السلام عليكن يا بنانيت
وكل عام وانتن بخير وتنعاد عليكم الايام بالخير
نظرا لانى ام جديدة بقالى شهر واحد فقط لاغير الحمد لله ربنا رزقنى بمؤتمن ابنى ادعوله ربنا يطمننى عليه ويتم شفاؤه .. وكمان لانى فى غربة ومعنديش خبرة خاااالص وكنت بخاف حتى اشيل طفل صغير لسه جسمه لين ومعندوش تحكم فيه .. ولانى معييش حد غير ربنا وزوجى فقط
فكرت اعمل الموضوع ده حتى نستفيد من خبرات بعضنا البعض وياريت اللى عندها معلومة تضيفها ومتبخلش علينا بيها
بعد حوسة كبيرة اووووى ودوخة وضغط نفسى وعياط وتعب اخيرا ًالحمد لله ربنا بعت فى طريقنا دكتورة تتقى الله فينا وعلمتنى شويةحاجات للتعامل مع طفلى الرضيع وحبيت افيدكم بيها اكيد فى امهات جدد زى حالاتى محتاسين وملهمش غير ربنا وقد يكون هذا الموضوع سبب فى افادتهم وراحة اطفالهم
نبدا بسم الله
1- فى البداية كده بالنسبة للامساك والاسهال عند الرضع
الدكتورة قالتلى ان طفلك مرتبط بيكى فى كل حاجة وتغذيتك بتاثر عليه فلازم وضرورى جدا ميجلكيش امساك لانه لو عندك امساك هيجيلك امسالك ولو عندك اسهال هتلاقيه عنده اسهال .
2- ظهور بقع حمراء لها راس بيضاء فى وجه طفلك او فى الوجه والصدر وتختفى
متقلقيش دى بقى الدكتورة بردو قالت انها حبوب من الرضاعة سواء كانت الرضاعة طبيعية او صناعى لان جسم الطفل لسه مش متعود على الرضاعة ودى ممكن تفضل لشهرين تظهر وتختفى لوحدها وممكن اقل فمتخافيش منها
3- مشكلة بكاء الطفل وقت الرضاعة رغم جوعه :
ممكن نلاحظ بكاء الطفل بدون سبب واضح يعنى مستحمى ومغير وكله تمام بس جعان وفى نفس الوقت رافض يرضع وقتها بصى على لسانه لو لقيتى لسانه عليه طبقة بيضاء ثقيلة ومش بتروح دى بتكون فطريات بتلسعه فى لسانه وقت الرضاعة علشان كده بيكون جعان ورافض الرضاعة وبيصرخ
وهنا لازم الدكتور يكتبلك الدواء المناسب لطفلك .. انا مثلا الدكتورة اديتنى دكتارين جل تدهنى به لسان الطفل قبل الرضاعة وحلمة صدرك وحلمة اى ببيرونة هتستخدميها ومفيش مشكلة من بلعه
4- بالنسبة للمغص "المشكلة الكبرى" :
فللاسف دى لازم تحصل فى الشهور الاولى لو هتغليله ينسون واعشاب جايباهم من العطار لازم تغسليهم الاول لانهم بيكون فيهم شوائب واتربة ويستحسن تجيبى بكيتات جاهزة اضمن
اما الادوية هم 3 او 4 انواع ومش شرط الدوا اللى يكتبه الدكتور يتناسب مع طفلك علشان كده خلى دكتورك يكتبلك كذا نوع وهاتى واحد منهم وجربيه لو ريح طفلك خلاص خير استمرى عليه عند اللزوم فقط لو مناسبهوش جربى للى بعده وهكذا لحد ما تلاقى النوع اللى يريحه .
5- الطهارة عند الاولاد :
انا لسه مطاهرتش مؤتمن ابنى بس سالت الدكتورة وقالت يستحسن فى خلال اول 40 يوم وطبعها السنة بتقول اسبوع من الولادة بس للاسف ابنى كان فى الحضانة لان نفسه كان سريع وكان عنده مشكله تانية ادعولى ربنا يطمننى عليه .. وعلشان كده اضطرينا نستنى
المهم فى خلال ال40 يوم مش هيحس اوى بالالم غير عند التبول طبعا هتحرقه واول يوم هيكون متعب وساعتها الدكتورة نصحتنى باستخدام نقط "ادول" دى خافضة للحرارة ومسكنة للالام .. وكمان قالتلى اواظب على زيت الزيتون للمنطقة دى
6- مشكلة الانفلوانزا والانف المسدود:
لو انفة اتسد هتلاحظى صوت زى الشخير كده وهو صاحى لكن لو سمعتيه وهو نايم الدكتورة قالتلى ده عادى متستخدميلهوش حاجة خالص انما لو سمعتيه وهو صاحى ساعتها استخدميله نقطة فى كل فتحة
و لازم تخلى الدكتور يكتبلك نقط للاستخدام وقت الحاجة
7- قطرة العين :
فى بداية تعاملك مع طفلك لازم الدكتور هيكتبله قطرة للعين تستخدميها مرتين او 3 فى اليوم لمدة اسبوع علشان تمنع اى فطريات من الظهور وتعرفى انك استخدمتيها صح وادت الغرض منها اذا لم يظهر عماص فى عين الطفل لكن لو ظهر لازم ساعتها تستشيرى الدكتور علشان يقولك الطريقة السليمة لاستخدامها وترجعى تواظبى من جديد وده كلام دكتورتى بردو
8- التهابات الحفاض :
ودى بقى لازم تواظبى على نظافة طفلك واحسن حاجة كانت سودو كريم لانه فيه زيت زيتون بيلطف جلد الطفل والعلبة الصغيرة بتقعد معاكى كتير جدا .
9- متشربيش الطفل ماء غير بعد 6 اشهر وبردو الاكل بعد 6 شهور
10- الزبادى :
ينصح اعطاؤه بعد سنه او احيانا سنتين كمان لان فيه خمائر وجهاز الطفل الهضمى بيكون لم يكتمل بعد للتعامل مع الخمائر الموجودة بالزبادى
11- احيانا بيكون الطفل مقريف وبيعيط رغم عدوم وجود شئ مما سبق وده بيكون قبل ظهور الاسنان بشهر واحيانا اكتر بيكون بيستعد وده بردو كلام الدكتورة علشان محدش يقلق بس بردو احنا بنكون حاببين نطمن اكتر وقتها ممكن توديه للدكتور يفحصه وياكدلك الموضوع ويطمنك
12- لااااااااااااازم تشترى ترمومتر علشان تتابعى حرارتة
وطريقة الاستخدام حسب ارشادات الطبيبة انك تحطيه تحت باطة والرقم اللى هيتسجل زودى عليه نص درجة
ودرجة الحرارة الطبيعية 37 لو لقيتى حرارته عاليه استخدمى ادول على 4 مللى فقط
وفى النهاية اتمنى اكون افدتكم بمعلوماتى الصغنونة دى واكون سبب فى ازالة حيرة الامهات الجدد امثالى وطمانتهم
وياريت لو تسمحوا تثبتوا الموضوع وتشاركونا خبراتكم علشان الكل يستفيد
واحلى سلام لاحلى مدونة
والسلام عليكن ورحمة الله
semsema81 semsema81 136946_2.gif فتكات رائعة Fatakat 136946 alexandria – egypt
سبحان الله و بحمده