حبيباتى انا جاية النهاردة احذركم من حاجة خطيرة و التحذير ده بناء على تجربتى الشخصية
مين فيكوا مش بتشرب شاى اخضر و بتاخد كبسولات الشاى الاخضر علشان تخس
بس سؤال هل فكرتى قبل ما تستخدمى الشاى الاخضر ؟؟؟
طبعا كلنا عارفين فوائد الشاى الاخضر و انه antioxidant يعنى مضاد اكسدة
بيحمى خلايا الجسم من الشيخوخة و السرطان
و بينظم حركة الامعاء و مفيد فى حالات الامساك
و بيساعد فى فقدان الوزن …. الخ
و انا كان ليا تجربة مع الشاى الاخضر
مبدأيا الشاى الاخضر ادمان عندى بالرغم من انى رشيقة
لانى ابتليت و الحمد لله على كل حال ب blast cells فى نخاعى العظمى
و اتولدت عندى هوس هوس اسمه اللوكيميا
بقيت بتابع مع طبيب امراض الدم و التغذية علشان احافظ على صحتى
معروف ان مضادات الاكسدة بتمنع تكون الخلايا السرطانية بفضل الله
بالتالى بقيت بشرب 7 مجات شاى اخضر باليوم
و كمان اشتريت green tea extract caps من امريكا
الفكرة ان شربى للشاى الاخضر و الكبسولات كان ((( بعلم و توصية))) الدكاترة اللى بتابع معاهم
استمريت بالروتين ده 6 شهور كنت حاسة بطاقة و حيوية كبيرة
و انبهرت بالنتيجة و بقيت اقول لصحابى و اقاريبى على الكبسولات المعجزة دى
مع العلم انها بتباع فى مصر فى الصيدليات الكبيرة بأكتر من 300 جنيه لل jar
و بعدين حصلتلى حاجة غريبة جدا
نزف من فمى و نوزى و اماكن تانية
كدمات بمساحات واسعة فى رجليا مع انى مش اتخبطت فى اى حاجة
استمرت الاعراض دى معايا فترة و الدكتور افتكر ده ضعف بالشعيرات الدموية
و كبرت دماغى
لما جيت اعمل التحاليل الدورية ظهر نقص حاد فى ال platelets اى الصفائح الدموية
الصفائح دى يا بنات هى المسئولة عن تجلط الدم فى جسمنا
و كل عددها ما بيقل كل ما بنتعرض لنزف و بطىء فى التئام الجروح
بس الدكتور ماكتبش علاج قالى احنا لسه فى ال normal range
بعد اسبوعين عيدت التحاليل لاقتنى نزلت حوالى 40000 من الصفايح
و فضلت تحاليلى بمتوالية تنازلية الى ان فقدت اكتر من 160000 ( 160 الف ) من صفائحى العزيزة
و وصلت لمرحلة الخطر و نقل الدم
ساعتها الدكتور بقى بيشد فى شعره و انا بشد فى شعرى معاه
فضل يراجع معايا اسم كل دواء باخده و جرعته و باكل ايه و بشرب ايه
فين و فين لما بقوله يا دكتور انا بشرب 7 شاى اخضر فى اليوم غير كبسولتين 1 جم
الدكتور عمل كده قالى لازم يقفوا فورا
لانهم كده سببوا سيولة فى الدم
طبعا وقفتهم و بدأت رحلة علاج طويلة و مملة
الى ان من الله على بالشفاء و ارتفعت نسبة الصفائح الدموية للحد الطبيعى
((( خلاصة التجربة المريرة )))
الله يرضى عليكى ما تشربيش اكتر من 2 فنجان من الشاى الاخضر فى اليوم
ما تاخديش كبسولات الشاى الاخضر من نفسك
لو دكتور هو اللى كتبلك الكبسولات دى حاولى تعملى CBC كل اسبوعين و تابعى ال platelets
حسيتى ان نسبتهم بتقل بمتوالية تنازلية كل اسبوعين
يبقى ستوووووووووووووب
الشاى الاخضر و كبسولاته مضرة جدااااااا لاى مريض بسيولة الدم او حتى معرض لتكسر الصفائح الدموية
اتمنى ان التحذير يكون وصل و رجاء تقيموا التوبيك علشان اكبر عدد يشوفه
Dida Showman Dida Showman ممنوعة من المشاركة Fatakat 569730 Alexandria – Egypt