طبعا الموضوع اللي كتبته أسأل فيه عن مدرسة اخد ضربة شمس من كتر اللطعة لوحده من غير ما واحدة تفيدني بمعلومة تبل ريقي.. ربنا يجازيكي خير يا sema 124 وهنا اسماعيل ياللي رديتو عليا في الموضوع دة
https://fatakat.univanet.com/#2320240
وعلشان كدة جت لي فكرة حلوة جدا من وجهة نظري .. وهي إني أجمّع المواضيع اللي لقيتها على فتكات عن مدارس الاحتياجات الخاصة وكمان اضيف عليها تجربتي مع المدارس المحدودة اللي أنا لفيت عليها .. يعني مش مجرد أسماء وعناوين، تقريبا مش هتلاقوا في الموضوع دة عناوين وارقام هواتف، لكن باذن الله تلاقوا تجارب تفيدكم. ويا رب اعرف افيدكم لأن للأسف مالقيتش واحدة تفيدني في السؤال عن المدارس اللي فيها دمج.
أول موضوع معانا بيتكلم عن مدرسة هارفارد اللي في مدينة نصر وعنوانه اهو
مدرسة هارفرد اللي في مدينة نصر.. فصول الدمج
https://fatakat.univanet.com/#1581732
وكمان الفتوكة اللي كاتبة الموضوع التالي قالت ان ابن خالها دخل هارفارد ومرتاح فيها
"عاوزة مدرسة النهاردة"
https://fatakat.univanet.com/#516349
لكن أحب أقول إني قريت مواضيع لناس أولادهم في الاقسام العادية في نفس المدرسة ومش مبسوطين منها، والسبب الرئيسي انهم متضايقين هو ان فيه دمج للاطفال اللي زي اولادنا مع اولادهم. كمان المصاريف بتزيد بطريقة مبالغ فيها كل سنة.
وطبعا فيه موضوع جميل هنا اسمه دليل مدارس ذوي الاحتياجات الخاصة .. لكن للاسف مافيهوش عدد كبير من المدارس في منطقة المعادي اللي انا بابحث فيها والرابط أهو https://fatakat.univanet.com/#183862
وكمان فيه موضوع متثبت في القسم هنا عن المدارس الحكومية اللي فيها دمج والرابط أهو https://fatakat.univanet.com/#2270251
أما عن تجربتي الشخصية، قدرت أكوّن فكرة عن المدارس الآتية:
الخلفاء الراشدين بحدائق المعادي: ذوي الاحتياجات الخاصة لهم مبنى منفصل والفصول جيدة التهوية والمدرسات خبرتهم متوسطة، ولكن أغلب خبرتهم مع الداون. ما ينفعش تودي لهم طفل من الاول خاااااااالص.. يعني لازم الطفل يكون متأسس كويس قبل ما يروح لهم. مفيش دمج ابدا بينهم وبين الاطفال العاديين. كل ما في الامر انهم في نفس المدرسة.
البشاير القريبة من كارفور: طبعا كلنا سمعنا عنها. ذوي الاحتياجات الخاصة لهم مبنى منفصل والفصول أغلبها تحت في الدور الأرضي. ما اعرفش مستواها لكن ما حدش قال كلام وحش عنها. يتم الدمج في حصص محددة حسب قدرة الطالب. وكل طالب طبعا ليه مدرس لكل مادة. عيبها الاساسي انها غالية اوي (في حدود 30 الف في السنة)
اليسر اللي في زهراء المعادي: المدرسة دي مش للدمج.. دي مدرسة خاصة بالحالات الخاصة فقط، ممكن تأهلهم حسب مستواهم للدخول في المدارس العادية أو يكملوا فيها حسب مستوى الطالب واستعداده. مصاريفها في حدود 12 ألف لكن مش متأكدة منها.
زهور الياسمين اللي في شارع الجزاير بالمعادي (الناصية اللي قبل السلام شوبنج سنتر): الفصول في البدروم. وعاملين قواطع (partitions) خشب يفصلوا بيها الفصول عن بعضها. مفيش تهوية ولا شبابيك والفصل فيه حوالي 4 اطفال ومعلم واحد. يتم الدمج مع الاطفال العاديين اثناء الفسحة. مصاريفها تقريبا 7.5 في السنة غير الباص واليونيفورم.
الأمجاد اللي في زهراء المعادي: سمعت ان فيها فصل ورحت أسأل عليه هناك، لكن طبعا كنت في قمة الاحراج لما قالوا انهم ماعندهمش فصل لصعوبات التعلم هناك. أنا كتبتها في موضوعي علشان لو فيه واحدة سمعت الإشاعة دي تعرف ان الامجاد مافيهاش فصل لذوي الاحتياجات الخاصة وتوفر المشوار على نفسها.. كفاية كسفوني.
سما القريبة من كارفور : ما رحتش هناك لكن لقيت على النت ناس قالوا انها مش حلوة.. وفيه ناس تانية شكروا فيها.. لكن انا مش ناوية حتى اروح اشوفها علشان عرفت انها في قلب الصحراء وموجودة في منطقة غير آمنة على الاولاد
وبعد كل البحث والتمحيص دة بردو ما قدرتش ألاقي مدرسة ابني يروح فيها.. خصوصا انه سنه كبر ومش سهل ان اي مدرسة تقبله.. أرجوكم تدعولي ألاقي له مدرسة كويسة
وأخيرا يا ريت كل واحدة عندها تجربة أو تعرف موضوع بيتكلم عن المدارس او ليها قرايب زي أولادنا ودخلوا مدارس للدمج يا ريت تيجي تقول لنا هنا. نفسي الموضوع دة يكون فيه أكبر تجميعة لمدارس الدمج وتجارب الاولاد فيها، علشان اللي يبحث ما يحتارش زيي.
وأحب أقول لكم إن خير الناس أنفعهم للناس.. مش اللي يخبوا تجربتهم عن الناس
ودلوقتي فيه جملة اول مرة وتقريبا آخر مرة هاكتبها على فتكات وهي:
لو عجبك الموضوع أرجوكِ تقيميه.. يمكن يتثبت وغيرك يستفيد بيه
الحاجة دودي الحاجة دودي 441812_1.gif ممنوعة من المشاركة Fatakat 441812 المعادي – أم الدنيا وأبوها كمان