حصرى للفتكات بس
السلام عليكم
ازيكم عاملين ايه
كان في كام فتوكة مغتربة كان نفسها تعرف الكشك الصعيدي بيتعمل ازاى علشان معندهمش في البلاد اللي هما فيها
وانا كنت وعدتهم انى اجيبها لعيونهم
علشان انا خالتى في البلد بتعرف تعمله وبتبعتوه لينا كل موسم قلت اسألها علشان خاطركم
المهم
المقادير
مش هاقول الكميه قد ايه علشان انتى واللي عايزاه
يعنى الكمية اللي انتى عايزاها ماشى يا سكرة
على العموم نصيحة منى جربى كيلو الاول
قمح البليلة ( او فريك مش مشكلة )بفضل قمح البليلة (whole wheat) اللى من غير قشر
لبن رايب للعجن
شطة
كمون
ملح خفيف علشان اللبن الرايب في ملح
كله حسب الرغبة يا جماعة وحسب الطعم اللي نفسك فيه لو من عشاق الشطة زودى حد ليه عندك حاجة
الطريقة :
بصى يا ستى
هاتى القمح السليم وحطيه في الكبة بتاعتك ويادوب شغللي الكبة واقفليها علي طول بحيث انه يا دوب يتكسر ويبقي فيه حبة كاملة كمان
يعنى من ده علي ده
(ملحوظة لو عايزاه كشك المظ اطحنيه ناعم شوية )
اغلي ميه
حطيه فيها ويادوب يستوى نص سوا يعنى يفضل ناشف يا جماعة
طلعيه وصفيه من الميه وسيبه لغاية ما يبرد
هاتى اللبن الرايب وحطى عليه الشطة والكمون والملح الخفيف
واعجنى بيه لغاية ما يبقى عندك عجينة متامسكة
ابتدي بقى كوري وقطعى وشكلى الشكل التقليدي اللي كلنا عارفينه
الفلاحين عندهم حصيرة وسطوح
انتى بقى اتصرفي (الشاطرة تغزل برجل حمار)
يعنى اي حاجة واسعة عندك وفي البلكونة في الحر ده هاتفى بالغرض
اتفضلى بقى افرديه في الشمس طول النهار وباليل غطيه
ثلاثه ايام ولو احتاج اكتر من كدة ماشى لغاية ما يبقي عندك محجرو ناشف كدة زى ما احنا عارفينه
ماشى كدة تمام
بعد كدة دخليه جوة وشوفى بقى حمصيه شوية في الفرن علشان يستمر اطول فترة ما يبوظش او السوس ياكله
وبألف هنا وشفا يا حلوين
وان شاء الله اللي في غربة يرجع قريب وياكل الكشك البلدى اللي هنا وسط اهله
حصرى للفتكات وبس مواضيع هذا القسم برعاية
alaam alaam 70859_1.gif سوبر فتكات Fatakat 70859 ارض الوطن – مصر
سبحان الله و بحمده
