بصوا بقى انا تعبت جدا على ماعملت الكباب ده وصورته ياريت تقدروا مجهودي وتقيموا
عملت كباب ع الفحم بدون شوايه اه وطعم الكباب اللي عند الكبابكي واحلى بقى عشان التتبيله طبعا بهتم بيها كل اللي هتحاتجيه ياقمر لحمة ضاني وفحم واسياخ خشب وتتبيله اللحم وفرن قبل ما اقول اي حاجه نسم الله ونصلي على النبي
أولاً : نتبل q وتبات ف التتبيله بصوا انا مصورتش التتبيله لانها كانت جاهزة عندي وشيلاها ف الفريزر بس هقولكم مكوانتها بصي ياقمر انتي وهيا هنجيب بصل على حسب كميه اللحمه ونقشره ونغسله ونقطعه ونحطه ف الخلاط مع شويه خل وشويه ملح وفلفل برده الكميات على حسب كميه اللحمه انا بحط من غير كميه بظبط ايدي وطبعا نحط فلفل اسمر وفي عند العطار حاجه اسمها توابل اللحمه او توابل الكباب بحط منها واحط زبادي وقوطه او كاتشب وشويه مسطرده الزيادي مهم جدا عشان اللحمه ماتشدتش وخدي بالك الزبادي ف اللحمه بس لان الفراخ لحمه مهريه جاهزه اما اللحمه بتبقى بتشد اللي معندوش زبادي ممكن شويه لبن ونضربهم ف الخلاط ونحطهم ف صنيه وعليهم اللحمه ونقلب اللحمه كويس قوي فيهم عشان تتبل كويس ونبيتها ف التلاجه
ثانياً : نحط اللحمه ف الاسياخ الخشب زي كده
وكده كمان
اتبقى كام حته معرفتش ادخلهم السيخ من العضم عملت فيهم كده
وبعدين ياقمر اللي مش هتقييم هزعل منها جدا نكمل بقى
ولعت فحميتين على عين البوتاجاز انا مش صورت وانا بولع الفحم لان ايدي كانت سودا وكنت لوحدي محدش معايا بس الخطوات بولع فحميتين على عين البوتاجز وباخد صنيه قديمه او مستغنيه عنها عندي واحط فيها الفحميتين وتحتها فحم مش مولع واحط قدامهم مروحه بتخلي الفحم يولع وهو ف الصنيه
طبعا انا حاولت اني احط الاساخ ع الفحم ف السنيه لقيت اللحمه هتلزق ف الفحم ففكرت اعمل ايه ولقيت الحل طبعا فيه ف الفرن شبكه حطيت الاسياخ ع الشبكه وتحت الشبكه الفحم زي كده
شايفين الفحم مولع ازاي
وبعدين ولعت شوايه الفرن من فوق زي كده
بقى الفرن شكله ازاي بقى شكله كده
وكده كمان
اول ماتشمي ريحه الكباب ابدأي قلبيه ع الوش التاني ومش اول مالونه يتغير ترفعيه سبيه عشان يستوي قوي ياقمر وتعرفي ازاي طلعي سيخ واقطعي حته صغيره بالسكينه شوفي اللحمه من جوه استوت ولا لسه حمرا ودوقيها تمام كده كل شويه هتلاق الفحم بيطفي زودي فحم وحطيه قدام المروحه يولع شويه ويرجعيه الفرن تاني ومتنسيش سيبي باب الفرن مفتوح عشان الفحم مايتطفيش عشان بيحتاج هوا وكل مايطفي زودي فحم وحطي قدام المرحه يولع الفحم الجديد وهكذا لغايه ماتخلصي كميه الكباب كلها ودي النتيجه
شايفين جماله يلا كل واحده تاخد ليها سيخ انا هقدمه بالسيخ بتاعه بس مستنيه زوجي يجي عشان اسخنه الاول تاني وبعدين احطه ف طبق التقديم يلا مدوا ايدكم ماتتكسفوش يامي
انا تعبت جدا ف عمل الكباب وانا مطلوب مني الراحه التامه وبالرغم من ذلك قولت لازم اقول لحبايبي الفتوكات على فكره شوي كباب ع الفحم بدون شوايه وتعبت على مارفعت الصور وكتبت الموضوع من الاخر اللي مش هتقيم هحطها ف سيخ وادخلها الفرن تتشوي ولما تخرج هكهربها انا قاسيه قوي اه عايزة بقى التقييم عشان مجهودي ومتخافيش انا مبعرفش اشوي غير اللحم الضاني بس بس انتي برده قدر مجهودي ويلا متنسوش اللي تدخل وتقيم تاخدلها سيخ كباب وهي خارجه .
متنسوش تدعولي ان ربنا يحفظلي جنيني ويباركلي فيه ويجي للدنيا ان شاء الله سليم معافى ويكون مطيع لله بار بوالديه لايعمل الا صالحا ويباركلي ف زوجي واهلي .
طبعا بقى انتوا اعملوا سلطاتكم وبابا غنوكم اسيبكم ف رعايه الله نسيت اقولكم حاسبوا تتلسعوا وانت بتقلبوا الاسياخ قلبوها بالمساكه الحديد اللي بتحمري بيها الفراخ واللحمه وكوني حذره
والسلام عليكم ورحمة الله وبركاته مواضيع هذا القسم برعاية
نقابي نجاتي نقابي نجاتي 655962_3.gif فتكات رائعة Fatakat 655962 قليوب – مصر