السلام عليكم
ازيكم يا فتوكات ؟
انا موش قلتلكم ههريكم طبخات هههههههه
جايبلكم معايا السمك المشوى يمممممم بجد شكله يفتح النفس خدى شوفى الصورة كدا عشان تدخلى على الموضوع وانتى متشجعة وعشان كمان متكسليش تقولى رايك.
ندخل على الطريقة بقه
هنجيب سمك والردة ونجهز الخلطة اللى هنحشى بيها السمك وهى عبارة عن توم وفلفل اخضر وكسبرة خضرا وجزر مبشوروليمون وخل وملح وفلفل وكمون واى توابل انتى تحبيها وبعديين نقطع عليها طماطم قطع صغيرة ودة شكل الخلطة قبل ما اقطع عليها الطماطم.
ونجيب السمك ونغسله كويس ونتبله بالملح والكمون والكسبرة الناشفة والتوم كويس وبعدين نحشيه بالحشوة دى ونسيبه يتشرب شوية طعم الحشوة والتتبيلة يعنى بتاع ساعة او اتنين كدا وده شكل السمك اللى انا شويته.
بعد كدا نحط السمك فى الردة بالشكل ده.
وبعدين بقه نجيب صاج او صينية انتى مستغنية عنها ونحطها على البوتاجاز من فوق على نار عالية ونشوى عليها السمك ونختبر درجة حرارة الصاج الاول قبل ما نحط عليه السمك عن طريق رش الصاج بشوية ردة لو الردة اتحرقت بقه الصاج دلوقتى جاهز للشوي.
ونبدأ نشوى السمك من الناحيتين وهتعرفى انه استوى لما تلاقيه موش بيلزق فى الصاج لكن لو جيتى تقبيه ولقيتيها لسة لازقة يبقه سبيها شويه لغاية لما تستوى.
وطبعا هتكونى قبلها مجهزة التتبيلة اللى هتسقى فيها السمك بعد ما يطلع من الشوى واللى هى عبارة عن توم مفروم بقشره بتاع تومة كاملة كدا وكسبرة ناشفه وملح وكمون وفلفل اخضر حراق ولمون وخل كتير ومية تحطى دول كلهم على بعض زى كدا وتغليهم على النار غلوة واحدة بس وبكدا دى هتكون جاهزة لما السمك يتشوى وياريت لما تستخدميها تكون دافية متكونش باردة.
ولما السمك يتشوى تروحى مطلعاه علطول وحطاها فى التتبيلة اللى عملناها فوق دى وتسيبيه يتسقة فيها بتاع نص دقيقه كدا بالشكل ده
وبعدين تطلعيها فى طبق ودى الكمية كلها لما خلصت.
وبعدين تقدميها بالطريقة اللى انتى تحبيها انا قدمتها بالطريقة دى.
وخلاص انا كدا خلصت وبالهنا والشفا على عيونكم يا قمرات والى لقاء اخر ان شاء الله. مواضيع هذا القسم برعاية
ام نور دنيتي ام نور دنيتي فتكات رائعة Fatakat 364309 لا زمان – لا مكان