الوسم: الجنين

حبيبات قلبى امهات المستقبل القريب ان شاء الله
النهارده عاوزه اكلمكم فى موضوع ممكن ميكونش اول مره اتكلم فيه
وهو عن {القصور فى عمل الغده الدرقيه وتاثيره على تاخر الحمل}
بس انا النهارده عندى شويه نصايح وتنبيهات حبيت اقول لكم عليها ويارب تفيدكم ان شاء الله

اولا انا بس عاوزه افكركم بالموضوع القديم واللى اتكلمت فيه عن المرض ده وتأثيره على تاخر الحمل
واعراضه…
وده الموضوع عشان ما اطولش عليكم
خدى بالك…ممكن تكون سبب عدم حملك(موضوع مهم ومفيد جداااا)

بس الجديد اللى عاوزه اقوله لكم النهارده شويه نقط مهمه جدااا فى الموضوع ده يمكن مكنتش قلتهم قبل كده فى الموضوع السابق وكانت بتجينى اسئله على الخاص فحبيت اقوله لكم النهارده

_من اهم التحاليل اللى المفروض تتعمل فى حاله تاخر الحمل هو تحليل الغده الدرقيه
واللى اسمه Tsh,freet4
والنسب الطبيعيه للهرمون ده كالتالى:
Tsh ويتراوح المستوى الطبيعي لهذا الهرمون0,5 الى5 ملى وحد دوليه
Freet4 ويتراوح المستوى الطبيعي لهذا الهرمون الحر ما بين0,8 الى 4,2 نانوجرام

وهو ليس له يوم محدد يتعمل فيه اثناء الشهر زى باقى الهرمونات اللى المفترض تتعمل تانى او تالت يوم للدوره الشهريه
ولو تم اكتشاف خلل فى نسب الهرمون(خصوصا لو كان الخلل شديد شويه)يفضل المتابعه مع طبيب تخصص غدد صماء
لانه بيكون اكتر فهما ودرايه وخبره بموضوع علاج الهرمونات اكتر من طبيب امراض النساء.

_القصور فى عمل الغده الدرقيه بيسبب مشكلات تانى كتير للجسم
يعنى القصور فى الغده بيعمل خلل فى باقى هرمونات الجسم وخصوصا هرمونات الخصوبه
زى هرمون اللبن اللى بياخر الحمل ويضعف التبويض فى بعض الحلات بيكون سبب ارتفاعه هو قصور الغده الدرقيه وللاسف احيانا دكاتره مش بتطلب التحليل ده.

_بمجرد علاج الغده الدرقيه باقى الهرمونات فى الجسم بتتظبط وحجات كتير بتتصلح
ومن اهمها ان الجسم بيصبح قادر على الحرق
لانه مريضات قصور الغده الدرقيه بيكون عندهم صعوبه فى تخفيض اوزانهم لصعوبه الحرق عندهم بسبب الخلل الهرمونى
وبمجرده ما الغده بتتظبط والجسم يبقى عنده قدره على الحرق فموضوع الريجيم هيبقى سهل جدااا ومكن الممكن بعدها حدوث حمل بصوره طبيعيه وبدون منشطات
وعلى فكره اقراص الدواء الصناعه المصريه فعاله جدا وانا عن نفسى استخدمتها وهى اللى ماشيه عليها لحد دلوقتى
انا بقول كده لانى قريت هنا بنات بتنصح بعض وبيقولوا ان الدواء المستورد اكثر فعاليه
بس انا من تجربتى حابه اقول لكم وللامانه ان الدواء المصرى ممتاااز…

_بمجرد حدوث الحمل ان شاء الله لاااازم تفضلى متابعه مع طبيب الغدد الصماء الى جانب طبيب النساء
وده لانه الجسم بعد ما بيحصل حمل مباشره هرمون الغده الدرقيه بيرجع يرتفع من تانى
وده لانه الجسم احتياجه للهرمون التعويضى بيزداد طبعا نظرا لوجود الجنين
واذا لم يتم اعطاء الام الحامل الجرعه المناسبه لها من الدواء (لانه المفروض الدواء فى حاله حدوث الحمل بتتزود جرعته بالتدريج وتحت اشراف الطبيب) من الممكن حدوث بعض المضاعفات الخطيره ومن اهمها:

*حدوث نزيف او فقدان للحمل لاقدر الله.
*ولاده طفل يعانى من نفس المرض او يعانى من تاخر عقلى او طفل مصاب ببعض التشوهات لاقدر الله.

من هنا بتيجى اهميه متابعه الموضوع مع الدكتور المتخصص وعمل تحليل الخاص بالغده كل 3 اسابيع تقريبا فى بدايه الحمل
وبعد كده لازم التحليل يكون شهرى لحد ميعاد الولاده ان شاء الله
مع العلم انه بعد الولاده الجرعه هتتخفض مره تانيه للأم لانه احتياجها للهرمون التعويضى هيقل طبيعى بعد الولاده.

_قصور الغده الدرقيه لايؤثر على الرضاعه الطبيعيه فى شىء،ولا ينتقل القصور للطفل الرضيع من خلال عمليه الرضاعه
كما ان القصور ده مش بياثر على مكونات لبن الام وبيكون طبيعى جدا حتى لو الام لخبطت فى العلاج والنسبه حصلت فيها خلل من تانى خلال فتره الرضاعه ده كله ليس له اى تاثير نهائى على لبن الام والرضاعه الطبيعيه.

نصيحه اخيره:وزاره الصحه بتعمل تحليل الغده الدرقيه للمولود بعد الولاده فى مكاتب الصحه عند قيد المولود
هو من المفترض يتعمل فى موعد اقصاه اسبوع بعد الولاده للاطمئنان على المولود
ومن المفترض انه لو اتضح ان المولود عنده اى خلل فيه لاقدر الله بيتم الأتصال باهل المولود لتبليغهم لان العلاج لازم يبتدى بدرى خالص
انا عن نفسى عملته لابنى بعد الولاده على حسابى فى معمل المختبر لانى خفت انه لاقدر الله الموضوع يتنقل له
رغم انى كنت مواظبه على الدواء وخفت لحسن مكتب الصحه ينسوا يبلغونى فى الوقت المناسب عشان كده انا حبيت اطمن بنفسى
والحمد لله طلع سليم

الموضوع تجربه شخصيه لانى من مريضات قصور الغده الدرقيه
والمعلومات اللى فيه كلها من دكتورتى ربنا يجازيها كل الخير
ولو شايفين ان الموضوع مفيد
لى عندكم طلب
اى دعوه حلوه بظهر الغيب ولكم بالمثل
واى سؤال عندكم اتفضلوا طبعا وانا هرد من خلال خبرتى المتواضعه فى الموضوع ده حيث انى مش دكتوره
مستنياكم يا بنات فى اى سؤال

sokkar nabat sokkar nabat 202434_55.gif Fatakat 202434 ♥♥حضن جوزى وابنى حبايبى♥♥ربنا يخليهم لى ويبارك لى فيهم♥♥ – ◘◘بيتى اللى هو مملكتى الصغيره◘◘