قبل ما اكتب خلاصة تجربتي بعد ما نولت من 98 كيلو ل 80 في 5 شهور،عايزاكم تدعولي دعوة حلوة ان ربنا يكفي المسلمين شر السرطانات الجسدية و النفسية كمان..
ثانيا نصلي على اشرف الخلق سيدنا محمد ..الهم صلي و سلم عليه..
بصي يا ست الكل..الخطاء الشائعة اللي لازم نصححها في الريجيم و الرياضة و دي اهم حاجة:
1-علشان الجسم ما يخزنش ميه يبقا نقلل شرب الميه!
ده كلام خطر جدا و مالوش اساس،الجسم بيحوش الميه ل3 اسباب:
-امراض الكلي و الغدد
-الدورة الشهرية و الحمل
-و اهم شيييء..أكل الملح الزايد..
الحل؟الانسان الطبيعي لازم ما يزيدش في اليوم عن ملعقه صغيرة 4 جرام ملح فقط لاغير..شوفي بقا ميه البحر اللي بنسفها!
قللي الملح تدرجيا و استعيضي عنه ساعات بالتوابل و الليمون..بعد اسبوعين بالضبط هتلاقي نفسك اتعودتي تماما على الاكل بدون ملح!
2-ناكل الاكل الجاهز اللي مكتوب عليه خالي الدسم زي ما نحب و هنبقا فل الفل!
كلام فاضي برضو و كارثه في نفس الوقت!معظم الاجبان و القشطة الدايت و الحاجات العجيبة دي بيشيلو منها الدسم و بيحطوا ايه؟سكر!علشان تعزيز القوام و الطعم!
الحل؟كلي من طبخ ايدك..كلي جبنه قريش و شيلي وش الزبادي العادي..كلي الجبنه الحلوم -جبن الماعز- بدل الموتزاريللا قليلة السعرات..اتأكدي من كميه الملح و السكر المضاف في المنتجلا تقليله الدسم قبل ما تشتريها و قارنيها بكاملة الدسم هاتلاقي كوااااارث!
3-العسل فيه سعرات كتير اكتر من السكر،يبقا الحل السكر الدايت السكارين..
يانهار ابيض!السكارين ببساطة بيسبب خلل في البنكرياس و بيؤدي لمرض السكر..
الحل؟عندي ثلاثة حلول:
-بطلي السكر تدريجي و بعد اسبوعين خلاياا التذوق في اللسان هتكون اتبدلت..فمش هتحسي بأي غرابه للاكل و الشرب بدون سكر!
-بدلي معلقه السكر بنص معلقه عسل..هتديكي نفس السعرات الا ان العسل في مضادات اكسده و معادن و بيتحرق بسهوله جدا
-استبدلي السكر العادي بالسكر اببني او سكر الفاكهه الفركتوز..ده موجود في السوبرماركت الكبير.
4-لو ما فطرناش و ما تعشيناش هنخس اسرع..
يا جماعة الجسم لما بناكل وجبه واحده او اثنين بس بيفتكر ان في مجاعة فبيبطل يحرق!@يبقا نخدع الجسم باننا نقسم الوجبة نصين و ناكل كل تلات ساعات نص..بكده الاكل هيتحرق اسرع بمرتين..
نصيحة صغننه،ان كانت معدتك تمام،زودي شطة و فلفل اسود قد ما تستحملي على اكلك..اشربي كوب عصير طماطم بالشطة و الليمون قبل الفطار..
اعملي غرغرة لزورك من منقوع الجنزبيل و القرفة..هتساعدك تحرقي اكتر كتييير
5-الرياضه ع الريق تحرق اكتر..
هتحرق دهونك و عضلاتك يا شابة!الرياضه بعد الاكل بساعتين و قبل التمرين بنص ساعة كلي واحده زبادي او كوب صغير لبن رايب و اعيلي ..
6-هبطل رياضة لان وزني ثبت عليها
وزنك ثبت يا جميل لان جسمك بيحول الدهون لعضلات!ده انت ممكن تزيدي كمان!و لما يكون جسمك فيه عضلات اكتر هتخسي اسرع لان العضلات بتحتاج تحرق سعرات كتير علشان تتحرك..
الحل انك تمسكي المازورة و تتابعي نزول المقاس بدل الميزان
لو قيمتم كويس هنزل موضوع تاني عن تخسيس اجزاء من الجسم و ازاي تلبسي ملابس تخفيها لغايه ما تلاقيي الحل فيها
horro princess horro princess images/avatars/abstract3.gif فتكات نشيطة Fatakat 659965 alex – egypt