أنهردة هوريكوا طريقتى فى عمل الفراخ المشوية .. وكمان هوريكى ازاى تستغنى عن بشر البصل ليها
ومتعيطيش بقى .. كفاية عياط 😛
نبتدى بالمقادير
-_-____________-_-
بصلتين – لمونة – 3 فصوص ثوم – قرن فلفل كبير – توابل ( معلقتين ملح – فلفل – ورقتين غار ناشف و مكسر – نص مكعب ماجى – معلقة سماق – معلقة عقدة صفرة – نفحة قرنفل مطحون و نفحة قرفة – معلقتين شطة بابريكا – شوية شطة ناشفة و كــســبرة ناشفة) كل دا بمعلقة الشاى – و شوية خل -و طبعاً قتيلة متنضفة و متقطعة .. علشان نتاويها سوا
طريقة التحضير
-_-___________-_-
1_ بتجيبي البصلتين تخرطيهم اي كلام بسرعة فى الهون .. علشان متعيطيش و تخرطى عليهم قرن الفلفل و تحطى الثوم
وشوية ملح و تدقيهم ناعم … مش هتعيطى خالص
2_ تجيبي طبق التوابل اللى حضرتيه تحطيه على البصل .. انا محطتش قرفة علشان اختى كانت مخبياها علشان مش بتحب طعم القرفة فى الاكل … و كمان للاسف محطتش المرادى سماق . علشان قعدت ادور عليه ملقتهوش و فى الاخر لاقيته بعد ما خلصت
و تضيفى الليمون و الملح وتقلبي براحة وتسيبيه يرتاح هينزل مية كتير
3_ الفرخة تكونى مقطعاها و منضفاها كويس بالخل و الملح لغاية ما تفطس
ماما الله يرحمها كانت تقولى اقعد اغسل فيها لحد ما تزيق يبقى دا صوت النضافة
وبعدين تضيفى عليها الخلطة دى و تسيبها يجي نص كدا وطبعاً ككل ما تزودى وقت يكون احسن
4_ لو عندك شواية زي بتاعتى حطى لتر و نص مية و بابريكا و قطع لمون و بصل
وبعدين رصى الفراخ على الشبكة
5_ لما تستوى على الجنبين طلعيها فى حلة و هاتى سلطانية فيها معلقة زيت و حطى فيها فحمة مولعة و دخليها الصينية و اكبسي عليها .. ربعاية كدا و قدميها
و عملت جنبها شوية بابا غنوج و اخدت شوية من غير طحينة .. علشان انا فى دايد
ها ايه رأيكوا يا فتوكات .. جربوا طريقة التتبيلة دى و قولولى بقى
مواضيع هذا القسم برعاية
Fruit_Salad Fruit_Salad 355228_2.gif فتكات رائعة Fatakat 355228 القاهرة – EGYPT