من غير رغي كتير لان لسه فى رغي كتير فى الطريقة
انا شفت امبارح وصفة حواوشي لفتوكه هنا اسمها ساساميزو
https://fatakat.univanet.com/#2323241
وفتحت نفسي قلت اجرب اعمل حواوشي بعجينته
بس انا بحب ادعبس كده فى كل الوصفات لان فتوكة بيبقى ليها تكتها وحركاتها فى اكلها فقلت اجمع المواهب كلها واطلعها فى الحواوشي بتاعي
ههههههه
ووصلت للطريقة دى
اعزرونى على الرغي الكتير بس انا بحب اقول بكل التفاصيل عشان كل خطوة بتبقى مهمة جدا فى نجاح اى مشروع
اقصد فى نجاح اى طبخة
الحشوه
نص كيلو لحمه مفرومه فيها نسبة دهون
واحدة طماطم كبيره
2 بصله كبيره
حزمة بقدونس
واحدة فلفل رومي كبيرة
معلقه ملح كبيره
معلقه فلفل اسود
معلقه كمون
رشة قرفة
فلفل حامي (لو عايزاه مشطشط)
مكعب مرقة لو بتحبيها
العجينه
3كوب دقيق
نص كوب لبن
ماء دافي للعجبن ولتذويب الخميرة
2معلقه خميره كبيره
نص معلقه كبيره سكر
رشه فلفل اسود
رشه كمون
معلقه ملح
4 معالق لبن بودرة
4 معالق زيت او على حسب لين العجينة
الطريقه
قطعى البصل والفلفل والطماطم والبقدونس مكعبات صغيرة خاااااااالص بس بلاش فى الكبه عشان ماتنزلش ميتها
وبعدين تحطي الخليط كله ع اللحمه المفرومه وتتبلي بالفلفل والملح الناعم و رشة قرفة ورشة كمون ومكعب مرقة لو عايزة
وتقلبيها كويس جدا
بكده تكون الحشوه جاهزه
تبداي تعجني العجينه
– انخلى الدقيق
– و تحطي الدقيق عليه المكونات دي ( رشتين ملح و رشة فلفل ورشتين كمون و 4 معالق اللبن المجفف )
– وبعدين تدوبي معلقيتن خميرة بيرة فورية فى نص كوباية ميا دافية وعليها معلقة سكر وتسيبيها على جنب شوية
– على ماتكوني نخلتى الدقيق وقيدي الفرن ووطيه شوية عشان يدفى عشان هتحطي فيه العجين يتخمر بعد شوية
– وبعدين تحطي الخميرة على الدقيق وبعدين تبدا ي تحطي نص كوباية اللبن شويه بشويه وبعدها الميا الدافية شوية بشوية مش لازم كل الميا لانه على حسب طبيعة الدقيق اللى بتستخدميه
لحد ماتكون العجينه سهله في ايديكي للفرد على الطاوله وتكون ايديكي مش بيتلزق فيها العجين ولمت فى العجان
وخدي بالك الدقيق هيمتص بسرعه الميا لو عجنتى كويس ولو الميا زيادة هيفضل العجين بيلزق يبقى ساعتها زودي شوية دقيق واعجني وبعدين الزيت على القد بالتدريج لحد ما تلاقيها ناعمه ومش بتلزق فى ايديك
– بعد كده اقفلى نار الفرن و افتحي الباب شوية يتهوي بس مايبردش
وبعد كده غطي العجين بقماشة ياريت تعملى حساب التخمير وتكون فى علبة كبيرة وتغطي العلبه بقماشة مش العجين نفسه
وسيبيها حوالى ساعة او ساعة ونص جوة الفرن الدافي
وبعدين
– طلعى العجين من الفرن بعد ماخمر
– وقيدي الفرن تانى على اعلى حاجه عشان يبقى سخن ملهلب لما تيجي تحطي الحواوشي
– تبداي تعملي اول رغيف تجيبي حته عجين تفرديها بعد ماترشي دقيق تحتها
وتخلها رقيقه خالص عشان طعم اللحمه يكون باين وبعدين تحطي طبقه من الحشوه النيه اللي عندك وتفرديها على العجينة على حسب انتى عايزة اللحمة سمكها قد ايه فى الرغيف ورشي رشة ملح على اللحمة كده لو متاكده انك مش مزودة ملح اصلا
– وتعملي فطيره نفس الحجم للاولى وتغطيها بيها وتقفليها
وبعدين تشكشكيها بالشوكة من كل النواحي عشان العجينه ماتقبش فى الفرن وعشان اللحمة يوصلها الحرارة وتستوي كويس
– وبعدين تدهنى الصاجة بزيت او سمن او قطع لية وتحطيها فى الفرن تسخن وبعدين تطلعليها وتحطي عليها الرغيف او الاتنين على حسب حجم الصاجة وتكون فى الرف اللى فى النص عشان لا تتلسع من فوق ولا من تحت
وتقعديها كده حوالى 10 دقايق وبعدين نزليها لارض الفرن تتحمر من تحت وبعدين طلعيها للشواية او اعلي رف فوق فى الفرن تاخد لون من فوق
او ممكن تقلبيها وتخليها فى ارضية الفرن على حسب طبيعه فرنك بس خدى بالك لو هتقلبي يكون ارضية الرغيف اتحمرت عشان ماتجيش تقلبي الرغيف تلاقيه اتهرى
وطول الوقت يكون الفرن عااااااااااااااااالي على اعلى حاجه
بس خدي بالك وقت التحمير تكونى جنب الفرن عشان ماتتلسعش منك
وبس خلاااااااااااااااااااااااص
لالالا لسه
هههههههه
لو عايزاه مقرمش سيبيه فى الهوا برة الفرن
لو عايزاه طري يبقى تطلعي اللى استوا ولفيه بروقة فويل هو هيعرق فيها وهيفضل طري
عارفة تعبتكم قرايه
بس التطبيق هتلاقيه سهل ان شاء الله
ودعواتكم ربنا يقومني بالسلامة ويرزقنى بطفل سليم معافى وتكون ولادة سهل فى وقتها ان شاء الله
مواضيع هذا القسم برعاية
عابرة السبيل 2024 عابرة السبيل 2024 185009_22.gif فتكات غالية قوي Fatakat 185009 استراليا البلد – فى بلاد الغربة