( جميع حلول مشاكل الرضاعه وتشققات حلمه الثدى )
يافتوكات انا لقيت مواضيع كتير جدا بتشتكى فيها الامهات بتشققات الحلمه والمها وانها مش عارفه ترضع ولادها
وانا بعد ولادتى فعلا عانيت جدا منها وحسيت بعذابها وعلشان كدا انا جمعت لكم مجمل النصايح بخصوص ( تشقق الحلمه ) و(الام الرضاعه )
الحـــــــــــــل بأذن الله
1_ اولا لازم بعد الولاده على طول واول ماتقدرى تقعدى تحطى ابنك على صدرك علشان يرضع لبن السرسوب لانه مفيد جدااا وعلشان يحفز افراز اللبن وان شاء الله اللبن هينزل بعد 3 ايام
2_ دخلى اكبر جزء من الحلمه والهاله البنيه اللى حواليها فى فم الطفل لانه لما هيمسك الحلمه لوحدها هتبقى مؤلمه جدا
3- خلى بالك ان صدرك يبقى مرفوع بايدك بعيد عن انف الطفل علشان متكتميش نفسه وفى نفس الوقت هتدعمى الصدر ومش هتخليه يوجعك بسبب الشد
4_ فيه اراء كتير فى معالجه تشقق الثدى منها اولا استخدام زيت الزيتون وتحطيه على الحلمه بعد كل رضاعه
5_ ممكن استخدام زيت الزيتون ومعاه عسل ابيض على الحلمه
6_ بعد الرضاعه نزلى شويه لبن على الحلمه وخليها لما تنشف ودخلى صدرك واوعى تدخليه وهوا مبلول لانه ممكن يلزق فى هدومك وهيبقى مؤلم اوى اخراجه
7_ ممكن كمان نجيب حبايه اسبرين الاخضر ونهرسها فى نقطه ميه وندهن بيها الحلمه ونستنى لما تنشف وهيا هتعالج التشقق
8_ استخدام كريم مرطب وافضلهم ( بانثينول ) وهنحطه على الحلمه بعد الرضاعه وقبل الرضاعه التانيه هنمسح بقطنه مبلوله علشان الطفل ميخدش الكريم
9_ استخدام جل للثدى بيباع فى الصيدليات ودا مش محتاج انه يتغسل وممكن الطفل يمصه عادى جدا
10- استخدام كريم ميبو للحروق ودا بيعالج التشقق وبيلئم الجروح
11- استخدام الطين الموجود فى التوم ونبلله فى نقطه ميه ونحطه على الثدى لحد ما ينشف
12- ممنوع غسل الثدى بالصابون لانه بيسبب الجفاف ويتغسل بالميه بس
13- ممنوع وضع الطفل على ثدى واحد اكتر من تلت ساعه ولازم تنقليه على الثديين والثدى اللى تنتهى بيه يبقى تبدئى بيه المره التانيه فى الرضاعه يعنى لو رضع الاول من الشمال وبعدين اليمين ونام ورجع يرضع تانى يبقى تبدئى باليمين وبعدين الشمال وهكذا
14_ حاولى تحطى بريست باد على حلمه الصدر لانه هينزل فى هدومك وتضطرى تغيرى كل شويه
15_ لو اللبن زاد اوى فى صدرك ولقيتى صدرك جامد ومكلكع يبقى لازم تعصريه حتى لو الطفل رضاعته قليله ولو لسه تقيل ومش بيتعصر يبقى تاخدى نصف سانتى مضاد حيوى ( سيفوتاكس ) ودا مش هيأثر فى نزول اللبن لكنه هيقلله شويه فى اليوم دا على ماابنك يرضع الموجود وهوا اتوماتيك هيتفرز غيره ودا ساعدنى جدا فى بدايع الرضاعه
16_ نزول اللبن بيصاحبه ارتفاع فى درجه الحراره فانتى تاخدى حبايه بانادول اكسترا وهتبقى زى الفل
كل هذه النصائح الطبيه هيا من خلال اطباء متخصصين والنصائح الاخرى من خلال الامهات القدامى واسئل الله ان تنتفعوا به
برجاء التقييم والدعاء ليا ولابنى وزوجى
تابعوا حلول مشكلات الحمل والولاده على هذا الرابط وارجو التفاعل وتبادل الخبرات
https://fatakat.univanet.com/#4434659 ( متجدد )
mama nonia mama nonia images/avatars/orangeflower.gif فتكات رائعة Fatakat 803827 مصر – مصر