السلام عليكم ورحمة الله وبركاته
انا حبيت يا بنات اشاركوا تجربتي في الحقن المجهري عشان جايز الموضوع يفيد اي حد يكون مقبل على الموضوع ده وخصوصا ان لقيت فتوكات كتير بيبعتولي عشان يعرفوا ايه اللي حصل معايا فحبيت اجمع كل حاجة هنا بحيث انه يبقى سهل لاي حد يعرف التجربة كلها و ربنا يرزق الجميع يااااارب بالذرية الصالحة بدون تعب ولا عمليات يارب
انا متجوزة بقالي 3 سنين وخلال الفترة دي محصلش حمل خالص ورحنا لدكاترة كتير جدا انا وجوزي وعملنا تحاليل كتير وطبعا اهمها اشعة الصبغة والحمد لله رب العالمين مفيش اي سبب يمنع الحمل لا عندي ولا عنده هي ارادة ربنا بس واختبار منه والحمد لله كنا راضيين بيه وصابرين عليه المهم جينا مرة رحنا لدكتور قالي نختصر الوقت ونعمل تلقيح صناعي ونجرب فبدأت اخدت المنشاطت وعملت التلقيح والحمد لله ربنا مأردش انه يحصل حمل وعدت التجربة مرة تانية وبرضه الحمد لله ربنا مأردش وقلنا الحمد لله رب العالمين على اختباره لينا وقلنا ربنا يأجرنا في مصيبتنا ويخلف لنا خيرا منها طبعا الموضوع مكنش سهل انا نفسيتي تعبت جدااااا وخصوصا انكوا عارفين الادوية والمنشطات متعبة قد ايه وكمان فترة الانتظار اسبوعين للتحليل طويلة جداااااا وفي الاخر النتيجة لا شيء بس الحمد لله ربنا يجعلها في ميزان حسناتي يارب المهم الدكتور قالي نلجأ للحقن المجهري وانه هتبقى فرصته بالنسبة لنا عالية جدا باذن الله لاننا صغيرين في السن ولان الحمد لله معندناش اي مشاكل طبية الحمد لله فأنا طبعا قلت اريح شوية وافكر واخد وقتي وابقى افكر في موضوع الحقن ده وفعلا قعدت تقريبا حوالي 5 شهور او 6 شهور على ما فكرت أبدأ في الحقن ولما فكرت رحت مركز ادم بصراحة لانه اقرب مركز مني لاني ساكنة في اكتوبر وهو في المهندسين وانا صعب عليا اني افضل اروح تاني اماكن بعيدة عليا وثاينا لاني اعرف ناس جربوا هناك والحمد لله ربنا كرمهم وبصراحة شكروا في المركز جامد ونصحوني اني اروحه المهم اتصلت بالتليفون وعرفت اني اول مرة اروح يكون يا اما تاني او تالت يوم الدورة عشان يعملوا سونار مهبلي ويعملوا تحاليل هما على فكرة بيعملوا كل التحاليل عندهم المهم رحت تاني وعملت السونار والتحاليل وبدأت اخد سيدوفاج وحمض الفوليك وجوزي كشف عن دكتور الذكورة وعمل هو كمان تحليل سائل منوي والحمد لله رب العالمين طلعت كل تحاليلنا كويسة بفضل الله ورحنا هناك الرعاية الطبية عشان يشرحوا لينا العملية بالتفصيل والارشادات وكده وقالولنا طبعا انه ممكن يحصل ثلاث حاجات يا اما لا قدر الله جسمي ميستجبش للمنشطات خالص وفي حالة زي كده هيغيروا خطة العلاج او انه يحصلي فرط تنشيط وده بيعمل مية على الرئة والمبايض والجسم وكده وبيعمل ضيق تنفس وتعب فعشان كده لو حسيت اي حاجة غريبة نتصل بيهم على طول وطبعا في حالة لا قدر الله حصل فرط تنشيط هما بيسحبوا البويضات عادي وبيكملوا حقن الاجنة عادي بس مش بينقلوها بيجمدوها وبيخلوكي تستريحي لمدة 3 شهور قبل ما تروحي عشان تنقلي الاجنة عشان يكون جسمك ارتاح خاااااااالص وبقى مستعد لنقل الاجنة او الحاجة التالتة بقى انه ممكن بعد ما يعملوا كل حاجة الاجنة متنقسمش في الحضانة ودي بقى تبقى حاجة بتاعة ربنا المهم احنا قلنا نتوكل على الله واللي ربنا رايده هو اللي هيكون المهم قالولي تعالي اليوم العشرين من الدورة عشان احضر اللجنة الطبية ودي بتكون دكاترة من المركز شافوا حالتك وتحاليلك انت وجوزك وبيحددوا بقى طبيعة العلاج والعملية تحديدا اللي هتعمليها وهيعرفوكي حالتك بقى بالضبط و تاخدي في نفس اليوم لو باذن الله كل حاجة تمام بتاخدي حقنة تحضيرية دي تمنها 750 جنيه وهما بيدهولك هناك في المركز فرحت فعلا اخدتها وقالولي لو لا قدر الله حسيتي باي اعراض غريبة اتصلي بينا فورا بس الحمد لله الامر عدى بسلام وقالولي ابتدي التنشيط من تاني يوم الدورة طبعا التنشيط ده بيختلف من واحدة للتانية على حسب حالتها المهم بدأت اخد فعلا حقن التنشيط وبدأت اعمل متابعة تبويض من اليوم السادس للدورة وكنت بروح يوم بعد يوم اعمل تنشيط وكانوا في ايام بيتطلب مني اعمل تحليل E2 الهم جه مرة الدكتور قالي لازم تيجي كل يوم متابعة لانك كده داخلة على مرحلة فرط تنشيط ولازم نتابعك كل يوم وتعملي التحليل كل يوم عشان ميحصلش حاجة غلط المهم فضلت اتابع لحد ما قالوا لي تعالي بقى يوم السبت عشان ميعاد السحب بتاعك وقالولي ان فيه حقنة اخدها في وقت معين عشان على اساس ميعاد الحقنة هيسحبوا البويضات المهم كان ميعاد الحقنة يوم الخميس الساعة 12 بالليل وحددوا السحب يوم السبت الساعة 11 الصبح ومهم اثناء اجراءا الاستعداد تحضري حاجة اسمها عرض تخديري لانه لو نسيتي تعمليه ممكن دكتور التخدير يأجل العملية كلها وهو حاجة بسيطة جدا بتخشي لدكتور التخدير يسألك اسئلة عامة ويقيس الضغط والكلام ده كله وممكن تعمليه في اي وقت بس المهم يكون قبل السحب طبعا المهم يوم السحب رحت صايمة انا وجوزي وطلعت مكان العمليات فوق لبست لبس التعقيم ودخلت العمليات بالضبط الساعة 11 الا ربع والعملية بسيطة جدا باذن الله ومش بتاخد غير ربع ساعة بالكتير وانت مش بتاخدي بنج قوي لا حاجة بسيطة كده بحيث انك تفوقي على طول طبعا قبل ما تفوقي بيكونوا هما ادوكي حقنة فولتارين عشان متحسيش بألم بعد ما فقت لقيتهم بيدوني عصير هما بعتوا لجوزي يشتريه وشربته وجت دكتورة شرحت لي العلاج بتاعي وقالت لي على عدد البويضات والكلام ده كله وشرحت لي العلاج وقالت لي ان هما هيبقوا يتصلوا بيا عشان يحددوا ميعاد نقل الاجنة ونزلت لجوزي تحت عرفت انهم خلاص خدوا منه العينة وفضلنا قاعدين بس مستنيين تقرير الحضانة قعدنا تقريبا ساعتين وبعد كده خلاص مشينا بقى طبعا بعد السحب انا تعبت شوية وجالي انتفاخ جامد وضيق تنفس وعرفت بعد كده ان ده بيكون بسبب اني طلعت بويضات كتير المهم هما بعد كده اتصلوا بيا وقالولي ميعاد النقل باذن الله هيكون يوم الخميس يعني اليوم الخامس من السحب واروح الساعة 12 الضهر واكون شاربة مية كتير رحت الساعة 12 قالولي ان ميعاد النقل الساعة 3 عشان هما بيعملوا النقل بعد السحب بعد ما يخلصوا عمليات السحب اليوم ده وبعدين يبدأوا النقل المهم حجزنا انا وجوزي غرفة عشان نستنى لحد بالليل هو طبعا العادي انك بتنامي على ضهرك ساعتين عندهم وبعدين تمشي لكن انا وجوزي فضلنا نحجز غرفة ونستنى فيها لحد بالليل عشان افضل نايمة اطول فترة ممكنة المهم طبعا اليوم ده تروحي فاطرة عادي لانه من غير بنج والنقل بسيط جدااااااا الحمد لله ومفيهوش اي الم هو الدكتور بيركب منظار يفتح بيه عنق الرحم وبيدخل قسطرة رفيعة جداااااا بينقل بيها الاجنة وطبعا بتكون الممرضة حاطة سونار على بطنك عشان الدكتور يشوف الرحم وهو بينقل والموضوع كله مش بياخد اكتر من 5 دقايق وانا نقلولي 2 اجنة وجوزي مضى اقرار على كده انا اللي عملي النقل دكتور محمد حسين وهو بصراحة ممتااااااز بمعنى الكلمة المهم بعد كده نزلوني لغرفتي وخدوا جوزي يمضي على اقرار بعدد الاجنة المجمدة وحالتهم ودرجتهم ودفع فلوسهم وفضلنا لحد الساعة 8 بالليل وروحنا البيت طبعا فردت كرسي العربية كاني نايمة وجوزي ماشي بشويش جداااااااااا
المهم التعليمات بقى اللي قالوا عليها بعد النقل اني اشرب لبن كتير واكل بروتين حيواني كتير سمك وفراخ ولحمة لانهم باذن الله بيساعدوا على انقسام الاجنة وثبوتها وطبعا ممنوع العلاقة الزوجية وممنوع تشربي قرفة او مغات او حلبة خاااااااالص وطبعا اول 3 ايام راحة تااااااااااااامة عشان دي الايام اللي الجنين بيثبت نفسه فيها وبعد كده بتعيشي حياتك بشكل طبيعي جدا بس طبعا من غير مجهود يعني وتعملي التحليل اليوم ال16 من النقل انا عملت السحب يوم 25-6 والنقل يوم 30-6 والتحليل بتاعي كان يوم 16 -7 طبعا التحليل بيكون رقمي عشان تعرفي كل حاجة بالتفصيل وعملت التحليل والحمد لله رب العالمين طلعت حامل وعرفت انه في الاسبوع التالت من الحمل طبعا مش هقدر اوصف فرحتي واتصلت بالمركز عرفتهم وقالولي اجي بعد اسبوعين اعمل اول سونار يعني كان ميعاده 30-7 وبصراحة انا كنت قلقانة ومكنش فيه حاجة هتطمني غير السونار لدرجة اني معرفتش حد خالص بموضوع الحمل غير امي وحماتي وبابا لحد ما اعمل السونار واتأكد فعلا انه فيه حمل انا بصراحة مكنتش مصدقة ولا مستوعبة وكنت قلقانة جدا بس الحمد لله رب العالمين ربنا كرمه كبير ورحيم بينا جدا ورحت عملت اول سونار والحمد لله لقينا جنين واحد اللي ثبت والحمد لله ربنا يبارك فيه ياااااااااااااااارب ويثبته ويتم حمله على خير ان شاء الله ويكون ذرية صالحة يارب
طبعا مميزات المكان انهم شاطرين جدا بصراحة لكن عيبهم انهم زحمة جدااااااااااا وخصوصا في الصيف عشان كده انصح اللي تعملها انها تعملها في الشتاء لان الصيف بيكون اجازات وكمان عرب كتير بيكونوا جايين عشان يعملوا العملية دي وهما كمان تحسي انهم شوية تايهين يعني لازم تبقى مركزة في حاجتك لانك بتروحي للدكتور وتروحي الرعاية الطبية وتروحي المراجع الطبية فبتحسي انك تهتي منهم فده عيب برضه بصراحة فيهم لكن غير كده هما ممتازين جداااااااا بصراحة وطبعا المكان ما هو الا سبب ربنا جعله عشان يرزق بالحمل يعني كل حاجة بايد ربنا ولازم اننا نستغفر ربنا كتييييييييييير ونطلع صدقة كتير بنية الحمل وندعي ربنا في قيام الليل واوقات استجابة الدعاء ونتذلل له بالدعاء وهو باذن الله مستجيب سميع وكريم جداااااا وحنين علينا اكتر من امنا يعني حتى لو ربنا مأخر الحمل فده اكيد لحكمة له ولمصلحتنا بس احنا مش بنكون عارفين الخير فين عشان كده نرمي كل حمولنا وامورنا على الله وهو باذن الله يرزقنا جميعاويستجيب لدعائنا
ودي كده تجربتي كلها بالتفصيل الممل واسفة لو طولت عليكوا بس حبيت اشاركوا تجربتي عشان لو فيه اي حد داخل على التجربة دي ممكن يستفيد باي معلومة حتى لو بسيطة ولو اي سؤال انا طبعا تحت امركوا وربنا يرزق الجميع ياااااااااااااااارب بالذرية الصالحة وميحرمش حد ابدا من الفرحة دي
شيكولاتة مسكرة شيكولاتة مسكرة 6875_7.gif فتكات ست الكل Fatakat 6875 فتكات – مصر