله للشوي دا كانت ذكريات جميله مع بابا ربنا يجعلها في ميزان حسناته ويوسع عليه قبره زي ماوسعها علينا في الدنيا ااااااااااااامين
واي سؤال انا تحت امركوا اهو يبقي صدقه جاريه علي روح بابا مواضيع هذا القسم برعاية
قوطه حمراء قوطه حمراء فتكات غالية قوي Fatakat 404396 استغفري الله – اذكري الله