أول حاجة يافتوكات نصلي على النبي محمد عليه أفضل الصلاة والسلام
عملت النهاردة سجق بالبطاطس بس بجد تحففففففة وقلت لازم تجربوه معايا زي ما انا جربت منكم وصفات كتير واستفدت منها جزاكم الله خيرا
نبدأ بسم الله المقادير :
– 1/2 ك سجق بلدي
– 4 أو 5 حبات طماطم
– فلفل رومي وقرن فلفل حامي بيديله ريحة جميييلة جدا
– 1 ك بطاطس
– بصلاية متوسطة
– زيت زيتون
– ملح وفلفل ( وزعتر اختياري ) .. نقطع الفلفل مكعبات في طبق والطماطم مكعبات في طبق والبصل مكعبات ونقطع السجق ..والبطاطس اقطعها مكعبات وانقعها في مايه وملح .. شوفي الصور ونكمل
حاشوح البصل في شوية زيت زيتون لحد ما يدبل
انزل عليه بالسجق المقطع
اقلب البصل مع السجق واوطي النار واديلته تقليبتين مع بعضه وبعدين انزل عليه بالفلفل واغطي الحلة واسيب السجق ينزل ميته ودهونه ويستوي بيها شوية
انزل عليه بعد كده بالطماطم واقلب واسيبها تتسبك على نار هادية مع التقليب من وقت للتاني وفي اثناء التسبيك نحمر البطاطس المكعبات نص تحميرة .. شوفوا الصور ..
بعد ما تتسبك الطمامط احط كوبايتين صغيريم مايه والتوابل واسيبها غلي غلوتين حلوين وبعدين اسقط فيها البطاطس النص تحميرة وغلوتين صغيرين واطفي النار واغطي الحلة
عملت معاها أرز بالشعرية ومخلل
وأدي الأكلة اللي لحقت اصوره منها على السريع لأنهم خطفوها مني بسرعة
بجد تحففففة وغدوة جميلة حاتعجب جوزك وولادك .. ياللا جربوها وقولولي رأيكم إيه عشان انا سهرانة مخصوص انزلهلكم وشكلي حالحم لصلاة الفجر ومش حالحق انام بس عشان خاطركم مش مهم بصوا ياحبايبي زي انا ما استخسرتش فيكم ياريت انتم كمان ما تسخسروش فيا دعوة حلوة بصلاح وهداية أبنائي وأن يحفظ لنا زوجي سالما يارب
دمتم وأبنائكم في رعاية الله دائما
مواضيع هذا القسم برعاية
مامة مودي مامة مودي فتكات متميزة Fatakat 260424 الإسكندرية – جمهورية مصر العربية