|:| بــريـــانـــى الــدجـــاج |:|
المقادير :
ارز بسمتى عملت 3 ك عشان كان عندنا ضيوف
3 بصل متوسط الحجم مقطع جوانح
3 طماطم حجم كبير مقطع مكعبات
2 بطاطس حجم كبير مقطع مكعبات
ملعقتين ثوم مفروم
فلفل قرون احمر و 2 فلفل اخضر حار
كوب زبادى
3 ملاعق صلصه
مكعب ماجى
خضره مقطعه صغير اوى ( شبت و بقدونس و كسبره )
فراخ على اد ما حتعملى بس قلت ل ماما تقول للراجل يقطع الفرخه على 8 عشان تطلع مستويه لانى مش حسلقها
الطريقه :
هنا حطيت ملعقه زبده كبيره وشويه زيت و حمرت فيهم جزء من البصل مش كله
بعدين حطيت باقى البصل ف نفس الحله اللى عملت فيها البصل اللى فوق لحد ما اصفر ودبل شويه
وحطيت عليه الثوم
بعدين حطيت الفراخ عشان تتحمر شويه
استنيت الفراخ تتحمر من تحت شويه و حطيت عليها البطاطس
سيبت البطاطس شويه مع الفراخ بعدين حطيت الزبادى و الصلصه والفلفل و بدءت احط التوابل
ملح وفلفل و جوز الطيب (اللى مش عاوز ميحطش عادى) و قرفه و قرنفل و ممم كزبره ناشفه و الماجى
وممكن ورق لورا وحبهان
قلبتهم شويه مع بعض وخلو بالكم كل ده لسا محطتش ولا نقطه مياه كل ده الفراخ بتنزل شوربتها لوحدها
بعدين حطيت الخضره
وسيبتهم مع نفسهم شويه كتير وغطيت عليها كمان عشان الفراخ تستوى
بعدين دهنت صينيه سمن و رصيت فيها الفراخ وحطيت شويه من الشوربه اللى ف الحله (القدر) عشان تكمل سواء ف الفرن و غطيتها ب فويل (قصدير) ودخلتها الفرن
كنت حاطه الارز تقريبا نص ساعه ف ميا دافيه مع شويه ملح وماجى
وبعدين حطيته ف الحله ( القدر ) و حطيتله شويه مياه تغطيه
غطيت الحله بالفويل و سيبته يستوى بئا (بحب اغطيها بالفويل بحس انه بيطلع احلى منفوش و مش لازق ف بعضه كدا )
ووعقبال ما استوى جهزت الصلصات
متهيالى انتو بتسموها صلصه دقوس !!! مش عارفه لو غلط صححوها 
حطيت طماطم مقطعه و فصين ثوم مفرومين و فلفل احمر ناشف وملح وفلفل
وسيبتهم ع النار
ودى سلطه زبادى
بشرت الخيار والجزر و فص ثوم و ملح وحطيت عليهم زبادى وبس لو لقيتيها خفيفه زودى جبنه كريمه
وهنا النتيجه بئا
ممكن تبدلو الدجاج ب لحم بردو ياجماعه عادى جدا وبعملها كتير
ويارب يكون عجبكم
مواضيع هذا القسم برعاية
اياات اياات سوبر فتكات Fatakat 123728 مدينه الاحلام – مملكتي