هاااااى عليكم ياعرايس انا كنت بدخل زائرة القسم ده قبل ماجوز واستفدت منه كتيير قولت ادخل افيدكوا من خبرة سنة ونص جواز وافهمكم تعملوا وتجيبوا ايه ومتجبوش ايه
اسمحلولى ابدا كلامى بيوم الفرح والليلة الموعودة اللى بتسبب رعب للبنات وتحس انها داخلة تتدبح والله الموضوع ابسط من كدة بكتير يابنات ومش حتحسى باى حاجة مادام مش مركزة فى الموضوع وسايبة نفسك لجوزك ولاحساسكم وحبكم وانصحكم تستخدموا الجل ده فى اول جوازكم سحرررررر والله وفى نسبة مخدر يستحسن تستعمليه اول جوزك حيسهل عليكم المسائل
قبل الفرح بشهر او اتنين تنزلى تحجزى فستانك وكوافرتك لانك حتلاقى وقت متاح قدامك بالنسبة للكوافيرة تروحلها تتفقى معاها على اللوك اللى انتى عايزاه ولو حتصبغى شعرك يستحسن تروحى قبلها بفترة تعمللى اختبار على اللون اللى انتى عايزاه فى خصلة ورا من شعرك والمكيب برده تعملى بروفة عليه ومش مهم الفلوس عشان يوم الفرح متتصدميش يوم فرحك احنا عايزين نبقى
برنسيساااات ده يوم مبيتعوضش ومش حينفعك الندم ساعتها وطول عمرك حتفضلى مضايقة انك مطلعتيش زى مانتى عايزة يوم فرحك بالنسبة للفرد منصحش بيه بس لو عايزة يبقى بروتين او كيرايتن زيرو فورمالين بس وبرده مشجعش اى نوع فرد خالص انا الحمد الله ماكنش شعرى محتاج حبة اهتام وبس
والصبغة تروحى تعمليها قبلها باسبوع او 4 ايام قبل الفرح ومافيش مانع ترشى على البنات هناك رشة جريئة علشان الاهتمااااام هما معظمهم كدة للاسف انا والله يوميها طمعوا فى البرفان والمكيب اللى كنت جيباه معايا سيبتهولهم حعمل ايه
فستانك تروحى وتجيى على الاتليه وتهريهم مكالمات تتاكدى من اى حاجة طلبتيها منهم اى تعديلات اى اضافات ده لو حتاجريه وتكرمى البنات هناك باى حاجة عشان يهتموا بكى وبالفستان لحد ماتستلميه وتتاكدى انك مديلاهم اعلى سعر فى التاجير عشان ممكن تضحك عليكى وتطلعه قبل يوم لحد دفع سعر اعلى منك وبتحصل كتيير خالى بالك لو حتشتريه يبقى حلوو اووى انا اشتريت وريحت دماغى من ارف التاجير بس طلبت حبة تعديلات بس عليه وكان تحففففففة عقبال كل البنات
تاخدى معاكى فى الكوافير (ابرة وخيط ابيض او اوف وايت على حسب لون فستانك " فرشة اسنان ومعجون "كاش مايوه بتاعك لو محجبة طبعا"بنطلونك الكارينا اوعى تنسيه "الملابس الداخلية تلبسيها فى البيت وتكون متبرفنة جاااااامد وتحطى فوطة يومية او بتاعة اوليز العادية بس الالترا علشان تكون خفيفة ومريحة وده علشان الاندر يفضل نظيف لحد ماتروحى وعشان يمتص اى عرق ورطوبة وافرازات انا عارفة اننا حنروح ناخد شاور تانى بس لو فرحك فى عزز الشتا بيكون الموضوع مش لذيذ اوووى وكمان كثرة الافرازات والعرق بتعمل ريحة مش حلوة خالص واحنا عايزين نبقى قمرات وخالى بالك من اول يوم لازم جوزك يفتكرها طول عمره من ريحتك ونضافتك هى عنوانك الليلة دى "تاخدى مكياجك وبرفانك واى اكسسوار لو كانت الكوافيرة طلبته منك اوعا ننساااااه "بودرة معطرة " فوط اوليز او نانا "مونيكريك وضوافرك لو حتركبى "رموش لو حتحطى رموش وتجيبها نوع 103 اللى بتكون اشبه للطبيعية وسوا واحد ولو عند الكوافيرة يبقى تماااااام ولو عايزين اماكن اسالونى
وبلاااااااش الزحمة اللى بتبقى معاكى فى الكوافير دى صحابك وقرايبك واخت العريس والعيلة ككلها لاء انتى تاخدى معاكى واحدة بس بتثقى فيها وفى زوقها ومتعودة عليها وهى متعودة عليكى لانك حتكونى متوترة وممكن تتعصبى وترمى اى كلمة فلام اى حد يستحملك ويتفهمك
خدى معاكى عصائر +شكولتات بس علشان تديكى طاقة ومدوخيش وممكن اى مسكن تحسبا لاى وجع او صداع وقبل ماتلبسى فستانك وتتمكيجى تتوضى وتصلى وتغسلى اسنانك حلو اووى والابتسامة على وشك
البريود جاتلك عااااادى خالص مافيش مشكلة اهى فرصة تتعرفى على جوزك من تانى وتتعودوا على بعض
بالنسبة للمفروشات متكتررررررررررررررررررريش انا بندم اشد الندم والله هما لحافين وبطانية او لحاف محترم وبطانية محترمة غالين وكبار وبس اطقم الملايات 7او 8 بس انتى كل يوم حتغيرى يبقى تجيبى على عدد ايام الاسبوع مش حفلة ملايات متعمليش زى انا جيبت 30اطقم ملاية وعايزة ابيعهم ونصهم لحد دلوقت ولاخرجوا من كيسهم اللى عايز يقولى وبالنسبة ل مفرش العروسة انا جيبت طقم الستان المطرز التركى بتاع العشق الممنوع غالى اه بس تمنه فيه وشيك وقيم وبلاش المفارش اللى بتببقى فرح العمدة دى ومش لازم يكون ابيض حتجيبى 2كوفرتة فايبر بخودايتها وبس وبلاش اطقم ولحفة الاطفال دى لما نبقا نجوز الاول ونحمل ونخلف نبقى نجبلهم ان شاء الله ولا فى حاجة نرفزتنى اووى مفارش اللى زى بتاعة العروسة دى للاطفال ايه ده والله اوفر ومش لذيذة خالص لان كتر المفروشات بيكركب الدنيا ومبتلاقيش مكان ليهم بعد كدة عن تجربة والله
الكاسات 3حلوين اووى للنيش غالين وقيمين او اتنين على حسب امكنايتك انتى طقم صينى قيم وشيك فيه طقم شاى وجاتوه مع بعضه مش نجيب طقم صينى وطقم شاى وجاتوه ايه كل الاطقم دى مافيش احلى ولا ارق من البساطة والشياكة وراحة العين وكل ماالنيش رق ومش زحمة بيبقى احلى كتيييير وبلاش طقم الشربات ده هو فى شربات اصلا دلوقت هو طقم الخشاف هاتيه لو عايزة بس متحطهوش فى النيش حطيه فى المطبخ وبلاش حفلة الكوبيات اللى بتبقى فى النيش دى ملهاش اى لازمة كوبايات ايه دى اللى بتتحط فى النيش كفاية الكاسات مع حبة كرستالات وبس
هاتى طقم اركوبال بس جنب الصينى متعمليش حفلة اطقم وده يبقى لاستعمالك فى المطبخ اليومى وفى الوقت شيك انا بشوف العجب والله مليون طقم طقم صينى واركوبال وعشاااا وغدااا ولا طقم العسلى ده اوولد فاشن اووووووى محدش يجيبه ده بتاع جدتى مش مامتى حتى وعايزة اعرف طقم اركوبيركس ده لازمته ايييييه والله بيتقشر ومنظر على الفاضى وبس ياعرايس مش بكتره والله هاتى الاشيك والاقيم واللى حتسخدميه فعلا
الحلل هاتى بس تفال او سيراميك طقم كاااامل مش الاتنين +طقم ستانلس +حلة بخار عشقى الاول والاخير فى المطبخ بعمل فيها اى حاجة هوااا اللحمة مبتاخدش ربع ساعة سوا حتى لو كانت اايه
شنطة المعالق ولا ليها اى 70لازمة اهى عندى اهى ومرمية فى البوفية مستعملتش منها غير مرة وكلها بكيسها وكانت ب850 والله والله عن تجربة محدش يجيبها خالص هاتيلك الطقم اللى بالستاند بتاعه ده هاتيلك طقمين بس الواحد عامل150 او200 والباقى هاتيه فرد شيك وحلو لاستعمالك اليومى والبيت
مقص الفراخ اختراع مالوش حل هو والمكيرويف والفرن الكهرباء وحلة المكرونة رووعة وحلة الرز البلاستيك اللى بالمصفاة اخترااااع وااااااااو وحططلكم شكل اجهزة المطبخ اللى عندى وكلهم كينود وباسعارهم كمان
كلمة روووووووووعة قليلة عليها 850
بعمل فيها اى خلطة وبقطع البصل وكمان الملوخيةب300
شواية كهرباء فليبس حاجة وهم وعمرها ماتحرق الحاجةب700
عجان كينود اللى معاه الخلاط بتاعه والعجانة وكله ايدى ورجلى فى المطبخ هو والكابة اللى فوق ده ب4000ونص
وفرى شوية لحاجة المطبخ حتوفرى عليكى بعد كدة جهد وتعب كتيير والله عن تجربة
تابعوووونى فى المشاركة الجاية
Pure Angel Pure Angel 951226_3.gif فتكات هايلة Fatakat 951226 مدينة نصر – مصر