السلام عليكم ورحمة الله وبركاته
معلش يابنات انا اتأخرت ويه فى كتابة تجربة ولادتى
انا ولدت يوم 28-2 يعنى من شهر واسبوع ولدت فى اول يوم فى الاسبوع 38
الدكتوره حددتلى انى اولد قيصرى لان المشيمه نزلت عندى فى نص الشهر السابع
وانا اصلا كنت خايفه من الطبيعى فلما قالتلى انى هولد قيصرى انا فرحت
الدكتوره ادتنى قبل الولاده بيومين تلات حقن للرئه المهم انى اخدت اتنين وكان المفروض التالته اخدها
ليلة الولاده وانا نسيت اخدها فاتصلت بيها يوم الولاده وقولتلها قالتلى مش مشكله خديها دلوقت وفعلا اخدتها
====
انا كنت متفقه مع الدكتوره انى عاوزه اولد بدرى عشان كنت هرج من المستشفى على بيت اهلى
وبين المستشفى وبيت اهلى سفر تلات ساعات فمكنتش عاوزه اروح فى الضلمه عشان السواق
ممكن فى الضلمه ميشوفش المطبات فاانا اللى اتبهدل
وفعلا الدكتوره حددتلى انى هولد الساعه 7 الصبح
المهم على ماقمنا من النوم ورحنا المستشفى كانت الساعه 8
رحت لقيتها مستنيانى
================
الممرضات لبسونى لبس العمليات وانا داخله بقا اوضة العمليات كنت مرعووووووووووووووووبه
من كتر مابسمع عن الم القيصرى بعد ماافوق من البنج
المهم توكلت على الله ودخلت ونيمونى على سرير كان صغير
وانا عماله اقولهم مش تعملوا حساب الاحجام الكبيره ولااحنا حقنا مهدور فى البلد
المهم نيمونى على السرير وجه وقت التخدير انا كنت متفقه مع الدكتوره انى عاوزه بنج كلى
جه بقا واحد كدا معرفش هو مين لقيته ماسك ايدى وعمال يضرب على كف ايدى
وماسكل الكانولا دى عشان يدخلها فى ايدى واقوله هى دى بتوجع يادكتور قالى دى بتوجع اوى دى بتوجع خالص
دا دكاتره البنج دول مفتريين قولتله هو انت بقا دكتور البنج
المهم لقيته جاب حقنه كبيره كدا فيها سائل ابيض ورايح يحطهالى فى الكانولا وانا حسيت بحاجه ساقعه
بتطلع على صدرى وانا عماله اقوله انا عارفه دا البنج مش هتقدر تضحك عليا انا واخداه قل كدا فى اللوز يعنى انا خبره
وبعد الكلمتين دول محستش بنفسي
غير وانا بفوق لقيتهم رايحيين ينقلونى على سرير تانى وانا اول مافوقت كنت مفكره انى لسه معملتش العمليه
الوقت عدى عليا كأنه دقيقه وهما بينقلونى انا عماله اقولهم سيبونى انا هعمل العمليه
انتوا بتنقلونى على السرير التانى ليه انا عاوزه اعمل العمليه وهما عمالين يضحكوا شويه واحط ايدى على بطنى
اقولهم كرشي راح فين المهم فضلوا يضحكوا ويقولولى انتى خلاص عملتى العمليه
========
هكملكم فى المشاركه الجايه بقا
.:حنين:. .:حنين:. 472415_1.gif سوبر فتكات Fatakat 472415 مصر – مصر