السلام عليكم ورحمة الله وبركاته
اولا الشروط الاساسيه في الاستانلس:
18/10
قاعده سميكه لتوزيع الحراره
الحله تقيله من الداخل تكون مش بتلمع اوي
جربت التركي بس
رأيي ان الاستانلس سواء تركي او المصانع الحربيه او زهران او اي حاجه تاني طالما الشروط متوفره خلاص تمام كده وكمان الحلل دلوقتي معاها الضمان
ثانيا وهو الاهم:
الاستانلس هو الافضل صحيا ومش المفروض كل ماتطلع حاجه نجري نشتريها علشان شكلها جذاب وعلشان الشيفات بيستخدموها
التيفال انا متأكده مليون الميه انه خطر جداااااااا.. سواء قشر او لا..يا اخواتي دا بيتصنع من الماده اللي بيسفلتوا بيها الشوارع..لو مش مصدقيين اعملوا بحث على جوجل ومش علشان الاكل مش بيلزق فبها يبقى نئذي اولادنا بالبطيء
وكمان الاستنلس ولا بيشيط الاكل ولا بيلزق فيه الرز ولا هو مخصوص فقط للسوائل والسلق كل ده مش صح
انا بعمل فيه المحشي بكل انواعه (الكرنب وورق العنب بفرش ورقه خضا من الكرنب او ورق عنب في الارضيه قبل ما ارص المحشي..عادي جدا كنت بعمل كده في الالمونيوم)
محشي الباذنجان برضه زيه زي الالمونيوم وانا طريقتي في تسوية الباذنجا يكون مرصوص قائم والنار عاليه
الرز المعضله اللي الناس اشترتله كل انواع الحلل
ولا معضله ولا حاجه
احمر الشعريه عادي جدا وعليها الرز لما اسقيه بقى ازود الشوربه شويه عن لما اعمل في الامونيوم
والمفروض تكون الشوربه او الميه بتغلي قبل ما اسقي الرز علشان مايعجنش مجرد ما الشوربه تبقى متساويه مع الرز متساويه هه(مش متشرب)لأ متساويه او اعلى بنص سنتي كده..اقلب تقليبه بسيطه يعني م قلب شاي لأ قصدي ان اتأكد ان الشوربه واصله لقاع الحله والرز فيها شوربه كده في كل اجزائه..بعدها اخفض النار جدا زي ما تكوني بتدمسي فول وبعد 10 دقايق تفتحي الحله هتلاقي بخار كتير جدا شوفي بقى
استوى او ماستواش
لوماستواش عندك حاله من اتنين ماستواش وحطيتي المعلقه ولقيتيه لسه فيه سائل و ووصلي المعلقه للارضيه هتحسي ان كان لازق او قرب يلزق او لا لو لقيتيه لسه فيه ميه تسويه وتعمله بخار يكمل تسويته يبقى تمام سيبيه بقى 5 دقايق كمان واطفي عليه من غير ماترفعي الغطا علشان البخار
الحاله التانيه تلاقيه ماستواش ونشف زودي كبشه شوربه او حسب مانتي شايفه محتاج ايه وسيبيه 5 دقايق واطفي عليه بعدها
بس كده ولا بيلزق ولا بحصله حاجه خالص وعلى فكره الرغي الكتيير ده انا ذكرته علشان العرايس الجداد اما هو ده اللي بيتعمل دايما مع الرز
مهم جدا جدا جدا ان النار في جميع طبخك ما تتعداش القاعده السميكه للحلهيعني اختاري عين البوتاجاز المناسبه للحله الكلام ده مهم جدا
كمان مهم جدا جدا ان الطبخ اللي في الحله سواء صلصات او سوائل او محشي ورز يكون مقدار تلتين الحله فقط يعني لازم لازم لازم تلت الحله يكون فاضي خاصه في الرز المعضله او المحشي
غلي اللبن ..ماتغليش اللبن وهو متلج وكمان ماتسبيش اللبن يغلي وحده كده بدون ماتقلبيه كل دقيقتي والكلام ده برضه فى الاستانلس او غيره
كمان انا بطلت استخدم الالمونيوم الا في الكيك والبيتزا وماعنديش صواني استانلس ومش عارفه اصلا فيه صواني استانلس جيده او لا
المهم بعمل البطاس في الفرن في الحله وبتطلع جميله.. بس بتاخد وقت شويه لما احطها تحت الشوايه لانها عميقه
ساعات املى نص الحله زيت واحمر غيها فراخ او بطاطس واغسله بعد مره واحده بس وبترجع جديده بس ناويه اشتري الووك من تابروير او سبتر بس اتأكد الاول انهم يستاهلوا المبلغ الكبير ده
مهم اوي اقولكم اني بسوي الفراخ واللحمه بدون ميه خالص اما الفرخه بتتبيلتها او اللحمه بتتبيلتها بس وبتستوي بدون نقطة ميه
او اسوي اللحمه بدون تتبيبله بفلفل اسود بس وبدون نقطة ميه برضه وبأكد بدون ميه خالص ..اللحمه بتستوي عادي جدا بميتها وابقى احط ملح بعد ماتستوي
عندي منهم حله طول الوقت فيها ميه لان الميه بتقطع عندي كتييير جدا
انا كده كتبت كل اللي فاكراه وحاسه انه هيفيدكم ..لو افتكرت حاجه تاني هكتبها
المهم بقى انا لقيت طقم استانلس صيني ضيه زي الفضه..ان شاء الله بعد سنه كده هقول تجربتي
والسلام عليكم ورحمة الله وبركاته
لقد خلقنا الانسان في كبد لقد خلقنا الانسان في كبد فتكات حبوبة Fatakat 1229556 الحياة الدنيا – الحياة الدنيا